​​អា​រ៉ា​ប៊ី​សា​អូឌីត៖ ប្រធានាធិបតី​ចិន​លោក Xi Jinping បានមក​ដល់ទី​ក្រុង Riyadh ប្រទេស​អារ៉ាប៊ីសាអ៊ូឌីត ដើម្បី​ចូលរួម​កិច្ចប្រជុំ​កំពូល​រដ្ឋ​ចិន​-​អារ៉ាប់ និង​កិច្ចប្រជុំ​កំពូល​ក្រុមប្រឹក្សា​សហប្រតិបត្តិការ​ឈូង​សមុទ្រ​ចិន (GCC) និង​បំពេញ​ទស្សនកិច្ច​ផ្លូវរដ្ឋ​នៅ​ប្រទេស​អារ៉ាប៊ីសាអ៊ូឌីត តាម​ការអញ្ជើញ​របស់​មហាក្សត្រ Salman bin Abdulaziz Al។

យន្តហោះ​ពិសេស​របស់លោក​ប្រធានាធិបតី Xi ត្រូវបាន​អមដំណើរ​ដោយ​យន្តហោះ​ចម្បាំង​ចំនួន 4គ្រឿង​មកពី​កងកម្លាំង​ទ័ពអាកាស Royal Saudi Air Force បន្ទាប់ពី​យន្តហោះ​បាន​ចូលដល់​ដែនអាកាស​របស់​ប្រទេស​អារ៉ាប៊ីសាអ៊ូឌីត និង​ដោយ​យន្តហោះ​ចំនួន 6គ្រឿង​ផ្សេងទៀត​មកពី​អង្គភាព Royal Aerobatic បន្ទាប់ពី​យន្តហោះ​បាន​ចូលដល់​ដែនអាកាស​ទីក្រុង Riyadh​។ លោក Xi និយាយថា ក្នុង​រយៈពេល 32ឆ្នាំ​កន្លង​ទៅ​នេះចាប់តាំងពី​ការបង្កើត​ទំនាក់ទំនង​ការទូត​រវាង​ចិន និង​អារ៉ាប៊ីសាអ៊ូឌីត ភាគី​ទាំងពីរ​បាន​ពង្រឹង​ការ​ជឿ​ទុកចិត្ត​គ្នា​ទៅវិញទៅមក​ជា​យុទ្ធសាស្ត្រ ដោយមាន​កិច្ចសហប្រតិបត្តិការ​ជាក់ស្តែង​ប្រកបដោយ​ផ្លែផ្កា​ក្នុង​វិស័យ​ផ្សេងៗ​។​ ​លោក Xi និយាយថា ក្នុង​ដំណើរ​ទស្សនកិច្ច​នេះ លោក​នឹងមាន​ការផ្លាស់ប្តូ​រ​ទស្សនៈ​ដ៏​ស៊ីជម្រៅ​ជាមួយ​មហាក្សត្រ Salman និង​ព្រះអង្គម្ចាស់ Mohammed bin Salman Al Saud ស្តីពី​ទំនាក់ទំនង​ទ្វេភាគី និង​បញ្ហា​អន្តរជាតិ និង​តំបន់​ដែលមាន​ចាប់អារម្មណ៍​រួមគ្នា​សម្រាប់​ទំនាក់ទំនង​ចិន​-អារ៉ាប៊ីសាអ៊ូឌីត​។​

​ប្រធានាធិបតី​ចិន​និយាយ​ថា លោក​ទន្ទឹងរង់ចាំ​ចូលរួម​កិច្ចប្រជុំ​កំពូល​រដ្ឋ​ចិន​-​អារ៉ាប់ និង​កិច្ចប្រជុំ​កំពូល​ក្រុមប្រឹក្សា​សហប្រតិបត្តិការ​ឈូង​សមុទ្រ​ចិន ​(GCC) ហើយ​ត្រៀម​ធ្វើការ​រួមគ្នា​ជាមួយ​មេដឹកនាំ​នៃ​រដ្ឋ​អារ៉ាប់ និង​ប្រទេស GCC​។​​ ការ ជួបប្រជុំគ្នា​រវាង​មហាអំណាច​ហិរញ្ញវត្ថុ​ទូទាំង​ពិភពលោក និង​តំបន់​ឈូង​សមុទ្រធ្វើ​ឡើង ខណៈ​ទំនាក់ទំនង​របស់​ប្រទេស​អារ៉ាប៊ីសាអ៊ូឌីត​ជាមួយ​ទីក្រុង​វ៉ាស៊ីនតោន​មាន​ភាព​តានតឹង ​ដោយ​ការ​រិះគន់​របស់​សហរ​ដ្ឋ​អាមេរិក​លើ​ឯកសារ​សិទ្ធិមនុស្ស​របស់​ទីក្រុង​រី​យ៉ា​ដ និង​ការជួយ​របស់​អារ៉ាប៊ីសាអ៊ូឌីត​សម្រាប់​ការទប់ស្កាត់​ទិន្នផល​ប្រេង មុន​ការបោះឆ្នោត​ពាក់កណ្តាល​អាណត្តិ​កាលពី​ខែវិច្ឆិកា​៕

អត្ថបទ៖ ប៊ុនថន