កំពង់ស្ពឺ៖ ភូមិមួយចំនួន នៅក្នុងស្រុកគងពិសី ខេត្តកំពងស្ពឺ ត្រូវបានអាជ្ញាធរមីន ប្រកាសជា ភូមិ-ឃុំអស់មីន ដំបូងគេសម្រាប់ឆ្នាំ២០២៣ បន្ទាប់ពីកងកម្លាំងមួកខៀវ បានបោសសំអាតរួចរាល់ ហើយ បានប្រគល់ដីសុវត្ថិភាពទាំងអស់នោះ ទៅប្រជាពលរដ្ឋសម្រាប់អាស្រ័យផល ។

ក្នុងពិធីអបអរប្រកាសភូមិ-ឃុំអស់មីន នៅថ្ងៃទី១០ ខែមករា ឆ្នាំ២០២២ ​ឯកឧត្តមទេសរដ្ឋមន្ត្រី លី ធុជ អនុប្រធានទី១ ​អាជ្ញាធរមីន មានប្រសាសន៍ថា ​សម្រាប់ទីតាំង​បានប្រកាសអស់មីន គឺមានឃុំស្ដុក, ភូមិអង្គដូនតី ភូមិត្រពាំងថ្ម និងភូមិរលាំងទឹក ស្ថិតក្នុងឃុំស្រង់ ​ដែលទីតាំង ទាំងអស់នេះជាអតីតសមរភូមិ បន្សល់​នូវកាកសំណល់ពីសង្គ្រាម ហើយបានបង្កគ្រោះថ្នាក់ ដល់​មនុស្ស និងសត្វពាហនៈជាច្រើនករណី ។

ឯកឧត្តម ទេសរដ្ឋមន្ត្រី បន្តថា ​នេះជាជំហានមួយបន្ថែមទៀត ​ចំពោះការ​ខិតខំ​ប្រឹងប្រែង​របស់​រាជ​រដ្ឋាភិបាល​កម្ពុជា ​ដើម្បីរំដោះផ្ទៃដីចម្ការមីនឲ្យមានសុវត្ថិភាព និងផ្ដល់ជូន​ពលរដ្ឋបានប្រើប្រាស់​អាស្រ័យ​ផល និងមិនឲ្យ​មានការ​ព្រួយបារម្ភ ​នៃការ​បង្កគ្រោះថ្នាក់ពី​កាកសំណល់ពីសម័យ​សង្គ្រាម​ទាំងនោះ ។

ឯកឧត្តម បន្តថា កម្ពុជាគ្រោងបោសសំអាតផ្ទៃដីចម្ការមីន​ឲ្យអស់ ​នៅឆ្នាំ២០២៣នេះ ​ឲ្យ​បានចំនួន​១២​ខេត្ត ហើយគ្រោងបោសសំអាតនៅទូទាំងប្រទេស ឲ្យបានប្រមាណជាង ២០០គីឡូម៉ែត្រក្រឡា ខណៈផ្ទៃដីចម្ការមីនបច្ចុប្បន្ននៅសល់ជាង ៦០០គីឡូម៉ែត្រក្រឡាទៀត ​ដែលត្រូវបោសសំអាត ឲ្យ​សម្រេចតាមផែនការកម្ពុជាគ្មានមីន ​នៅឆ្នាំ២០២៥ ។

លោក ស សុពុត្រា អភិបាលរងខេត្តកំពង់ស្ពឺ ​បានឲ្យដឹងថា ខេត្តកំពង់ស្ពឺ មានផ្ទៃដីចម្ការមីន​សរុប​ចំនួន​ជាង ៥៥០ចម្ការ លើផ្ទៃដីចំនួនជាង ៦៦ពាន់ម៉ែត្រការ៉េ ​ហើយត្រូវបានធ្វើការ បោសសំអាត​រួចរាល់​ បានជាច្រើនចម្ការមកហើយ​ និងកម្លាំងនានាកំពុងប្រតិបត្តិការបោសសំអាតបន្តទៀត ។

គួរបញ្ជាក់ថា ដើម្បីឲ្យបានសម្រេចតាមផែនការកម្ពុជា​គ្មានមីន ​នៅឆ្នាំ២០២៥​ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា បានបង្កើតមូលនិធិ កៀគរថវិកា​ អនុវន្តគម្រោងសម្ដេចតេជោ សម្រាប់​សកម្មភាពមីន “ផ្ដល់ដីសុវត្ថិភាព ​បង្កើតស្មាមញញឹម” ដោយសម្ដេចបានផ្ដល់​ថវិកា​សន្សំ​ប្រមាណ ៣០លានដុល្លារ ​ដើម្បីធ្វើការងារនេះ​ រួមទាំង​មានការចូលរួមពីសប្បុរសជននានា បាន​ប្រមាណជាង ២០លានដុល្លារមកហើយ ៕អត្ថបទ៖ បាន សុខរិទ្ធិ