ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានមានប្រសាសន៍ថា ការបណ្ដុះបណ្ដាល និងការ​ហ្វឹកហាត់​ដល់កងកម្លាំង​នគរបាលជាតិ គឺជាការ​ចាំបាច់ ត្រូវធ្វើឱ្យជាប់ជាប្រចាំ ​និងគ្មានទីបញ្ចប់ ​ព្រោះថា ​សភាពការណ៍បច្ចុប្បន្នកំពុងមាន​ការ​ប្រែប្រួល ប៉ុន្តែការជ្រើសរើសថ្មីនេះ ក៏ដើម្បីជំនួសអ្នកចាស់​ដែលបាន​ចូលនិវត្តន៍​ និងបាត់បងជីវិត​ផងដែរ។

នាឱកាសអញ្ជើញជាអធិបតីក្នុងពិធីបិទវគ្គ​សុក្រឹត​ការថ្នាក់ដឹកនាំនគរបាល កម្រិត១ និងកម្រិត២ ជំនាន់ទី២ នៅបណ្ឌិត្យសភានគរបាលកម្ពុជា​ ស្ថិតនៅស្រុកកៀនស្វាយ ​ខេត្តកណ្ដាល ​នាថ្ងៃទី២៧ ខែធ្នូ ឆ្នាំ២០២២ សម្ដេចក្រឡាហោម ស ខេង បានឱ្យដឹងថា ​ក្រសួងមហាផ្ទៃ កំពុងបន្ដអនុវត្តយ៉ាង​ម៉ឺងម៉ាត់​ចំពោះការអភិវឌ្ឍ​ធនធានមនុស្ស ដើម្បីពង្រឹងសមត្ថភាព​ និងលើកកម្ពស់ក្រមសីលធម៌ វិជ្ជាជីវៈរបស់កងកម្លាំងនគរបាលជាតិ។

សម្ដេចក្រឡាហោម មានប្រសាសន៍ថា “ការបណ្ដុះបណ្ដាល និងការ​ហ្វឹកហាត់​ដល់កងកម្លាំង​នគរបាលជាតិ ​គឺជាការចាំបាច់ ​ជាដាច់ខាត ហើយត្រូវធ្វើជាប់ជាប្រចាំ ​និងគ្មានទីបញ្ចប់ ហើយ​ត្រូវចាត់​ទុកការបណ្ដុះបណ្ដាល និងការ​ហ្វឹកហាត់​ដល់មន្ដ្រីនគរបាល​ គឺជាការងារចាំបាច់ ដោយ​មិនអាចខ្វះបាន”។

ជាមួយគ្នានោះដែរ សម្ដេចក្រឡាហោម បានឱ្យដឹងទៀតថា ​ស្ថានការណ៍នាពេលបច្ចុប្បន្ននេះ មាន​ការ​ផ្លាស់ប្ដូរ ​ដូចជាបទល្មើសបច្ចេកទេសជាដើម បើធ្វើមិនទាន់នោះទេ នឹង​ប៉ះពាល់​ដល់​សន្ដិសុខ​ជាតិ ដូច្នេះចាំបាច់បំផុត ត្រូវបណ្ដុះបណ្ដាលមន្ដ្រីនគរបាលជាតិ ឱ្យបានជាប់ជាប្រចាំ។

សម្ដេច ​បានបន្ដថា​ ការបណ្ដុះបណ្ដាលមន្ដ្រី​នគរបាលនេះ ​ក្នុងគោល​ដៅ​កសាងពង្រឹង​សមត្ថភាព​ដល់មន្ដ្រីនគរបាលគ្រប់រូប ​ឱ្យមានចំណេះដឹងគ្រប់គ្រាន់​ ក្នុងការពេញបំពេញ​តួនាទីភារៈកិច្ច ឱ្យ​ទទួល​បានជោគជ័យគ្រប់កាលៈទេសៈ។

សម្ដេចក្រឡាហោម ឧបនាយករដ្ឋមន្ដ្រី រដ្ឋមន្ត្រីក្រសួងមហាផ្ទៃ ​ក៏បានលើកឡើងផងដែរថា ដំណាក់​កាលបច្ចេកវិទ្យានេះ​ ក្រសួងមហាផ្ទៃ ​ក៏ត្រូវធានា ​ដើម្បីគ្រប់គ្រង​សភាពការណ៍ ទន្ទឹង​នឹងនេះ ​កងកម្លាំងនគរបាលជាតិគ្រប់រូប ​ត្រូវគោរពវិន័យ​ឱ្យបានម៉ឺងម៉ាត់ ​ដោយមានសីលធម៌ល្អ គុណធម៌ល្អ ​ទើបប្រតិបត្តិការបំពេញ​ការងារ​ប្រកម​ដោយវីជ្ជាជីវៈផងដែរ៕អត្ថបទ៖ បាន ចក់