ភ្នំពេញ៖ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានលើកឡើង​ប្រាប់ទៅ​យុវជន ជាសមាជិករបស់ខ្លួនថា ការងារស័្មគ្រចិត្ត មិនត្រឹមតែបានចូលរួមក្នុងកិច្ចការងារសង្គម និងមនុស្សធម៌ប៉ុណ្ណោះទេ ប៉ុន្តែវាក៏អាចជួយអោយយុវជនចាប់ និងបង្កើតឱកាសការងារ​នាពេលបច្ចុប្បន្ន។

ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានលើកឡើងពីសារៈសំខាន់នៃ ការងារស្ម័គ្រចិត្តដូច្នេះ​ ក្នុងឱកាសសំណេះសំណាលជាមួយសមាជិក សមាជិកា ក្នុងរចនាសម័្ពន្ធ ស.ស.យ.ក. ប្រចាំវិទ្យាស្ថានបច្ចេកវិទ្យាកម្ពុជា ( ITC) ​នាព្រឹកថ្ងៃទី ២៥ ខែ មករា ឆ្នាំ ២០២៣ ។

ឯកឧត្តម បានបញ្ជាក់ថា ទីផ្សារការងារបច្ចុប្បន្នគឺ ទាមទារអោយបុគ្គលិកមានទាំងជំនាញរឹង និង​ជំនាញទន់ ​ដើម្បីទទួលបានលទ្ធផលការងារដែលសមប្រកប។

ទន្ទឹមនឹងនេះ ​ឯកឧត្តមបានលើកឡើងថា « ការងារស័្មគ្រចិត្ត មិនត្រឹមតែបានចូលរួមក្នុង​កិច្ច​ការងារ​សង្គម និងមនុស្សធម៌ប៉ុណ្ណោះទេ ​ប៉ុន្តែវាក៏អាចជួយអោយយុវជនចាប់ និងបង្កើតឱកាសការងារ​នាពេល​បច្ចុប្បន្ន» ។

ស្របជាមួយការលើកឡើងនេះ ឯកឧត្តមបានគូសបញ្ជាក់ថា ការងារស្ម័គ្រចិត្តបានផ្តល់ឱកាស​អោយ​យុវជន ក៏ដូចជាសិស្សនិស្សិតរៀនសូត្រពីរបៀបធ្វើការងារជាក្រុម ការធ្វើការជាមួយអ្នក​ដទៃ​តាមរយៈការបែងចែកភារកិច្ចផ្សេងៗគ្នា ​ហ្វឹកហាក់ ​និងលុតដំសមត្ថភាពរបស់ពួកគេ និងការ​សិក្សារៀន​សូត្រភាពជាអ្នកដឹកនាំ​ រួមទាំងការប្រាស្រ័យទាក់ទងរវាងគ្នា និងគ្នាផងដែរ។

ផ្សារភ្ជាប់នឹងការលើកឡើងខាងលើនេះ ​ឯកឧត្តម បានគូសបញ្ជាក់ដែរថា ស.ស.យ.ក. បានដើរ​តួយ៉ាងសំខាន់​ក្នុងការលើកទឹកចិត្ត ​និងបង្កើតឱកាសអោយយុវជនចូលរួមធ្វើការងារស័្មគ្រចិត្ត និង​កិច្ចការងារសង្គមផ្សេងៗ ដោយផ្តល់ឱកាសអោយពួកគេស្វែងយល់ពីខ្លួនឯង ស្គាល់ច្បាស់ពី​ចំណុចខ្លាំង ​និងចំណុច​ខ្សោយដែលគួរអភិវឌ្ឍ ​និងពង្រឹងបន្ថែម ​បណ្តុះស្មារតីធ្វើការងារជាក្រុម ការ​រៀនស្វែងយល់ពីភាពជាអ្នកដឹកនាំ​ មិនថាក្នុងកម្រិតតូច ឬធំ ពិសេសទៅទៀតនោះគឺការធ្វើខ្លួន​ជាគំរូ​ដល់អ្នកដទៃតាមរយៈសកម្មភាពនានា ដែលផ្តល់ជាវិជ្ជមានដល់សង្គមជាតិ។

ឯកឧត្តម បានឆ្លុះបញ្ចាំងផងដែរថា ​តាមរយៈការងារការងារស័្មគ្រចិត្ត នឹងផ្តល់ឱកាសអោយយុវជន​រៀនសូត្របន្ថែម ​ដុះខាត់សមត្ថភាពរបស់ខ្លួន​ ក្នុងការចាប់យកឱកាសការងារដែលសមស្រប និង​ក្លាយជាធនធានមនុស្សដ៏រឹងមាំ​ និងមាន​សក្ដានុពល​សម្រាប់​ប្រទេសជាតិ៕