កំពង់ឆ្នាំង៖ នៅព្រឹកថ្ងៃទី១៧ ខែមករា ឆ្នាំ២០២៣ ឯកឧត្តម អ៊ុក រ៉ាប៊ុន រដ្ឋមន្ត្រីក្រសួង​អភិវឌ្ឍន៍​ជនបទ បានដឹកនាំក្រុមការងារ ចុះពិនិត្យ​ការ​ខូចខាត​លើ​ហេដ្ឋា​​រចនា​សម្ព័ន្ធ​រូបវ័ន​ ដោយ​សារ​ជំនន់​ទឹក​ភ្លៀង​នៅ​ក្នុងស្រុកសាមគ្គីមានជ័យ ខេត្តកំពង់ឆ្នាំង ដែលបានរងការជន់លិចកាលពីថ្ងៃទី១២ ខែមករា ឆ្នាំ២០២៣។

លោក ឈួន ចាន់ណា អភិបាលស្រុកសាមគ្គីមានជ័យ ខេត្តកំពង់ឆ្នាំង បានឲ្យដឹងថា នៅក្នុង​ឃុំ​ទាំង​៧រ​បស់ស្រុកសាមគ្គីមានជ័យ ត្រូវបានរងគ្រោះ ក្នុងនោះមានឃុំត្បែងខ្ពស់ ស្វាយជុក ពាម ឈាន​ឡើង ក្រាំងល្វា ខ្នាឆ្មារ និងឃុំពានី ក្នុងភូមិសាស្រ្ដស្រុកសាមគ្គីមានជ័យ មានផ្លូវ​ជន​បទ​ចំនួន ១២ខ្សែ ក្នុងនោះផ្លូវលិចទឹកប្រវែង ៣ ១០០ម៉ែត្រ និងខូចតាមជើងទេរប្រវែង ២ ២០០​ម៉ែត្រ ​។ ផ្លូវក្រាលក្រួសក្រហមដែលរងការខូចខាតមានចំនួន ១០ខ្សែ ប្រវែងសរុប ៤១ ១៦០ម៉ែត្រ ក្នុងនោះលិចទឹកប្រវែង ៣៣ ១០០ម៉ែត្រ និងហូរច្រោះខូចជើងទេរមានប្រវែង ៣ ២៤០ម៉ែត្រ ។ ក្នុងនោះក៏មានស្ពានមួយកន្លែង និងលូដោះទឹកចំនួន ៣កន្លែង ក៏​រង​ការ​ខូច​ខាត​ផង​ដែរ ។ លើសពីនេះ អាជ្ញាធរឃុំស្រុកខេត្ត បានជម្លៀស​ប្រជាជន​ទៅ​កាន់​ទីទួល​សុវត្ថិភាព​ចំនួន​ ៨៤​គ្រួសារ និងរងផលប៉ះពាល់ជាង ២០០គ្រួសារ។ ដោយឡែក​សត្វ​ស្លាប​បាន​ងាប់​ជាង​ ៥០០​ក្បាល និង​ពលរដ្ឋអ្នកបង់សំណាញ់ម្នាក់បានលង់ទឹកស្លាប់ផងដែរ។

នាឪកាសនោះ ឯកឧត្ដម អ៊ុក រ៉ាប៊ុន បានបញ្ជាក់ថា ចំពោះផ្លូវ ស្ពាន លូ ដែល​បាន​ខូច​ដោយសារ​ជំនន់​ទឹក​ភ្លៀងខា​ងលើនេះក្រុមការងារបច្ចេកទេស នៃក្រសួងអភិវឌ្ឍន៍ជនបទ នឹង​លើ​ក​គម្រោង​ធ្វើ​ការ​ជួសជុលឡើងវិញ ។ ចំពោះស្ពានដែលមិនអាចធ្វើដំណើរបាន ក្រសួង​នឹង​ធ្វើ​ការ​ជួស​ជុល​បន្ទាន់ ដើម្បី​ភ្ជាប់ឲ្យប្រជាពលរដ្ឋអាចធ្វើចរាចរណ៍ជាបណ្ដោះអាសន្នសិន ៕ ហុង វាស្នា