ចិន៖ មជ្ឈមណ្ឌលទប់ស្កាត់ និងបង្ការជំងឺឆ្លងរបស់ចិនបាននិយាយកាលពីថ្ងៃពុធ ទី២៥មករាថា ការឆ្លងថ្មីនៃវីរុស COVID-19 ប្រចាំថ្ងៃនៅក្នុងប្រទេសចិន បានហក់ឡើងដល់ចំណុចកំពូលដែលមានរហូតដល់ជាង ៧លាននាក់ក្នុងមួយថ្ងៃអំឡុងថ្ងៃទី២២ ខែធ្នូ ខណៈអ្នកស្លាប់បានកើនឡើងដល់កម្រិតខ្ពស់បំផុតប្រចាំថ្ងៃដែលមានជាង ៤.០០០នាក់កាលពីអំឡុងថ្ងៃទី៤ ខែមករា។
ទិន្នន័យដែលបានបញ្ចេញនៅលើគេហទំព័ររបស់មជ្ឈមណ្ឌលនេះ បានកើតមានឡើងបន្ទាប់ពីអ្នកជំនាញខាងជំងឺរាតត្បាតនៃមជ្ឈមណ្ឌលគ្រប់គ្រង និងបង្ការជំងឺឆ្លងឈានមុខបាននិយាយកាលពីចុងសប្ដាហ៍មុនថា ៨០% នៃចំនួនប្រជាជនសរុបរបស់ចិនជាង ១.៤ពាន់លាននាក់បានឆ្លងវីរុសនេះរួចទៅហើយ ដែលនឹងអាចមានការឆ្លងខ្លាំងនៅរយៈពេល ២ ទៅ ៣ខែខាងមុខ។
មជ្ឈមណ្ឌលខាងលើនិយាយថា នៅអំឡុងថ្ងៃទី២២ ខែធ្នូ ឆ្នាំ២០២២ ចំនួនមនុស្សឆ្លង និងចំនួនអ្នកជំងឺមានអាការៈក្ដៅខ្លួនមកពិគ្រោះយោបល់បានកើនឡើងដល់ចំណុចខ្ពស់បំផុត ក្នុងនោះចំនួនអ្នកឆ្លងបានកើនឡើងជាង ៧លាននាក់ក្នុងមួយថ្ងៃ ហើយចំនួនអ្នកជំងឺក្ដៅខ្លួនចូលមកពិគ្រោះជំងឺបានកើនឡើងដល់ ២.៨៦៧លាននាក់។ ក្រុមមន្ត្រីគណៈកម្មការសុខភាពជាតិចិនបាននិយាយកាលពីសប្ដាហ៍មុនថា ប្រទេសចិនមានចំនួនអ្នកជំងឺ COVID-19 កើនឡើងដល់ចំណុចកំពូលនៅតាមគ្លីនិកព្យាបាលជំងឺក្ដៅខ្លួន បន្ទប់សង្គ្រោះបន្ទាន់ និងអ្នកជំងឺដែលមានស្ថានភាពធ្ងន់ធ្ងរ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
