ព្រះសីហនុ៖ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ និងឯកឧត្តម គួច ចំរើន អភិបាល​ខេត្តព្រះសីហនុ ​នៅថ្ងៃទី៩ ​ខែធ្នូនេះ ​បាន​ប្រារព្ធ​ពិធី​បញ្ចុះ​បឋមសីលា សាងសង់​សាលាជាតិ​វិជ្ជាជីវៈទេសចរណ៍ថ្មីដំបូង ​នៅខេត្តព្រះសីហនុ ​ដើម្បីជំរុញការបណ្តុះបណ្តាល​ជំនាញ​វិជ្ជា​ជីវៈទេសចរណ៍ ​និងការធានាផ្តល់សេវាល្អ និងគុណភាព ក្នុងវិស័យទេសចរណ៍នៅកម្ពុជា។

ឯកឧត្តម ឆាយ ឃុនឡុង ​នាយកសាលាជាតិវិជ្ជាជីវៈទេសចរណ៍ ​ថ្លែងថា ការបើកការដ្ឋាន​សាងសង់​សាលាជាតិវិជ្ជាជីវៈទេសចរណ៍ ត្រូវបាន​ប្រារព្ធ​ រួមគ្នារួចហើយ ជាមួយនឹង​ការ​បើក​ការដ្ឋាន​សាងសង់​សាលាជាតិវិជ្ជាជីវៈទេសចរណ៍នៅរាជធានីភ្នំពេញ ​កាលពីពេលថ្មីៗនេះ ​ក្រោមអធិបតីភាពឯកឧត្តម ឧបនាយករដ្ឋមន្ត្រី ជា សុផារ៉ា​ រដ្ឋមន្ត្រីក្រសួងរៀបចំដែនដីនគរូបណីយកម្ម ​និងសំណង់ នៅរាជធានី​ភ្នំពេញ ​ក្នុងទំហំថវិកា​សាងសង់ ​ប្រមាណ ១២លានដុល្លាអាមេរិក ដោយក្នុងនោះ​សាលាជាតិវិជ្ជាជីវៈទេសចរណ៍​ខេត្តព្រះសីហនុ គ្រោងសាងសង់ក្នុងទំហំថវិកា​ប្រមាណ​ជាង​៣លានដុល្លាអាមេរិក។

ឯកឧត្តម ឆាយ ឃុនឡុង ថ្លែងថា ​នេះជាលើកដំបូងហើយ ដែលរាជរដ្ឋាភិបាលកម្ពុជា បានបង្កើត​ឲ្យមាន​សាលាជាតិវិជ្ជាជីវៈទេសចរណ៍នៅខេត្តព្រះសីហនុ ​និងនៅរាជធានីភ្នំពេញ ដើម្បីជម្រុញ​កូនខ្មែរដែលមានកម្រិតសិក្សាចាប់ពីថ្នាក់ទី៩ឡើងទៅ​ អាចចូលរៀន បង្កើតជំនាញផ្ទាល់ខ្លួន ដើម្បី​រកការងារ​និងបង្កើតមុខរបរករចំណូល ​ក្នុងវិស័យទេសចរណ៍​ ដែលមានការធនាផ្តល់សេវាកម្ម គុណភាព ​អនាម័យនិងភាពទាក់ទាញ។

ឯកឧត្តម ថោង ខុន រដ្ឋមន្ត្រីក្រសួងទេសចរណ៍ ថ្លែងបញ្ជាក់ថា ​សាលាជាតិវិជ្ជាជីវៈទេសចរណ៍សង់ នឹងផ្តល់ការ​បណ្តុះបណ្តាលជំនាញវិជ្ជាជីវៈទេសចរណ៍ចំនួន ​០៤ផ្នែក​ សំខាន់ៗរួមមាន៖ (១)ជំនាញ​ផ្នែកសេវាកម្មសណ្ឋាគារ និងសេវាកម្មស្នាក់នៅទេសចរណ៍ (២)ផ្នែកសេវាកម្មម្ហូបអាហារ និងភេសជ្ជៈ​ (៣)ផ្នែកសេវាកម្មធ្វើដំណើរ ​និង(៤)ផ្នែកសេវាកម្មទេសចរណ៍ និងផ្តល់​កម្រិត​គុណវុឌ្ឍវិជ្ជាជីវៈចាប់ពីវិញ្ញាបនបត្រកម្រិត១ ​ទៅកម្រិត៣ រៀនរយៈពេល១ឆ្នាំ និងឌីប្លូមកម្រិត​ខ្ពស់រៀនរយៈពេល២ឆ្នាំ​ ហើយសាលានេះក៏ជាមជ្ឈមណ្ឌលវាយតម្លៃស្របតាមស្តង់ដាជាតិ និងអាស៊ាន៕ អត្ថបទ ស៊ុម សុខជា