ពោធិ៍សាត់៖ ឯកឧត្តមកត្តិសង្គហបណ្ឌិត គន់ គីម ទេសរដ្ឋមន្ត្រីទទួលបន្ទុកកិច្ចការអតីតយុទ្ធជន និង​ជនពិការ ជាអនុប្រធានទី១ គណៈកម្មាធិកាជាតិគ្រប់គ្រងគ្រោះមហន្តរាយ និងឯកឧត្តម ខូយ រីដា អភិបាល នៃគណៈអភិបាលខេត្តពោធិ៍សាត់ និងមន្រ្តីពាក់ព័ន្ធមួយចំនួនទៀត នាថ្ងៃទី៦ ខែមករា ឆ្នាំ២០២២នេះ បានចុះពិនិត្យទីតាំងច្រាំងស្ទឹងពោធិ៍សាត់ ដែលបាក់​ស្រុត​នា​រដូវ​វស្សា​កន្លង​មក ដើម្បីធ្វើការស្ដារឡើងវិញ បន្ទាប់ពីការស្នើសុំរបស់រដ្ឋបាលខេត្ត។

បើតាម​រដ្ឋបាលខេត្តពោធិ៍សាត់ កាលពីព្រលប់ថ្ងៃទី១ ខែវិច្ឆិកា ឆ្នាំ២០២២កន្លងទៅ មាន​ករណី​បាក់​ស្រុត​ដី និងតូបលក់ចាប់ហួយ របស់អាជីវករឈ្មោះ គឹម ឈុនហ៊ួយ ដែលរស់​នៅ​តាម​ច្រាំង​ស្ទឹង​ពោធិ៍សាត់ ស្ថិតក្នុងភូមិស្វាយលួង ឃុំស្វាយលួង ស្រុកកណ្តៀង ខេត្តពោធិ៍សាត់ តែ​ពុំ​មាន​នរណា​ម្នាក់​បាត់បង់ជីវិតនោះទេ។

របាលខេត្តបានឱ្យដឹងថា តាមការប៉ាន់ប្រម៉ាន អីវ៉ាន់នៅក្នុងតូប ដែលក្រុមការងារ​អាច​ជួយ​សង្គ្រោះ​បាន មានប្រមាណ៧០% ដែលក្នុងនោះរួមមាន៖ ស្រាបៀរកំប៉ុង ដប ទឹកក្រូច ភេសជ្ជៈ នំ ចានស្នោរ…។ល។ រួមទាំងចានឆ្នាំង និងរបស់ក្លាស្សេង បាត់បង់ខ្លះ និង​នៅ​សេស​សល់​មួយ​ចំនួន​។ ចំពោះករណីនេះ អាជ្ញាធរមានសមត្ថកិច្ចបានអះអាងថា មកពី​ម្ចាស់​តូប​មិន​សហការ​ចូល​រួម តាមរយៈការជូនដំណឹងរបស់អាជ្ញាធរឃុំ ទាក់ទងនឹងស្ថានភាពបាក់ច្រាំងគួរឱ្យព្រួយបារម្មណ៍ កាល​ពី​ថ្ងៃទី២០ ខែតុលា ឆ្នាំ២០២២៕ អត្ថបទ៖ វ៉ន ដារ៉ា