ភ្នំពេញ៖ នៅក្នុងឆ្នាំ ២០២៣ នេះ រាជរដ្ឋាភិបាល ធ្វើការបោះផ្សាយលក់មូលបត្ររដ្ឋ ក្នុងទំហំប្រមាណជា ៨១៣ប៊ីលានរៀល សមមូលនឹងប្រមាណ ២០០លានដុល្លារអាមេរិក ដែលអាចផ្តល់ចំណូលដោយត្រង់មករាជរដ្ឋាភិបាល និងផ្ដល់ផលរហ័ស ដើម្បីធានាប្រសិទ្ធភាពនៃការវិនិយោគ និងចីរភាពនៃការគ្រប់គ្រងបំណុល និងថវិកាជាតិ។
ក្រសួងសេដ្ឋកិច្ច និងហិរញ្ញវត្ថុ ដែលជាសេនាធិការរបស់រាជរដ្ឋាភិបាល បានសេចក្តីប្រកាសព័ត៌មាន ស្តីពីផែនការបោះផ្សាយលក់មូលបត្ររដ្ឋឆ្នាំ២០២៣ តាមច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៣ ដោយអនុលោម និងក្របខណ្ឌគោលនយោបាយបឋម ស្តីពីការអភិវឌ្ឍមូលបត្ររដ្ឋរបស់រាជរដ្ឋាភិបាល ក្នុងនោះក្រសួងសេដ្ឋកិច្ច និងហិរញ្ញវត្ថុ នឹងធ្វើការបោះផ្សាយលក់មូលបត្ររដ្ឋ ក្នុងទំហំ ៨១៣ ប៊ីលានរៀល សមមូលនឹងប្រមាណ ២០០លានដុល្លារអាមេរិក ។
ជុំវិញព័ត៌មាន នៃការបោះផ្សាយលក់មូលបត្រ បានកំណត់ដូចជា៖ តម្លៃចារឹកក្នុងមួយប័ណ្ណ ១ លានរៀល, ប្រភេទមូលបត្រ ឬឥណប្រតិទានមានរយៈពេល ១ឆ្នាំ នឹងបោះផ្សាយចំនួន ៣ដង មានទំហំគ្រោងបោះផ្សាយចំនួន ២០០ប៊ីលានរៀល, ២ឆ្នាំ មានចំនួន ២ដង ក្នុងទំហំ ១២០ប៊ីលានរៀល, ៣ឆ្នាំ ចំនួន ៣ដង មានចំនួន ២០០ប៊ីលានរៀល, ៥ឆ្នាំ សម្រាប់ឯកជន មានចំនួន ២១៣ប៊ីលានរៀល, ១០ឆ្នាំ ចំនួន ២ដង ចំនួន ៤០ប៊ីលានរៀល និង ១៥ឆ្នាំ មានចំនួន ២ដង ក្នុងទំហំទឹកប្រាក់ ៤០ប៊ីលានរៀល។
សូមបញ្ជាក់ថា៖ នៅឆ្នាំ ២០២៣ រាជរដ្ឋាភិបាល គ្រោងនឹងបោះផ្សាយលក់មូលបត្ររដ្ឋជាលើកទីពីរ ចំនួន ២០០ ដុល្លារអាមេរិក សម្រាប់សងប្រាក់ដើម នៃការបោះផ្សាយមូលប័ត្រឆ្នាំ ២០២២ ចំនួន ២០០ ប៊ីលានរៀល សមមូលនឹងប្រមាណ ៤៩ លានដុល្លារអាមេរិក និងការគ្រោងថវិកាចំនួន ៦១៣ប៊ីលានរៀល សមមូលនឹងប្រមាណ ១៥១លានដុល្លារអាម៉េរិកទៀត សម្រាប់ធ្វើហិរញ្ញប្បទានលើគម្រោងវិនិយោគ ដែលអាចផ្តល់ចំណូលដោយត្រង់មករាជរដ្ឋាភិបាល និងផ្ដល់ផលរហ័ស ដើម្បីធានាប្រសិទ្ធភាពនៃការវិនិយោគ និងចិរភាពនៃការគ្រប់គ្រងបំណុល និងថវិកាជាតិ៕ អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
