ភ្នំពេញ៖ ស្ទើជាទម្លាប់រៀងរាល់ឆ្នាំទៅហើយ ដែលបេក្ខជន​ប្រឡង​ធ្លាក់​សញ្ញា​បត្រ​មធ្យម​សិក្សា​ទុតិយភូមិ (បាក់ឌុប) តែងតែបង្ហាញអារម្មណ៍មិនអស់ចិត្ត និងអស់សង្ឃឹម។ ប៉ុន្ដែ​ក​ត្តា​នេះ​ត្រូវ​បាន​មន្រ្ដី​ជំនាញ នៃក្រសួងអប់រំ យុវជន និងកីឡា បានណែនាំបេក្ខជនទាំងនោះ មិន​ត្រូវ​អស់​សង្ឃឹម​ឡើយ​ហើយ​ត្រូវ​បែរ​មក​ចាប់​យក​ឱកាស​រៀន​ជំនាញ​វិជ្ជាជីវៈ ឬ​រៀន​បរិញ្ញាបត្រ​រង​ដោយ​ប្រើ​រយៈ​ពេល​ខ្លីឆាប់ទទួលបានការងារធ្វើ។

តាមរយៈកិច្ចសម្ភាសន៍ជាមួយ BTV លោក គង់ ភូមីកា ប្រធាន​នាយកដ្ឋាន​ឧត្តម​សិក្សានៃ​ក្រសួង​អប់រំ យុវជន និងកីឡា មានប្រសាសន៍ថា វិធីសម្រាប់​ឱ្យ​យុវជន​ដែល​ប្រឡង​ធ្លាក់​អាច​បន្ត​ដំណើរ​របស់​ខ្លួន​ទៅមុខទៀតបានមាន ៣ ចំណុចសំខាន់ៗ គឺ ទី១ បន្តការសិក្សាម្ដងទៀត ទី២ បន្តរៀន​បរិញ្ញាបត្រ​រង និងទី៣ បន្ដរៀនជំនាញវិជ្ជាជីវៈ។ ប៉ុន្ដែក្នុងចំណោមចំណុចសំខាន់ទាំងនេះ មន្រ្ដី​ជំនាញ​លើក​ទឹកចិត្ត​ដល់​សិស្ស​ឱ្យ​បន្ត​រៀន​បរិញ្ញាបត្ររង ឬ​ជំនាញ​វិជ្ជាជីវៈ​ ដើម្បី​កុំ​ឱ្យ​ខាត​ពេល​វេលា​រៀន​សារឡើងវិញ។

លោក គង់ ភូមីកា បានថ្លែងថា «អ៊ីចឹង នៅចំណុចសិស្សប្រឡងធ្លាក់នេះ លោក​គ្រូ​ចង់​លើក​ទឹក​ចិត្ត​ប្អូន ដើម្បី​ធ្វើការសម្រេចចិត្តឱ្យត្រូវ។ ប្អូននៅ​វ័យ​ក្មេង​ប្អូន​អត់​ទាន់​យល់​ថា​ពេល​វេលា​ សម្រាប់​ការ​រស់​នៅ​របស់​មនុស្សយើងមានសារៈសំខាន់​បែបណាទេ។ ដូច្នេះ​លោក​គ្រូ​អត់​ចង់​ឱ្យ​ប្អូន​ខាត​ពេល​ទេ គឺ​គ្រូ​លើក​ទឹក​ចិត្តឱ្យបែរមករៀនជំនាញវិជ្ជាជីវៈ ឬរៀនបរិញ្ញាបត្ររងវិញ»។

គួរបញ្ជាក់ថា ក្រោមម្លប់សន្តិភាព នៃការដឹកនាំដោយសម្ដេចតេជោ ហ៊ុន សែន នាយករដ្ឋមន្រ្ដី នៃ​កម្ពុជា បានដាក់ចេញនូវយុទ្ធសាស្រ្ដចតុកោណ និង​បាន​ផ្ដោត​សំខាន់​លើ​ការ​បណ្ដុះ​បណ្ដាល​ធន​ធាន​មនុស្ស។ តាមរយៈយុទ្ធសាស្រ្ដនេះ រាជរដ្ឋាភិបាលដោយមានក្រសួងអប់រំ យុវជន និងកីឡា ក្រសួង​ការងារ និងបណ្ដុះបណ្ដាលវីជ្ជាជីវៈ ក្រសួងទេសចរណ៍ និងក្រសួងពាក់ព័ន្ធជាច្រើនទៀត បាន​បង្កើត​នូវ​មជ្ឈ​មណ្ឌល​បណ្ដុះ​បណ្ដាលវិជ្ជាជីវៈ សាលាវិជ្ជាជីវៈ ជាដើម​ ដើម្បី​បណ្ដុះ​បណ្ដាល​ជំនាញ​ដល់​យុវជន​ដែល​មិន​បាន​រៀន​រហូត​បញ្ចប់កម្រិតសិក្សា។ ការសិក្សា​ជំនាញ​នេះ​យុវជន​គ្រាន់​តែ​ប្រើ​រយៈពេលខ្លី​អាចទទួលបានជំនាញច្បាស់លាស់ និងការងារធ្វើតែម្ដង៕ អត្ថបទ៖ វ៉ន ដារ៉ា