ភ្នំពេញ៖ ប្រជាពលរដ្ឋ និងសិស្សនិស្សិតខ្មែរ ដែលកំពុងរស់នៅតំបន់អឺរ៉ុប បានប្រកាសថា ពួក​គេ​បាន​ត្រៀមខ្លួ​នរួចរាល់ហើយ ក្នុងការទទួលស្វាមគមន៍ដំណើរទស្សនកិច្ចរបស់សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដើម្បីចូលរួមកិច្ចប្រជុំកិច្ចអាស៊ាន-សហភាពអឺរ៉ុប នាទី​ក្រុង​ព្រុចសែល ប្រទេសបែលហ្សិក នាពេលខាងមុខ ។

យោងតាមវីដេអូឃ្លីប ប្រជាពលរដ្ឋ បានលើកឡើងថា សម្ដេចតេជោ គឺ​ជា​វីរៈ​បុរស​សន្តិភាព​របស់​កម្ពុជា ហើយពួកគាត់មានសេចក្តីរីករាយ និងរំភើបជាខ្លាំងណាស់ ដែលសម្ដេច​នឹង​អញ្ជើញ​មក​ចូល​រួម​កិច្ច​ប្រជុំ​សហប្រតិបត្តិការ អាស៊ាន-អឺរ៉ុប ហើយនឹងទៅទទួលស្វាគមន៍សម្ដេច និង​គណៈ​ប្រតិភូ​កម្ពុជា​ ។

ពលរដ្ឋខ្មែររស់នៅតំបន់អឺរ៉ុប បានចាត់ទុកដំណើរទស្សនកិច្ច របស់សម្ដេចតេជោនេះ គឺ​ដើម្បី​បុព្វ​ហេតុ និងប្រកបដោយមោទនភាពដល់ប្រទេសជាតិ ហើយរំពឹងថា នឹង​ទទួល​បាន​នូវ​ប្រសាសន៍​សម្ដេច​ ប្រាប់ដល់ពួកគាត់ អំពីព្រឹត្តិការណ៍ និងសភាពការផ្សេងៗនៅកម្ពុជា ក្នុងពិធី​សំណេះ​សំណាល​ជា​មួយ​ពួក​គាត់ផងដែរ ។

យោងតាមសេចក្តីប្រកាសព័ត៌មាន របស់ក្រសួងការបរទេស និងសហប្រតិបត្តិការអន្តរជាតិ បាន​ឲ្យ​ដឹង​ថា សម្ដេចតេជោនាយករដ្ឋមន្ត្រី និងជាប្រធានអាស៊ានឆ្នាំ២០២២ នឹងដឹក​នាំគ​ណៈ​ប្រតិ​ភូ​ជាន់​ខ្ពស់ អញ្ជើញទៅចូលរួម និងធ្វើជាសហប្រធានកិច្ចប្រជុំកំពូលរំលឹកខួបអនុស្សាវរីយ៍ អាស៊ាន-សហភា​ព​អឺរ៉ុប ដើម្បីអបអរសាទរខួបលើកទី៤៥ នៃទំនាក់ទំនងដៃគូសន្ទនាអាស៊ាន-សហ​ភាព​អឺរ៉ុប ជាមួយឯកឧត្តម ឆាល មីសែល ប្រធានក្រុមប្រឹក្សាអឺរ៉ុប នៅថ្ងៃទី១៤ ខែធ្នូ ឆ្នាំ២០២២ នៅ​ទី​ក្រុង​ព្រុច​សែល ប្រទេសបែលហ្សិក ។ ក្នុងដំណើរទស្សនកិច្ចនេះ សម្ដេចតេជោ នឹងជួប​សំណេះ​សំណាល​ជា​មួយ​បងប្អូនជនរួមជាតិខ្មែរ ដែលកំពុងរស់នៅអឺរ៉ុបផងដែរ៕ អត្ថបទ៖ បាន សុខរិទ្ធិ