បាត់ដំបង៖ ឯកឧត្ដម នាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍ និងជាប្រធានក្រុមការងាររាជរដ្ឋាភិបាលចុះមូលដ្ឋានឃុំស្នឹង បានអញ្ជើញចុះត្រួតពិនិត្យ គម្រោងជួសជុលផ្លូវ និងដាក់លូក្នុងមូលដ្ឋានឃុំស្នឹង ស្រុកបាណន់ ខេត្តបាត់ដំបងកាលពីរសៀលថ្ងៃទី៦ខែមករាឆ្នាំ២០២៣។
ក្នុងដំណើរចុះត្រួតពិនិត្យនេះ នាយឧត្តមសេនីយ៍ គៀត ច័ន្ទថារិទ្ធ បានដឹកនាំប្រតិភូ និងក្រុមការងារចុះត្រួតពិនិត្យផ្លូវដីចំណុចព្រៃកញ្ជ្រូកភូមិពាក់ស្បែកមួយខ្សែប្រវែង ២០០.៤០០ម៉ែត្រ និងអញ្ជើញចូលរួមពិធីសំណេះសំណាល និងបើកការដ្ឋានសាងសង់លូរំដោះទឹកនិងជួសជុលផ្លូវចំណុចទម្លាប់ទៅភ្នំពង់ភូមិបឹងក្រសាលមួយខ្សែប្រវែង ១.២០០ ម៉ែត្រ ដាក់លូរំដោះទឹកមួយកន្លែងមុខកាត់១.២ម៉ែត្រដាក់៣ជួរ។
ឯកឧត្តមក៏បានអញ្ជើញចុះត្រួតពិនិត្យផ្លូវដែលខូចខាតដោយសារទឹកជំនន់ ដែលបណ្ដាលឲ្យពិបាកក្នុងការធ្វើដំណើរចំណុចសម្ព័រទៅថ្មពេជ្រ ភូមិបឹងក្រសាល។
ឯកឧត្តម ប្រធានក្រុមការងារក៏បន្តអញ្ជើញចុះត្រួតពិនិត្យផ្លូវជួសជុលក្រាលគ្រួសក្រហមចំណុចបួនជួរទៅពេជ្រចង្វារ និងដីក្រហម ប្រវែង ៤.៥០០ ម៉ែត្រ និងបន្តចុះត្រួតពិនិត្យផ្លូវដីចំណុចផ្លូវបំបែកភូមិបឹងចែងទៅកាន់អូរតាឃ្មួចប្រវែង ៤.៥០០ម៉ែត្រ។
ឯកឧត្តម គៀត ច័ន្ទថារិទ្ធ បានថ្លែងអំណរគុណដល់ប្រជាពលរដ្ឋទាំងអស់ដែលបានចូលរួមថែរក្សាសុវត្ថិភាព និង ប្រែក្លាយតំបន់បឹងក្រសាលនៃឃុំស្ទឹងឲ្យប្រែក្លាយជាពណ៍បៃតង ស្រស់បំព្រងប្រកបដោយ ស្រូវស្រែ ដំណាំ មានផ្លែផ្កាយ៉ាងល្អប្រសើរ ដូចនាពេលបច្ចុប្បន្នផងដែរ៕ ដោយ ៖ ដារា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
