ភ្នំពេញ៖ កងកម្លាំងបោសសំអាតមីនកម្ពុជា និងថៃ គ្រោងនឹងធ្វើការបោសសំអាតមីន នៅ​តាម​បន្ទាត់​ព្រំដែន នៃប្រទេសទាំង២ ក្នុងទំហំផ្ទៃដីប្រមាណជាង ១០០គីឡូម៉ែត្រក្រឡា ហើយនឹង​អភិវឌ្ឍ​តំបន់ទាំងនោះ ក្លាយទៅជាព្រំដែនមានសុវត្ថិភាព សន្តិភាព និងមានការ​អភិវឌ្ឍ​នូវ​ហេដ្ឋា​រចនា​សម្ព័ន្ធ​នានាផងដែរ ។ 

បន្ទាប់ពីជំនួបជាមួយឯកឧត្តម Supathat Narindaradhakdi អគ្គនាយក​មជ្ឈមណ្ឌល​សកម្មភាព​កម្ចាត់​មីនថៃ (TMAC) នៅល្ងាចថ្ងៃទី៨ ខែធ្នូ ឆ្នាំ២០២២ ឯកឧត្តមទេសរដ្ឋមន្ត្រី លី ធុជ អនុប្រធានទី១ អាជ្ញាធមីន មានប្រសាសន៍ថា ការជួបគ្នានាពេលនេះ អាជ្ញាធរមីន បាន​សម្រប​សម្រួលជាមួយភាគីថៃ អនុវត្តទស្សនវិស័យរាជរដ្ឋាភិបាលនៃប្រទេសទាំងពីរ ហើយ​អាជ្ញាធរ​មីន នឹងធ្វើការជាមួយភាគីពាក់ព័ន្ធថ្នាក់ជាតិរបស់កម្ពុជា មានកងទ័ពជើងគោក អង្គភាព​មួក​ខៀវ និងស៊ីម៉ាក់ ដែលអង្គភាពទាំងបីនេះ ដើរតួនាទីដ៏សំខាន់ ក្នុងការអនុវត្តជាក់ស្ដែង នូវ​ការងារ​បោសសំអាតមីន ។

ឯកឧត្តមបានបន្តថា កម្ពុជាមានខេត្តចំនួន៧ ដែលជាប់នឹងព្រំដែនថៃ ដោយកម្ពុជា​មាន​ផ្ទៃ​ចំនួន​ប្រមាណ ១៣៨គីឡូម៉ែត្រក្រឡា ដែលត្រូវបោសសំអាត ខណៈខាងភាគីថៃ មានត្រឹមជិត​ ៣០គីឡូ​ម៉ែត្រក្រឡា​ប៉ុណ្ណោះ ហើយភាគីទាំងពីរ បានឯកភាពគ្នា សហការជួយគ្នាទៅវិញទៅមក មិន​ឲ្យមានការរាំងស្ទះលើការងារនេះ ខណៈថវិកា និងសម្ភារៈប្រើប្រាស់ក្នុងការបោសសំអាតនេះ គឺ​ប្រទេសនីមួយៗចំណាយខ្លួនឯង ហើយនឹងអនុវត្តនូវផែនការនេះនាពេលឆាប់ខាងមុខ ។

សូមរម្លឹកថា សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មាន​ប្រសាសន៍​ថា អំឡុង​នៃកិច្ចប្រជុំកំពូលអាស៊ានលើកទី៤០ និង៤១ និងកិច្ចប្រជុំពាក់ព័ន្ធ សម្ដេច​បាន​ជួប​ជា​មួយ​ឯកឧត្តម ប្រាយុទ្ធ ចាន់អូចា នាយករដ្ឋមន្ត្រីថៃ ដោយព្រមព្រៀងគ្នា ដើម្បីធ្វើ​ការ​បោស​សំអាត​គ្រាប់​មីន នៅតាមបន្ទាត់ព្រំដែន នៃប្រទេសទាំងពីរ ៕ អត្ថបទ បាន សុខរិទ្ធិ