​បាល់ទាត់៖ ​ក្រុម​កំពូល​តារាង​នៅ​ក្របខណ្ឌ​អាល្លឺម៉ង់ Bundesliga, Bayern Munich បាន​យកឈ្នះ​ក្រុម​ភ្ញៀវ Bayer Leverkusen ២-០ យប់មិញ​នេះ​ដែល​មានន័យថា​ ពួកគេ​ត្រូវការ​ឈ្នះ​តែ ១ប្រកួត​ទៀត​ប៉ុណ្ណោះ​ដើម្បី​គ្រង​ជើងឯក​។

​​អតីត​ខ្សែប្រយុទ្ធ Stoke City, Eric Maxim Coupo-Moting​ បាន​បន្ត​រកបាន​គ្រាប់​បាល់​ទៀត​នៅ​នាទី​ទី៧​។ Choupo-Moting​ នៅពេលនេះ​រកបាន ៣គ្រាប់​ហើយ​ក្នុង ៣​ប្រកួត​ចុងក្រោយ បន្ទាប់ពី​អវត្តមាន​ខ្សែប្រយុទ្ធ​ជួរមុខ Robert Lewandowski​។ ​ខ្សែបំរើ​អាល្លឺម៉ង់ Joshua Kimmich ​ក៏​រកបាន​គ្រាប់​នាំមុខ ២-០ នៅ​នាទី​ទី១៣ ហើយ ២-០ នេះ​ក៏​រក្សា​ដល់​ចប់​ការប្រកួត​។ ​ជ័យជំនះ​នេះ​ធ្វើអោយ Bayern Munich ឡើង​នាំ​មុខដាច់​ក្រុម​លេខ២ RB Leipzig ដល់​ទៅ ១០ពិន្ទុ​នៅសល់តែ ៤ប្រកួត​ទៀត​ចប់​រដូវ​កាល​។

​​Bayern Munich នឹង​អាច​ក្លាយជា​ជើងឯក​តែម្តង​ប្រសិន​យកឈ្នះ Mainz នៅ​ថ្ងៃ​សៅរ៍​នេះ ដែល​មាន​ន័យ​ថា​ លោក Hansi Flick នឹង​ឈ្នះ​ពាន​ទី៧ ក្នុង​អាជីព​របស់​ខ្លួន​មុន​ពេល​ចាកចេញ​នៅ​ដំណាច់​រដូវ​កាល​នេះ​។​ ​​រីឯ​មួយ​ប្រកួត​ទៀត Schalke 04 នឹង​ត្រូវ​កាត​ចេញពី​ក្របខណ្ឌ​កំពូល Bundesliga ហើយ​ក្រោយ​បរាជ័យ​នៅ​ទឹកដី Armenia Bielefeld ១-០​។ ​លេង​បាន ៣០ប្រកួត​រដូវ​កាល​នេះ Schalke​ រក​បាន​តែ ១៣ពិន្ទុ​ប៉ុណ្ណោះ​។ ​Schalke​ ត្រូវ​ធ្លាក់​ទៅ​ក្រប​ខណ្ឌ​ទី២ Bundesliga 2 ជា​លើកដំបូង​រាប់​ពី​ឆ្នាំ១៩៨៨៕

​អត្ថបទ​៖​នាង សុភា​វុ​ធ