ភ្នំពេញ៖ ក្រសួងអប់រំ យុវជន និងកីឡា នឹងប្រកាសលទ្ធផលប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម័យប្រឡង ៥ធ្នូ ឆ្នាំ ២០២២ នៅរសៀលថ្ងៃទី២២ធ្នូស្អែកនេះ សម្រាប់ភូមិសាស្រ្តរាជធានីភ្នំពេញ និងខេត្តកណ្ដាល។ រីឯបណ្ដាខេត្តដទៃទៀត គឺនឹងប្រកាសលទ្ធផលនៅថ្ងៃទី ២៣ ខែធ្នូ។
ចំពោះការប្រកាសលទ្ធផលនេះ ក្រៅពីប្រកាសនៅតាមមណ្ឌលប្រឡង លទ្ធផលក៏នឹងមានការបង្ហាញផ្សព្វផ្សាយតាមប្រព័ន្ធហ្វេសប៊ុកផ្លូវការរបស់ក្រសួងអប់រំ យុវជន និងកីឡាផងដែរ។
ចំពោះការមកទទួលលទ្ធផលប្រឡងបាក់ឌុប ក្រសួងអប់រំ យុវជន និងកីឡា បានចេញក្ដីជូនដំណឹងដោយជម្រាបជូនប្រធានមន្ទីរអប់រំ រាជធានី-ខេត្ត មកទទួលយកលទ្ធផលប្រឡង នៅទីតាំងអាគាររដ្ឋបាល ចៅពញាហុក ដែលជាទីតាំងស្រង់ ផ្ទៀងផ្ទាត់ បូកពិន្ទុដោយកំព្យូរទ័រ។ ការមកទទួលលទ្ធផល គឺតម្រូវឱ្យមានការចាត់តាំងតំណាងដោយភ្ជាប់មកជាមួយនូវលិខិតឧទ្ទេសនាម ឱ្យមកទទួលយកបញ្ជីប្រកាសលទ្ធផលប្រឡងតាមមណ្ឌលសំណេរក្នុងរាជធានី ខេត្ត នៅបន្ទប់បូកសរុបរបាយការណ៍ អគាររដ្ឋបាល ចៅពញាហុក ជាន់ទី៥ ដើម្បីយកទៅបិទផ្សាយនៅតាមមណ្ឌលសំណេរនីមួយៗ តាមកាលបរិច្ឆេទ និងពេលវេលាកំណត់ខាងលើ។
ការបើកស្រោមបញ្ជីប្រកាសលទ្ធផលប្រឡង ត្រូវធ្វើតាមមណ្ឌលសំណេររៀងៗខ្លួន ដោយមានការចូលរួមពីនាយក នាយិកាគ្រឹះស្ថានសិក្សាដែលជាមណ្ឌលប្រឡង តំណាងការិយាល័យអប់រំ យុវជន និងកីឡា នៃរដ្ឋបាលក្រុង ស្រុក ខណ្ឌ ដែលមានមណ្ឌលប្រឡង និងតំណាងអាជ្ញាធរដែនដីផងដែរ។
គួរបញ្ជាក់ថា ការប្រឡងបាក់ឌុបសម័យប្រឡង ៥ធ្នូ ឆ្នាំ ២០២២នេះ គឺមានបេក្ខជនចុះឈ្មោះប្រឡងសរុប ១២៨ ១៣៤នាក់ និងមានការរៀបចំមណ្ឌលប្រឡងចំនួន ២២១មណ្ឌល ត្រូវជា ៥ ១៧៤បន្ទប់៕ អត្ថបទ៖ គឹមហុក
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
