ភ្នំពេញ៖ នៅថ្ងៃទី២៦ ខែមករា ឆ្នាំ២០២៣ លោកជំទាវ ភឿង សកុណា រដមន្ត្រីក្រសួងវប្បធម៌ និងវិចិត្រសិល្បៈ បានអញ្ជើញបើកសន្និបាតបូកសរុបសមិទ្ធផលការងារ ឆ្នាំ២០២២ និងលើកទិសដៅអនុវត្តបន្តឆ្នាំ២០២៣ របស់ក្រសួងវប្បធម៌ និងវិចិត្រសិល្បៈ នៅរាជធានីភ្នំពេញ។ ក្នុងឱកាសថ្លែងបើកសន្និបាតនោះ លោកជំទាវ ភឿង សកុណា ថ្លែងជំរុញការអភិរក្សសម្បតិ្ត​បេតិកភណ្ឌរូបី និងអរូបី ដែលមានអាយុកាល១០០ឆ្នាំឡើងទៅ។

នៅពេលបច្ចុប្បន្នក្រសួងវប្បធម៌ ​និងវិចិត្រសិល្បៈបានចាត់ទុកថា​ គ្រប់សំណង់អគារ ដែលមាន​អាយុកាល ១០០ឆ្នាំឡើង​ គឺជាទ្រព្យ​សម្បត្តិបេតិកភណ្ឌវប្បធម៌មានតម្លៃបំផុតរបស់កម្ពុជា ដែល​ត្រូវ​ទាមទារឲ្យមានការអភិរក្ស ​ហើយការជំរុញឲ្យភាគីពាក់ព័ន្ធធ្វើការអភិរក្ស ​បានធ្វើឡើងខណៈ មាន​សំណង់ចេតីយ៍ចាស់ៗនៅតាមវត្តមួយចំនួន ​និងសំណង់អគារតាមទីសាធារណៈនានា​ដែលមាន​អាយុកាល ១០០ឆ្នាំឡើង បានរងការបំផ្លាញ ​និងមួយចំនួនប្រឈមការបំផ្លាញ។

លោកជំទាវ ភឿង សកុណា ថ្លែងថា នៅក្នុងឆ្នាំ២០២២កន្លងមកនេះ ក្រសួងវប្បធម៌និងវិចិត្រសិល្បៈ បាន​ធ្វើការងារអភិរក្ស អភិវឌ្ឍន៍​សម្បតិ្តវប្បធម៌​ និងសិល្បៈ ​សម្រេចបានប្រមាណជាង៩៧% នៃផែនការសរុប​ ក្នុងនោះ ​មានសម្បត្តិបេតិកភណ្ឌវប្បធម៌អរូបី ​គុនល្បុក្កតោ ត្រូវបាន​អង្គការUNESCO សម្រេចធ្វើការចុះបញ្ជីសម្បត្តិបេតិកភណ្ឌពិភពលោក ​នាចុងឆ្នាំ២០២២ផងដែរ។

លោកជំទាវ ភឿង សកុណា ថ្លែងថា នៅក្នុងឆ្នាំ២០២២នេះ​ ក្រសួងវប្បធម៌​ បានសម្រេចគោលដៅ បើក​ការ​អភិរក្សជួសជុល​សំណង់​អគារបុរាណ​ បានចំនួន៤៨សំណង់ នៃចំនួនសំណង់បុរាណដែល​ត្រូវជួស​ជុលសរុប៨០សំណង់ ​និងបានជួសជុលវត្ថុបុរាណ ៥៤០មុខ ។

លោកជំទាវ បញ្ជាក់ថា គ្រប់សំណង់បុរាណ ដែលបានធ្វើការជួសជុលនោះ ​ភាគីច្រើនថវិកា គឺបាន​មកពីសប្បុរសជនឧបត្ថម្ភគាំទ្រ​ ព្រមជាមួយគ្នានេះដែរ ​ក្រសួងវប្បធម៌ និងវិចិត្រសិល្បៈក៏ទទួលបាន​ថវិកា​មកពីដៃគូជំនួយប្រមាណ ៤លានដុល្លាអាមេរិក ហើយលោកជំទាវរដ្ឋមន្ត្រី បានជំរុញឲ្យ​មន្ត្រីជំនាញ ​ត្រូវ​ទទួលគ្រប់គ្រងរៀបចំ​ផែន​ការ​អភិរក្សបន្ត នៅពេលគម្រោងជំនួយជួសជុល​ប្រាសាទ​នោះបានបញ្ចប់ទៅ ៕អត្ថបទ ស៊ុម សុខជា