កំពង់ឆ្នាំង៖ ក្នុងពេលជួបជាមួយអាជ្ញាធរស្រុកបរិបូណ៌ ខេត្តកំពង់ឆ្នាំង នារសៀលថ្ងៃទី០៥ ខែមករា ឆ្នាំ២០២៣នេះ ប្រជាពលរដ្ឋ ទាំង៧៣ គ្រួសារ ដែលកំពុងរស់នៅក្នុងដីតំបន់៣ចំណុចជ្រោយស្លែង ស្ថិតក្នុងឃុំត្រពាំងចាន់ ស្រុកបរិបូណ៌ បានស្ម័គចិត្តចាកចេញមក រស់នៅលើ ទីតាំងដីខាងលើដែលអាជ្ញាធរស្រុកបានកំណត់ជូនវិញ ។ ទីតាំងដីថ្មីនោះស្ថិតក្នុងឃុំត្រពាំងចាន់ ស្រុកបរិបូណ៌ដូចគ្នា ប៉ុន្តែជាដីដែល អាចចេញប័ណ្ណកម្មសិទ្ធិជូន សំរាប់រស់នៅតកូន តចៅទៅអនាគតបាន និងមានទឹកស្អាត ភ្លើង និងផ្លូវធ្វើដំណើរស្រួល។

 ប្រជាពលរដ្ឋបានសំដែងនូវចិត្តត្រេកអរ ដែលអាជ្ញាធរស្រុកខេត្ត បានរកដីអោយពួកគាត់រស់នៅស្របច្បាប់ និងចេញប័ណ្ណកម្មសិទ្ធិ ជូនទៀត។ ពួកគាត់បានបន្តថា នៅចំណុចជ្រោយស្លែងនេះ ពិបាករស់នៅណាស់ ដោយមិនមានផ្លូវធ្វើដំណើរបានស្រួលនោះទេ ចំណែកទឹកស្អាត និងភ្លើង គឺពុំមានទាលើតែសោះ។ ដោយឡែកកូនចៅទៅរៀននៅសាលា បានតិចតួចបំផុត ដោយសារឆ្ងាយ ពៅសាលារៀន។ ពួកគាត់មិនចង់អោយកូនៗរបស់ពួកគាត់ អវិជ្ជាដូចគាត់ទៀតឡើយ ដូចនេះពួកគាត់ព្រមទៅរស់នៅទីតាំងដីថ្មី តែសុំអោយមានទីតាំងដីដាក់សំរាម និងទីតាំងដីសាលាបុណ្យមួយផង។

លោក ចេង ចាន់ដូណា អភិបាលស្រុកបរិបូណ៌បានអោយដឹងថា៖ តបតាមការណែនាំរបស់ឯកឧត្តម ជា សុផារ៉ា រដ្ឋមន្ត្រីក្រសួងដែនដី នគរូបនីយកម្ម សំណង់ និងសុរិយោដី និងឯកឧត្តម ស៊ុន សុវណ្ណារិទ្ធិ អភិបាលខេត្ត បានអោយប្រជាពលរដ្ឋនៅចំណុចជ្រោយស្លែង ឃុំត្រពាំងចាន់ ស្រុកបរិបូណ៌ ត្រូវផ្លាស់ទីកន្លែងរស់នៅបច្ចុប្បន្ន មករស់នៅកន្លែងថ្មីដែលមានទឹក ផ្លូវ ភ្លើងវិញ ដែលទីតាំងថ្មីនោះ នៅជិតសាលារៀន មណ្ឌលសុខភាព និងងាយស្រួលអាជ្ញាធរគ្រប់គ្រងផងដែរ។ ចំណែកចំណុចជ្រោយស្លែង គឺជាតំបន់៣ ដែលជាជម្រកត្រីពងកូន និងជាទីតាំងដាច់ស្រយាលផងដែរ។

ប្រជាពលរដ្ឋដែលរស់នៅចំណុចជ្រោយស្លែងនេះ គឺជាចំណុចមួយដែលប្រជានេសាទទាំងអស់នាំគ្នាមកបោះទីតាំងរស់នៅ ដើម្បីរកត្រីលក់ចិញ្ចឹមជីវិត។ ដីថ្មីដែលអាជ្ញាធរស្រុកគ្រោងផ្តល់ជូនពួកគាត់នោះ គឺក្នុង១គ្រួសារទទួលបានទទឹង១២ម៉ែត្រ និងបណ្តោយប្រវែង១០០ម៉ែត្រស្មើៗគ្នា ហើយពួកគាត់អាចរស់នៅជិតជាមួយអ្នកឃុំត្រពាំងចាន់ផងដែរ៕ ដោយ ៖ ហុង វាស្នា