ភ្នំពេញ៖ លោកឧត្តមសេនីយ៍ត្រី ថោង សុផាត នាយរងប៉ុស្តិ៍ច្រកទ្វារ​អាកាសយានដ្ឋាន​អន្តរជាតិ​ភ្នំពេញបញ្ជាក់ថា កំណើនជនបរទេសចូលកម្ពុជាកើនឡើង ដោយក្នុងនោះ​ជនជាតិចិន​ស្ថិត​ក្នុង​លំដាប់​លេខ១។

បើតាមលោកឧត្តមសេនីយ៍ត្រី ថោង សុផាត នាយរង​ប៉ុស្តិ៍​ច្រកទ្វារ​អាកាសយានដ្ឋាន​អន្តរជាតិ​ភ្នំពេញ បានប្រាប់ BTV News ឲ្យដឹងនៅថ្ងៃទី១០ ខែមករា នេះថា បន្ទាប់ពី​បណ្តា​ប្រទេស​ជា​ច្រើន​លើ​សាកលលើបានដកបម្រាម និងវិធានការទប់ស្កាត់ជំងឺកូវីដ១៩ មានភ្ញៀវជន​បរទេស​ធ្វើ​ដំណើរ​ចូល​កម្ពុជាកើនឡើង ក្នុងកំណើនជនបរទេសចូលកម្ពុជា នាឆ្នាំ២០២២ កើនឡើង បើ​ធៀប​នឹង​ឆ្នាំ២០២១។ លោកឧត្តមសេនីយ៍ត្រី ថោង សុផាត បន្តថា ទន្ទឹមគ្នានេះ សម្តេចតេជោ ហ៊ុន សែន ប្រមុខរាជរដ្ឋាភិបាល បានប្រកាសស្វាគមន៍ភ្ញៀវជនជាតិចិន និងស្រប​ពេល​ចិន​បើក​ប្រទេស​ឡើង​វិញ សង្កេតឃើញមានកំណើនជនជាតិចិនធ្វើដំណើរមកកម្ពុជាច្រើនជាងគេ ដោយ​ស្ថិត​ក្នុង​លំដាប់លេខរៀងទី១។

ជាមួយនឹងកំណើនជនបរទេសចិនមកកាន់កម្ពុជា លោកឧត្តមសេនីយ៍ត្រី ថោង សុផាត បញ្ជាក់​ថា ក្នុងនាមមន្រ្តីអន្តោប្រវេសន៍បានសហការជាមួយមន្រ្តីសុខាភិបាល ដើម្បីពិនិត្យ និង​បញ្ជូន​ជន​បរទេស​ណារ​កឃើញមានបញ្ហាកម្តៅ ឬតេស្តរកឃើញវិជ្ជមានកូវីដ១៩ ដើម្បីរៀប​ចំ​បញ្ជូន​ទៅ​ព្យាបាល​នៅ​មន្ទីរពេទ្យ។

បើតាមរបាយការណ៍របស់មន្រ្តីអន្តោប្រវេសន៍ នៃប៉ុស្ត៍ច្រកទ្វារអាកាសយានដ្ឋានអន្តរជាតិភ្នំពេញ ក្នុងឆ្នាំ២០២២ មានភ្ញៀវជនបរទេសចូលកម្ពុជាប្រមាណ ១លាននាក់ ហើយជាមធ្យមក្នុងមួយ​ខែ​មាន​ជាង ៨ម៉ឺននាក់ ស្មើនឹងជើងហោះហើរ ជិត៤០ជើង ខណៈ​បើ​ធៀប​នឹង​ចំនួន​ភ្ញៀវ​បរទេស​ចូល​កម្ពុជា​ក្នុង​ឆ្នាំ២០២១ ប្រមាណ២០ម៉ឺននាក់ប៉ុណ្ណោះ៕ អត្ថបទ៖ ឧត្តម​