នេប៉ាល់៖ ពលរដ្ឋនេប៉ាល់កំពុងកាន់មរណទុក្ខរយៈពេលមួយថ្ងៃ សម្រាប់ជនរងគ្រោះនៃគ្រោះមហន្តរាយផ្នែកអាកាសធ្ងន់ធ្ងរបំផុតរបស់ប្រទេសនេះ រយៈពេល ៣ទសវត្សរ៍មកនេះ។
យ៉ាងហោចណាស់មនុស្ស ៦៨នាក់បានស្លាប់ នៅពេលជើងហោះហើរមួយរបស់ក្រុមហ៊ុនអាកាសចរណ៍ Yeti Airlines ចេញពីទីក្រុងកាតាម៉ាន់ឌូ (Kathmandu) ទៅកាន់ទីក្រុងទេសចរណ៍ផូខារ៉ា (Pokhara) បានធ្លាក់ឆេះកាលពីព្រឹកថ្ងៃអាទិត្យ។ នាយករដ្ឋមន្ត្រីនេប៉ាល់បានប្រកាសកាន់មរណទុក្ខទូទាំងប្រទេសនៅថ្ងៃចន្ទនេះ ហើយរដ្ឋាភិបាលបានបង្កើតគណៈកម្មការស៊ើបអង្កេតពីមូលហេតុនៃគ្រោះមហន្តរាយនេះ។ គេមិនច្បាស់ទេថា មូលហេតុអ្វីបណ្ដាលឲ្យយន្តហោះនេះធ្លាក់ ប៉ុន្តែប្រទេសនេប៉ាល់មានប្រវត្តិសោកនាដកម្មអាកាសចរណ៍ដ៏ធ្ងន់ធ្ងរជាច្រើន។
ប្រតិបត្តិការស្វែងរក និងជួយសង្គ្រោះដែលមានការចូលរួមពីទាហាននេប៉ាល់រាប់រយនាក់ ត្រូវបានផ្អាកកាលពីពាក់កណ្ដាលអាធ្រាត្រដោយសារមេឃងងឹតពេក ប៉ុន្តែបានបន្តនៅព្រឹកថ្ងៃចន្ទនេះ។ កាលពីថ្ងៃអាទិត្យទូរទស្សន៍រដ្ឋបានរាយការណ៍ថា ក្រុមអ្នកសង្គ្រោះកំពុងប្រញាប់ប្រញាល់ការងារជួយសង្គ្រោះនៅកន្លែងកើតហេតុ ដែលយន្តហោះត្រូវបានធ្លាក់នៅក្នុងជ្រលងភ្នំនៃទន្លេ Seti ចម្ងាយមួយគីឡូម៉ែត្រប៉ុណ្ណោះពីអាកាសយានដ្ឋាន។
សារព័ត៌មាន BBC NEWS បាននិយាយថា ភាគច្រើននៃអ្នកដំណើរចំនួន ៧២នាក់ និងក្រុមអាកាសយានិកបានស្លាប់ ប៉ុន្តែមានសេចក្ដីរាយការណ៍មួយចំនួនពុំបានបញ្ជាក់ថា នៅមានអ្នកនៅមានជីវិតទេ ទោះបីជាមានមួយចំនួនរបួសធ្ងន់ក៏ដោយ។ យោងតាមសារព័ត៌មាន News 18 TV ក្នុងចំណោមអ្នកដំណើរទាំងអស់មានជនជាតិនេប៉ាល់ចំនួន ៥៣នាក់, ឥណ្ឌា ៥នាក់, រុស្ស៊ី ៤នាក់, កូរ៉េខាងត្បូង ២នាក់, អាហ្សង់ទីនមួយនាក់ អៀឡង់មួយនាក់ និងបារាំងមួយនាក់៕អត្ថបទ៖ ក្រូច សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
