ភ្នំពេញ៖ ឯកឧត្តមទេសរដ្ឋមន្ត្រី កិត្តិនីតិកោសលបណ្ឌិត ឱម យ៉ិនទៀង ប្រធានអង្គភាពប្រឆាំងអំពើពុករលួយ ហៅកាត់ ACU បានថ្លែងថា អនុសញ្ញាអង្គការសហប្រជាជាតិប្រឆាំងអំពើពុករលួយ ហៅកាត់ថា អ៊ុនកាក់(UNCAC) មិនដែលដាក់ពិន្ទុទៅលើប្រទេសជាសមាជិករបស់ខ្លួននោះទេ គឺមានតែរួមគ្នាក្នុ ងការប្រឆាំងនឹងអំពើពុករលួយ។​

ក្នុងពិធីអបអរសាទរ ទិវាជាតិ-អន្តរជាតិ ប្រឆាំងអំពើពុករលួយ ៩ធ្នូ នៅថ្ងៃទី៨ ខែធ្នូ ឆ្នាំ២០២២ ឯកឧត្ដ ម ឱម យ៉ិនទៀង មានប្រសាសន៍ថា កម្ពុជាជាប្រទេសជាសមាជិកមួយ ស្ថិតនៅក្រោមការតាមដានពិនិ ត្យមើលរបស់ UNCAC អំពីការប្រយុទ្ធប្រឆាំងអំពើពុករលួយ ដោយអង្គការនេះ ពិនិត្យមើលកម្ពុជា មា នច្បាប់អ្វីខ្លះ ខ្វះច្បាប់អ្វីខ្លះ និងច្បាប់ដែលមានហើយ បានអនុវត្តយ៉ាងណា ពិនិត្យមើលទៅលើដំណើរការរបស់តុលាការ និងការសម្អាតប្រាក់ជាដើម ។

ឯកឧត្តមបន្តដោយបញ្ជាក់ថា UNCAC មិនមានការដាក់ពិន្ទុថា សមាជិកណាមួយលេខប៉ុណ្ណេះ ឬប៉ុ ណ្ណោះនោះទេ គឺមានតែរួមគ្នាប្រយុទ្ធប្រឆាំងអំពើពុករលួយ ដោយអង្គការនេះឲ្យប្រទេសជាសមាជិកនីមួយៗ ចាប់ដៃគ្នា សហការគ្នាជួយគ្នាទៅវិញទៅមក។

ឯកឧត្តមបន្ថែមថា UNCAC ចង់ឲ្យប្រទេសនៅលើពិភពលោក មិនអាចលាក់បាំងនូវជនពុករលួយបា ន ១០០ ភាគរយនោះទេ ព្រោះប្រទេសណាមួយលាក់បាំងជនពុករលួយ គឺមានន័យថា ជាឋានសួគ៌របស់ជនពុករលួយ ហើយការប្រឆាំងអំពើពុករលួយលើសាកលលោក នឹងត្រូវបរាជ័យ។

ឯកឧត្តមបន្តថា អនុសញ្ញាអង្គការសហប្រជាជាតិប្រឆាំងអំពើពុករលួយ មានចំនួន៨ជំពូក ដោយក្នុងនោះចំនួន ៤ជំពូក ជាជំពូកដែលត្រួតពិនិត្យប្រទេសនីមួយៗអំពីការអនុវត្តប្រឆាំងអំពើពុករលួយ ក្នុងនោះមានដូចជាទី១. វិធានការបង្ការទប់ស្កាត់អំពើពុករលួយ, ទី២. អំពើពុករលួយជាបទឧក្រិដ្ឋ និងការអនុវត្តច្បាប់លើករណីអំពើពុករលួយ, ទី៣. កិច្ចសហប្រតិបត្តិការអន្តរជាតិ និងទី៤. អំពីការប្រមូលយកមកវិញ នូវទ្រព្យសម្បត្តិពុករលួយ ។

អនុសញ្ញាអង្គការសហប្រជាជាតិប្រឆាំងអំពើពុករលួយ បង្កើតឡើងកាលពីឆ្នាំ២០០៣ មានសមាជិកចំនួន ១៨៩ លើ១៩៣ប្រទេស។ កម្ពុជាបានចូលជាសមាជិកក្នុងអង្គការនេះ នៅឆ្នាំ២០០៧៕ ​អត្ថបទ បាន សុខរិទ្ធិ