​ភ្នំពេញ៖ ឯកឧត្តម ព្រុំ សុខា រដ្ឋមន្រ្តីក្រសួងមុខងារសាធារណៈ នៅរសៀលថ្ងៃទី២៨ ខែធ្នូនេះ បាន​អញ្ជើញ​ចូលរួម​ជា​អធិបតី​ភាពក្នុងកម្មវិធីដាក់ឱ្យប្រើប្រាស់ជាផ្លូវការនូវការប្រើប្រាស់អត្តសញ្ញាណបណ្ណមន្រ្តីរាជការស៊ីវិលប្រភេទថ្មី។ ពិធីនេះ ធ្វើឡើងនៅសណ្ឋាគារកាំបូឌីយ៉ាណា រាជធានីភ្នំពេញ ដោយមានការចូ លរួមពីមន្រ្តីស្ថាប័នពាក់ព័ន្ធផ្សេងៗ និង​ដៃគូសហការណ៍ធនាគារចំនួន៣រួមមាន៖ធនាគារកាណាឌីយ៉ា ធនាគារវីង និងធនាគាអេស៊ីលីដា។​

នៅក្នុងឱកាសនោះ ឯកឧត្តមព្រំ សុខា បានថ្លែងថា អត្តសញ្ញាណប័ណ្ណគំរូថ្មីប្រភេទឌីជីថលនេះ គឺអាច យក​ទៅ​ប្រើ​ប្រាស់​ជា​ប័ណ្ណសម្គាល់ខ្លួនផង ជាប័ណ្ណអេធីអឹម (ATM) និងអាចប្រើប្រាស់ជាមធ្យោបាយផ្សេងៗទៀត។ ឯកឧត្តម​បន្តថា ជាជំហានដំបូងការផ្តល់កាតគំរូថ្មីនេះ ធ្វើឡើងនៅថ្នាក់ជាតិ ហើយថ្នាក់ក្រោមជាតិនឹងធ្វើឡើងជាបន្តបន្ទាប់។

​​លោកឧកញ៉ា វ៉ាន់ ឆារស៍ អគ្គនាយរងធនាគារកាណាឌីយ៉ា បានមានប្រសាសន៍ដែរ ធនាគារកាណាឌីយ៉ា ក្នុង​នាម​ធនាគារ​ដ៏ធំ ដែលមានបទពិសោធន៍ជាច្រើនឆ្នាំ ទទួលបានពានរង្វាន់ពីស្ថាប័នអន្តរជាតិជាច្រើន ហើយធនាគារ​តែង​តែ​មានកិច្ចសហប្រតិបត្តិការយ៉ាងជិតស្និតជាមួយរាជរដ្ឋាភិបាល ដើម្បីចូ លរួមចំណែកអភិវឌ្ឍប្រទេស និង​សង្គម​ជាតិ។

របាយការណ៍របស់ក្រសួងមុខងារសាធារណៈបានឱ្យដឹងថា គិតត្រឹមថ្ងៃទី២៨ ខែធ្នូ ឆ្នាំ២០២២ មានក្រសួងស្ថាប័ន​សរុប​ចំនួន១៧ ដែលមានមន្រ្តីសរុបជិត ២ពាន់នាក់ បានផ្ញើរទិន្នន័យដើម្បីស្នើសុំអត្តសញ្ញាណបណ្ណមន្ត្រីរាជការ ក្នុងនោះ ប័ណ្ណចំនួន ៤៩៧សន្លឹក សម្រាប់ក្រសួង១១ ត្រូវបានបោះពុម្ភរួចដោយធនាគារដៃគូទាំង៣ ដែលផ្តល់ជូន​នៅ​ថ្ងៃនេះ៕​ អត្ថបទ៖ ទូច សោភ័ណ