ភ្នំពេញ៖ ឯកឧត្តមបណ្ឌិត អ៊ិត សំហេង សមាជិកគណៈកម្មាធិការកណ្តាល និងជាប្រធានក្រុមការងារ​ចុះជួយមូលដ្ឋានខណ្ឌចំការមន និងខណ្ឌបឹងកេងកង កាលពីរសៀល​ថ្ងៃទី១៥ មករា ឆ្នាំ២០២៣កន្លងទៅ បានអញ្ជើញជាអធិបតី ក្នុងពិធីប្រកាសបញ្ជូល​សមាជិកថ្មី​គណបក្សចំនួនជាង ១ ៨០០នាក់ទៀត របស់គណៈកម្មាធិការគណបក្សប្រជាជនកម្ពុជា ក្នុងសង្កាត់ចំនួន៥ របស់ខណ្ឌចំការមន រាជធានីភ្នំពេញ។

នៅក្នុងពិធីនាឱកាសនោះ ឯកឧត្តមបណ្ឌិត អ៊ិត សំហេង បាននាំនូវប្រសាសន៍ផ្តាំផ្ញើ និង​សាកសួរសុខ​ទុក្ខពីសំណាក់​ សម្តេចតេជោ ​ហ៊ុន សែន ​នាយករដ្ឋមន្រ្តីនៃកម្ពុជា និងជាប្រធាន​គណបក្ស ព្រមទាំងថ្នាក់ដឹកនាំគណបក្ស ជូនដល់សមាជិកបក្សថ្មីជិត​ ២ពាន់នាក់ ដែលទើបនឹងចូលរួមជីវភាពជាមួយនឹងគណបក្សប្រជាជនកម្ពុជា។

ឯកឧត្តម បានគូសបញ្ជាក់ថា ការរក្សាបានសមាជិកចាស់បូកបញ្ចូលការកសាងសមាជិកបក្សថ្មី​បន្ថែម​នៅក្នុងខណ្ឌចំការមន គឺជាកម្លាំងសាមគ្គីយ៉ាងរឹងមាំមួយសម្រាប់គណបក្ស ដើម្បីបន្តដឹកនាំ​ប្រទេសជាតិឱ្យកាន់តែរីកចម្រើនថែមទៀត​ ក៏ដូចជាធ្វើឱ្យប្រទេសជាតិមានសុខសន្តិភាព ស្ថេរភាព​សង្គម និងការអភិវឌ្ឍលើគ្រប់វិស័យ។

ឯកឧត្តមបណ្ឌិត បានបន្តថា សមាជិកបក្សចាស់ថ្មី មានតួនាទីយ៉ាងសំខាន់ ក្នុងការខិតខំអនុវត្តឱ្យ​បាន​ត្រឹមត្រូវតាមកម្មវិធីគោលនយោបាយ និងលក្ខន្តិកៈរបស់គណបក្ស សំដៅការកសាង​ទំនាក់​ទំនង​ល្អជាមួយប្រជាជន និងខិតខំឃោសនាផ្សព្វផ្សាយអំពីកម្មវីធីនយោបាយរបស់គណបក្ស និង​ច្បាប់របស់រដ្ឋនានា ​ដោយត្រូវថែរក្សាធ្លុងសាមគ្គីឯកភាពផ្ទៃក្នុង ការជួយគ្នាទៅវិញទៅមក និង​ត្រូវ​ខិតខំរៀនសូត្រលើកកម្ពស់សមត្ថភាពទាំងគុណធម៌ សីលធម៌ដើម្បីសម្រេចភារកិច្ចជូន​សង្គមជាតិ​របស់យើង។

បន្ថែមពីនេះ ឯកឧត្តម ក៏បានលើកឡើងអំពីប្រវត្តិនិងស្នាដៃរបស់គណបក្សប្រជាជនកម្ពុជា ដែល​ជាគណបក្សមានវ័យចំណាស់ មានភាពចាស់ទុំ បានដាក់ចេញនូវកម្មវិធីនយោបាយដ៏ត្រឹមត្រូវ និង​មាន​គុណបំណាច់ បានកសាងសមិទ្ធផលជាច្រើន​ ក្នុងបុព្វហេតុជាតិ មាតុភូមិ ព្រមទាំងបានឆ្លង​កាត់ការលំបាកគ្រប់បែបយ៉ាងជាមួយប្រជាពលរដ្ឋ ​រហូតនាំឲ្យប្រទេសមានសុខសន្តិភាពពេញលេញ និងមានការអភិវឌ្ឍដូចសព្វថ្ងៃ។

នៅក្នុងឱកាសនោះដែរ ឯកឧត្តមបណ្ឌិត​ បានស្នើដល់ក្រុមការងារ បន្តជំរុញការងារកសាង​ពង្រីក​សមាជិកគណបក្សថ្មី ជាពិសេសក្នុងស្រទាប់យុវជន ដែលទើបនឹងគ្រប់អាយុបោះឆ្នោត ហើយ​ត្រូវបំប៉នទាំងខាងនយោបាយ​សតិអារម្មណ៍ ​និង​ចាត់តាំង ​ព្រមទាំងជីវភាពរស់នៅ​ធ្វើឱ្យ​សមាជិកគណបក្ស​មានភាពកក់ក្តៅផ្សារភ្ជាប់ជាមួយគណបក្ស និងការបោះឆ្នោតជូន​គណបក្ស​ឱ្យបានគ្រប់ៗគ្នា៕អត្ថបទ ឈិត បូរ៉ាវី