ភ្នំពេញ៖ មន្ដ្រីជាន់ខ្ពស់ក្រសួងវប្បធម៌ ជំរុញឱ្យស្ថាប័នរដ្ឋ និងវិស័យឯកជន សហការ និងចូលរួម​ចំណែក​ដល់ការលើកកម្ពស់​ឧស្សាហកម្ម​ភាពយន្ត​កម្ពុជា ស្របតាមគោលនយោបាយជាតិ ​ស្ដីពីវិស័យវប្បធម៌​ ក្នុងការជំរុញកម្ពុជា ​ជាដែនដីស្វាគមន៍ នៃ​ការថតភាពយន្តជាតិ និងបរទេស។

ការថ្លែងរបស់ឯកឧត្តម ហាប់ ទូច រដ្ឋលេខាធិការក្រសួងវប្បធម៌ ​និងវិចិត្រសិល្បៈ ​​នៅក្នុងពិធីបិទ​មហោស្រពជាតិភាពយន្តខ្នាតខ្លីកម្ពុជា លើកទី៣ ឆ្នាំ២០២២ ក្រោមប្រធានបទ “ភាពយន្តខ្នាតខ្លី ជាជំហានឆ្ពោះទៅភាពយន្តខ្នាតវែង” នាល្ងាចថ្ងៃទី២០ ខែធ្នូ ឆ្នាំ២០២២។

ឯកឧត្តម បានបន្តទៀតថា ​ដូចដែលយើងបានដឹងហើយថា ​មហោស្រពភាពយន្តជាតិខ្នាតខ្លី មិនគ្រាន់​តែជា​វេទិកា ប្រកួតប្រជែងយកពានរង្វាន់នោះទេ ​ប៉ុន្តែក៏ជាទីកន្លែងជួបជុំសិក្សាស្វែងយល់ វាស់ស្ទង់​សមត្ថភាព ​និងចែករំលែក​បទ​ពិសោធន៍ ​និងចំណេះដឹង ដើម្បីឈានឆ្ពោះទៅការ​ផលិត​ភាព​យន្តខ្នាតវែង ប្រកបដោយគុណភាព។ ​មហោស្រពនេះ ​ក៏បានផ្ដល់ឱកាសឲ្យយុវជនយើង បានបញ្ចេញនូវទេពកោសល្យ និងសមត្ថភាព ​លើការផលិតស្នាដៃ​ភាពយន្តខ្នាតខ្លីរបស់ខ្លួន និង​ចូលរួមប្រកួតប្រជែងក្នុងកម្រិតថ្នាក់ជាតិ ​ក្នុង​គោល​បំណង​ពង្រឹង​នូវ​ធនធានមនុស្សថ្មីៗ​ក្នុង​វិស័យភាពយន្ត។ ជាក់ស្ដែង ​ពីមួយឆ្នាំទៅមួយឆ្នាំ ​មហោស្រពភាពយន្តខ្នាតខ្លីនេះ បាន​ក្លាយជា​ចំណុច ប្រសព្វយ៉ាងសំខាន់មួយ ​ដែលផ្សារភ្ជាប់យុវជនកម្ពុជា ​មកពីគ្រប់​មជ្ឈដ្ឋាន ដើម្បីធ្វើការ​ផ្លាស់ប្តូរ​យោបល់គ្នា​ ជាមួយនឹងការចែករំលែកនូវបទពិសោធន៍ថ្មីៗក្នុងវិស័យភាពយន្ត ហើយ​ក៏ជា​វេទិកាអប់រំ ​និងបំផុសទេព​កោសល្យ​ច្នៃប្រឌិត ​នៃការផលិតភាពយន្តខ្នាតខ្លីនៅកម្ពុជា។

បើតាមលោក ប៉ុក បូរក្ស ប្រធាននាយកដ្ឋានសិល្បភាពយន្ត ​និងផ្សព្វផ្សាយវប្បធម៌ និងជា​សមាជិកអចិន្ត្រៃយ៍គណៈកម្មការរៀបចំមហោស្រពភាពយន្តជាតិ​ ភាពយន្តខ្នាតខ្លីកម្ពុជា លើកទី៣ ឆ្នាំ២០២២ បានឲ្យដឹងថា មហោស្រពភាពយន្តបានបើកជាផ្លូវការ ​ចាប់ពីថ្ងៃទី១៦ ដល់ថ្ងៃទី១៩ ខែធ្នូ ឆ្នាំ២០២២ ​ស្នាដៃភាពយន្តខ្នាតខ្លីទាំង៣៥ស្នាដៃ ​នឹងស្នាដៃភាពយន្តឯកសារទាំង៣៣ស្នាដៃ បានបាក់​ជូនទស្សនាដោយសេរី ​នៅរោងភាពយន្តចំនួន ៨ទីតាំង​ ក្នុងរាជធានីភ្នំពេញ ដោយមាន​ទស្សនិកជនប្រមាណ​២៨០០នាក់ ​បានចូលទស្សនា និងបានបោះឆ្នោតជ្រើសរើសស្នា​ដៃភាពយន្ត​ដែល​ខ្លួនពេញចិត្តផងដែរ។ ​ជាក់ស្តែងខ្សែភាពយន្តដែលជាប់ជ័យលាភី នៃមហោស្រពភាពយន្តជាតិ ខ្នាតខ្លីកម្ពុជា លើកទី៣ ឆ្នាំ២០២២ គឺ លេខ០១ រឿង ជីវិត ស្នេហាសុខសាន្ត ​ទទួលបានពាន​រង្វាន់​មាស និងទឹកប្រាក់១២លានរៀល ​ឧបត្ថម្ភដោយ ​រោងភាពយន្ត មេជើ ស៊ីណេផ្លិច, ជ័យលាភីលេខ​០២ រឿង កី្តស្រលាញ់ដែលអ្នកផ្តល់ឲ្យ ​ទទួលបានពានរង្វាន់ប្រាក់​ និងទឹកប្រាក់៨លានរៀល ឧបត្ថម្ភ​ដោយ ក្រុមហ៊ុន ភេសជ្ជៈ ហនុមាន និងលេខ០៣ រឿង ក្តារចុច ​ទទួល​បាន​ពានរង្វាន់សំរឹទ្ធ និងទឹកប្រាក់៤លានរៀល ​ឧបត្ថម្ភដោយ ក្រុមហ៊ុន វេសថេច មេឌា៕អត្ថបទ រដ្ឋា