​បាល់ទាត់៖ ប្រធាន FIFA លោក Gianni Infantino និង​ប្រធាន​សហព័ន្ធ​បាល់ទាត់​អាមេរិក​ឡាទីន CONMEBOL លោក Alejandro Dominguez បាន​ជួប​ពិភាក្សា​គ្នា​ មុន​ចូលរួម​ពិធីបុណ្យ​សព​វីរ​បុរស​បាល់ទាត់​ប្រេ​ស៊ី​ល​នៅ​ថ្ងៃ​ចន្ទ​ម្សិលមិញ​។

​​លោក Gianni Infantino បាន​និយាយប្រាប់​អ្នកសារព័ត៌មាន​ថា ពួកយើង​នាំគ្នា​កាន់ទុក្ខ​មរណភាព​លោក Pele លោក​ចង់​ស្នើឱ្យ​គ្រប់​សហព័ន្ធ​បាល់ទាត់​ទាំងអស់​ មានការ​គោរព​វិញ្ញាណក្ខន្ធ​មួយ​នាទី​មុន​ការប្រកួត​របស់​ពួកគេ ហើយ​លោក​ក៏​នឹង​ស្នើសុំ​គ្រប់​ប្រទេស​ទាំង ២១១ គួរតែ​ដាក់ឈ្មោះ​កីឡដ្ឋាន​ណាមួយ​របស់​ពួកគេ​តាម​ឈ្មោះ​លោក Pele​។ មនុស្ស​រាប់ពាន់​នាក់​បាន​ជួបជុំគ្នា​នៅ​កីឡដ្ឋាន Vila Belmiro នៅ​ទីក្រុង Santos ដែល​ជា​ស្រុកកំណើត​របស់​លោក Pele​។ ​មឈូស​ដាក់​សាក​សព​លោក Pele ត្រូវ​បាន​គេ​តម្កល់​នៅ​កណ្ដាល​ទីលាន​បាល់ទាត់​នៃ​កីឡដ្ឋាន​របស់​ក្លិប ​Santos ដែល​ជា​ក្លិប​លោក Pele ចំណាយ​ពេល​ក្នុង​អាជីព​បាល់ទាត់របស់​គាត់ចាប់​ពី​ឆ្នាំ​១៩៥៦ ដល់ ១៩៧៤​។

​​វីរ​បុស​ប្រេ​ស៊ី​ល​លោក Pele ដែល​បាន​ទទួល​មរណភាព​ក្នុង​វ័យ ៨២​ឆ្នាំ​កាលពី​យប់​ថ្ងៃ​ព្រហស្បតិ៍​សប្តាហ៍​មុន ត្រូវ​បាន​គេ​ចាត់ទុកថា​ជា​កំពូល​កីឡាករ​បាល់ទាត់​នៅក្នុង​ប្រវត្តិសាស្ត្រ​បាល់ទាត់​។​ ​​លោក Pele បាន​ស៊ុត​បញ្ចូល​ទី​សរុប ១២៨១គ្រាប់ ក្នុងការ​បង្ហាញខ្លួន ១៣៦៣ប្រកួត​កាន់​កំណត់ត្រា​ពិភពលោក និង​ឈ្នះ​ពាន​សំខាន់ៗ​ជាច្រើន​ក្នុង​អាជីព ២១ឆ្នាំ​ជា​កីឡាករ​បាល់ទាត់​។​ ​​ស្នាដៃ​ដែល​មិនអាច​បំភ្លេចបាន​នៅក្នុង​ប្រវត្តិសាស្ត្រ​បាល់ទាត់​របស់លោក Pele នោះ​គឺ​លោក​បាន​ជួយ​ក្រុម​ជម្រើសជាតិ​ប្រេ​ស៊ី​ល​ឈ្នះ​ពាន​ជើងឯក​ពិភពលោក ៣លើក​នៅ​ឆ្នាំ១៩៥៨ ១៩៦២ និង ១៩៧០៕

​អត្ថបទ​៖​នាង សុភា​វុ​ធ