សៀមរាប៖ នៅថ្ងៃទី២២ខែធ្នូនេះ គឺជាថ្ងៃទី៤ នៃកម្មវិធីបោះជំរំយុវជនជាសាកលលើកទី៨ ឆ្នាំ២០២២ ដែលមានយុវជនជាង ១០០នាក់ ចុះសិក្សាស្វែងយល់តម្លៃសម្បត្តិបេតិកភណ្ឌខ្មែរ៖ ដំណើររុករកក្នុងតំបន់អង្គរ។

បើតាមលោក ស៊ីវ ឧត្តម គណៈកម្មការទទួលបន្ទុកបច្ចេកទេសរួមនៃការបោះជំរំយុវជន បានប្រាប់​BTVថា កានាំយុវជនបោះជំរំ មកកាន់តំបន់អង្គរក្នុងថ្ងៃនេះ គឺយើងបានរៀបចំ​បែងចែក​យុវជនជា​៨ក្រុម ដោយមានអ្នកជំនាញណែនាំពីតំបន់ប្រាសាទអង្គរ ​និងដាក់​វិញ្ញាសារ​ដល់យុវជន​សិក្សាស្រាវជ្រាវជាដើម។

ការរបោះជំរំយុវជនជាសាកលលើកទី៨ ឆ្នាំ២០២២ ចាប់ផ្តើមពីថ្ងៃទី១៩ ដល់ថ្ងៃទី២៤​ ខែធ្នូនេះ ធ្វើឡើង​ក្រោមប្រធានបទ ការអភិវឌ្ឍយុវជនក្នុងសង្គមឌីជីថល៖ តារារះនាទិសឧត្តរ ដោយមានការ​ចូលរួមយុវជន សរុប ១៨៣នាក់ ក្នុងនោះយុវជនជាប្រតិភូចំនួន ​​១៥៣នាក់ (ស្រី ៧០%) យុវជន​ស្ម័គ្រចិត្ត ៣០នាក់ និងមន្រ្តី​សម្របសម្រួល និង ថ្នាក់ដឹកនាំអគ្គនាយកដ្ឋានយុវជន ៥០រូប។ យុវជនជាប្រតិភូ ១៥៣នាក់ ​ត្រូវបានជ្រើសរើស​ ជាតំណាងមកពីគ្រប់រាជធានី ខេត្ត និងមកពី កាកបាទ​ក្រហមកម្ពុជា ​កាយរឹទ្ធិ​ជាតិកម្ពុជា ​សហភាពសហព័ន្ធ យុវជន កម្ពុជា វិទ្យាស្ថានជាតិអប់រំ​កាយនិងកីឡា យុវជនមូស្លីម មជ្ឈមណ្ឌលជាតិ​ យុវជនកម្ពុជា​ និង ក្រុមយុវជន ជ័យលាភីកម្មវិធីនានា​របស់អគ្គនាយកដ្ឋានយុវជន។

កម្មវិធីបោះជំរំលើកនេះ ​មានសកម្មភាព​ និងគោលបំណង​ សំខាន់មួយចំនួនដូចជា​អភិវឌ្ឍន៍​សមត្ថភាព និងបណ្តុះបណ្តាល​យុវជនលើជំនាញ​បច្ចេកវិទ្យាព័ត៌មាន ​និងឌីជីថល ដើម្បីឆ្លើយតបទៅ​នឹងយុទ្ធសាស្ត្រ ​កំណែ​ទម្រង់វិស័យអប់រំបែបឌីជីថល ​ក្រោមក្របខណ្ឌ​នៃគោល​នយោបាយ រដ្ឋាភិបាល​ឌីជីថលកម្ពុជា (២០២២-២០៣៥)។

ការបោះជំរំយុវជនជាសាកល​ គឺជា​គំនិត​ផ្តួចផ្តើម​ដ៏ខ្ពង់ខ្ពស់របស់​សម្តេចអគ្គមហាសេនាបតីតេជោ ហ៊ុន សែន​ នាយករដ្ឋមន្រ្តី នៃព្រះរាជាណាចក្រកម្ពុជា ​ក្រោមការ​ជួយ​ឧបត្ថម្ភ​គាំទ្រពី អ្នក​ឧកញ៉ាកិត្តិបណ្ឌិត​ ពុង ឃាវសែ ​ប្រធានក្រុមប្រឹក្សាភិបាល​នៃធនាគាកាណាឌីយ៉ា ហើយបាន​ចាប់ផ្តើមជាលើកដំបូងនៅឆ្នាំ២០១០មកម្ល៉េះ៕ អត្ថបទ៖ទូច សោភ័ណ