ភ្នំពេញ៖ ក្រសួងអប់រំ យវុជន និងកីឡា និងអាជ្ញាធរជាតិប្រយុទ្ធប្រឆាំងគ្រឿងញឿន នឹងសម្ពោធដាក់ឱ្យប្រើប្រាស់ «បណ្ណាល័យគ្រឿងញៀន» នៅក្នុងបណ្ណាល័យសម្ដេចអគ្គមហាសេនាបតីតេជោ ហ៊ុន សែន និងលោកជំទាវ ស្ថិតនៅក្នុងវិទ្យាល័យបឹងត្របែក ខណៈបណ្ណាល័យនេះនឹងចូលរួមផ្សព្វផ្សាយសារអប់រំអំពីបញ្ហាគ្រឿងញៀន និងចូលរួមប្រយុទ្ធប្រឆាំងគ្រឿងញៀន ដល់សិស្សានុសិស្ស និងយុវជន។
លោក លឹម តុងហួត ប្រធាននាយកដ្ឋាននីតិកម្ម អប់រំ និងស្តារនីតិសម្បទា នៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនថ្លែងប្រាប់ BTV ថា ការបង្កើតបណ្ណាល័យគ្រឿងញៀននេះធ្វើឡើង តាមរយៈគំនិតផ្ដួចផ្ដើមក្នុងជំនួបរវាងថ្នាក់ដឹកនាំចិនជាមួយ ឯកឧត្ដមឧបនាយករដ្ឋមន្ដ្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀននាពេលកន្លងមក។ តាមរយៈជំនួបនោះភាគីចិនបានឯកភាពជួយផ្តល់ការគាំទ្រដល់ការបង្កើតបណ្ណាល័យដ៏មានសារៈសំខាន់នេះ។ ក្នុងនោះកម្ពុជាក៏បានស្នើភាគីចិនផ្ដល់ជំនួយគាំទ្របច្ចេកទេសដូចជាការប្រតិបត្ដិការលើបណ្ណាល័យគ្រឿងញៀននេះផងដែរ។
លោក តុងហួត បានឱ្យដឹងថា ក្នុងពេលឆាប់ៗខាងមុខនេះ ជាជំហានដំបូង ក្រសួងអប់រំ យវុជន និងកីឡា និងអាជ្ញាធរជាតិប្រយុទ្ធប្រឆាំងគ្រឿងញឿន នឹងសម្ពោធដាក់ឱ្យប្រើប្រាស់ «បណ្ណាល័យគ្រឿងញៀន» នៅក្នុងបណ្ណាល័យសម្ដេចអគ្គមហាសេនាបតីតេជោ ហ៊ុន សែន និងលោកជំទាវ ស្ថិតនៅក្នុងវិទ្យាល័យបឹងត្របែក ក្នុងពេលឆាប់ៗខាងមុខនេះ។
លោកបានបន្តថា តាមផែនការគម្រោងទុក គឺនឹងបង្កើតបណ្ណាល័យគ្រឿងញៀនចំនួន ៣ ក្នុងនោះទី ១ នៅវិទ្យាល័យអូរជ្រៅស្ថិតនៅក្រុងប៉ោយប៉ែត ទី ២ នៅវិទ្យាល័យ សិរីសោភ័ណស្ថិតនៅក្រុងសិរីសោភ័ណ និងទី ៣ នៅវិទ្យាល័យភ្នំស្រុក ទីរួមខេត្តបន្ទាយមានជ័យ។
គួរបញ្ជាក់ថា «បណ្ណាល័យគ្រឿងញៀន»នេះ គឺជាបណ្ណាល័យបែបឌីជីថលផង និងជាបណ្ណាល័យមានឯកសារសម្រាប់សិក្សាស្រាវជ្រាវផង ដោយប្រើប្រាស់ប្រព័ន្ធបច្ចេកវិទ្យាទំនើប និងផ្ទុកឯកសារពាក់ព័ន្ធនឹងវិធានការបង្ការទប់ស្កាត់ ដំណោះស្រាយនានាអំពីបញ្ហាគ្រឿងញៀន សម្រាប់សិស្សានុសិស្ស អ្នកសិក្សាស្រាវជ្រាវ សិក្សារៀនសូត្រ និងស្វែងយល់៕ អត្ថបទ៖ វ៉ន ដារ៉ា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
