​​ប៉ូឡូញ​៖ ប្រទេស​ប៉ូឡូញ​បាន​និយាយ​កាលពី​ថ្ងៃ​ចន្ទ ទី​២៣ មករា​ថា ខ្លួន​នឹង​ស្នើសុំ​ការអនុញ្ញាត​ឲ្យ​អាល្លឺម៉ង់​បញ្ជូន​រថក្រោះ​ Leopard ទៅកាន់​អ៊ុយ​ក្រែ​ន ហើយនឹង​បញ្ជូន​រថក្រោះ​ទាំងនោះ​ថា ​តើ​ទីក្រុង​ប៊ែ​រ​ឡាំង​យល់ព្រម ​ឬ​អត់ ដរាបណា​ប្រទេស​ផ្សេងទៀត​បាន​ធ្វើ​ដូចគ្នា​ផងដែរ​។​

​រដ្ឋាភិបាល​ក្រុង Kyiv ចង់បាន​រថក្រោះ​ Leopard 2 ផលិត​ដោយ​អាល្លឺម៉ង់ មួយ​ក្នុងចំណោម​រថក្រោះ​ភាគច្រើន​ដែល​ត្រូវបាន​ប្រើប្រាស់​ដោយ​លោកខាងលិច ដើម្បី​ជួយ​បំបែក​ខ្សែ​ត្រៀម​របស់​រុស្ស៊ី និង​ដណ្ដើមយក​ដែនដី​របស់ខ្លួន​មក​វិញ​ឲ្យ​បាន​នៅ​ឆ្នាំនេះ។ ​ប្រទេស​អាល្លឺម៉ង់​ដែល​ត្រូវតែ​យល់ព្រម​លើ​ការនាំចេញ​ឡើងវិញ​នូវ​ប្រភេទ​រថក្រោះ Leopard បាន​បង្ហាញ​ភាព​ស្ទាក់ស្ទើរ និង​ការប្រុងប្រយ័ត្ន​ចំពោះ​ទង្វើ ​ដែល​អាច​បណ្តាល​ឲ្យ​មាន​ភាព​តានតឹង​កើនឡើង​កាន់តែខ្លាំង​ជាមួយ​ទីក្រុង Moscow ហើយ​និយាយថា ​ប្រទេស​សមាជិក​សម្ព័ន្ធ​យោធា​ណា​តូ​ផ្សេងទៀត ​មិន​ទាន់​បាន​ស្នើសុំ​ជា​ផ្លូវការ​ឲ្យ​នាំចេញ​រថក្រោះ​ទាំងនោះ​ឡើងវិញ​នៅឡើយ​ទេ​។

​កាលពី​ថ្ងៃអាទិត្យ រដ្ឋមន្ត្រីការបរទេស​អាល្លឺម៉ង់លោកស្រី​ Annalena Baerbock បាន​និយាយថា អាល្លឺម៉ង់​នឹងមិន​រារាំង​ប៉ូឡូញ​ក្នុង​ការ​ផ្ដល់​អាវុធ​ឲ្យ​អ៊ុយ​ក្រែ​ន​ទេ ប៉ុន្តែ​ការ​អំពាវនាវ​របស់​ទីក្រុង​វ៉ា​សា​វី (Warsaw) ឲ្យ​បង្កើត​ក្រុមចម្រុះ​ ដើម្បី​បញ្ជូន​អាវុធ​ណាមួយ​នៅតែ​មិន​ទាន់​មាន​ច្រក​នៅឡើយ។ ​ប្រភព​ចំនួន​៣ ​បាន​និយាយ​ថា បណ្ដា​ប្រទេស​លោកខាង​លិច​បាន​ប្ដេជ្ញា​ផ្ដល់​កញ្ចប់​ថវិកា​រាប់ពាន់​លាន​ដុល្លារ​អាមេរិក ជា​ជំនួយ​យោធា​ថ្មី​ដល់​អ៊ុយ​ក្រែ​ន​ក្នុង​ពេល​ប៉ុន្មាន​ថ្ងៃ​ថ្មីៗ​នេះ។ កាលពី​ថ្ងៃ​ចន្ទ​បណ្ដា​រដ្ឋមន្ត្រី​ការបរទេស​សហភាព​អឺរ៉ុប បាន​ព្រមព្រៀង​បញ្ចេញ​កញ្ចប់​ថវិកា​ចុង​ក្រោយ​របស់​ខ្លួន ដែល​មាន​ទំហំ​ទឹកប្រាក់​ចំនួន ៥៤៥​លាន​ដុល្លារ​អាមេរិក​ដល់​អ៊ុយ​ក្រែ​ន៕

អត្ថបទ៖ សុខមាន