គុនចម្រុះ៖ អ្នកលេងគុនចម្រុះខ្មែរ-អាមេរិក អែម សុវណ្ណារី បានចូលរួមកម្មវិធីសប្បុរសធម៌ Race To Better Education ដើម្បីរ៉ៃអង្គាសប្រាក់ជួយដល់ការសិក្សារបស់កុមារកម្ពុជានៅអង្គការ Caring for Cambodia ស្របពេលនាងត្រូវខកខានឡើងសង្វៀន ONE ជាមួយកីឡាការិនីអាមេរិក Colbey Northcutt នាថ្ងៃទី២៨ ខែមេសាខាងមុខដោយសារបញ្ហារបួសស្មាអំឡុងពេលហ្វឹកហាត់កាលពីថ្មីៗ។
សុវណ្ណារី បានសម្ដែងការសប្បាយចិត្តជាខ្លាំង ចំពោះការចូលរួមកម្មវិធីសប្បុរសធម៌ ដើម្បីរួមចំណែកជួយកុមារនាប្រទេសកំណើតរបស់ឪពុកម្ដាយរបស់ខ្លួន។ កម្មវិធីនេះមានរយៈពេល ២៨ថ្ងៃ ហើយនាងបានដាក់គោលដៅត្រឹម ១៨០ដុល្លារប៉ុណ្ណោះសម្រាប់ការសិក្សារបស់កុមារម្នាក់ក្នុងរយៈពេល ១ឆ្នាំ។ ប៉ុន្តែជាលទ្ធផលលើសពីការរំពឹងទុក ត្រឹមរយៈពេលប៉ុន្មានថ្ងៃប៉ុណ្ណោះកីឡាការិនីវ័យ ២៧ឆ្នាំរូបនេះបានទទួលការបរិច្ចាគពីសប្បុរសជនរហូតដល់ ៣០៥ដុល្លារ។ សុវណ្ណារី មានអារម្មណ៍រំភើបរីករាយជាខ្លាំង ចំពោះការចូលរួមរបស់មនុស្សជុំវិញខ្លួន ដែលបានបរិច្ចាគជួយដល់កុមារកម្ពុជាតាមរយៈអង្គការ Caring for Cambodia និងផ្ដល់ការសិក្សាដ៏សមរម្យសម្រាប់ពួកគេ។ គួរដឹងថា អង្គការ Caring For Cambodia កំពុងជួយដល់កុមាររាប់ពាន់នាក់ឲ្យទទួលបានការអប់រំ ហើយពួកគេកំពុងទទួលបន្ទុកជួយកែប្រែប្រវត្តិសាស្ត្រដ៏រន្ធត់ និងជួយក្រុមគ្រួសារឲ្យកសាងជីវិតឡើងវិញ។
ក្នុងនាមជាសាលាគំរូសម្រាប់ក្រសួងអប់រំ យុវជន និងកីឡា អង្គការនេះបានផ្តល់ការបណ្តុះបណ្តាលគ្រូកម្រិតពិភពលោក ការអប់រំកុមារតូចៗ សមភាពយេនឌ័រ និងកម្មវិធីជាច្រើនទៀតផង។ តាមរយៈកម្មវិធីរ៉ៃអង្គាសនេះដែរគឺថវិកាចំនួន ១៨០ដុល្លារនឹងត្រូវផ្ដល់សម្រាប់ការសិក្សារបស់កុមារម្នាក់ក្នុងរយៈពេល ១ឆ្នាំ ក្នុងនោះ ៦០ដុល្លារសម្រាប់ទិញកង់ ១គ្រឿងដល់កុមារដែលអាចជិះទៅសាលារៀនបាន ហើយ ៣០ដុល្លារសម្រាប់អាហារ ៦ថ្ងៃក្នុងមួយសប្ដាហ៍ដល់កុមារម្នាក់ក្នុងរយៈពេល ១ឆ្នាំ និងថវិកា ១៥ដុល្លារទៀតសម្រាប់កញ្ចប់អនាម័យត្រីមាសដល់កុមារម្នាក់ក្នុងរយៈពេល ១ឆ្នាំ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
