តាកែវ៖ លោកជំទាវ ឱ វណ្ណឌីន រដ្ឋលេខាធិការក្រសួងសុខភិបាល និងជាប្រធានគណៈកម្មការ​ចំពោះ​កិច្ចចាក់វ៉ាក់សាំងកូវីដ១៩ ទូទាំងប្រទេស បានលើកឡើងថា បងប្អូនប្រជាពលរដ្ឋទាំងអស់​ដែលមកទទួលវ៉ាក់សាំងកូវីដ១៩ បានគ្រប់ដូសចាប់ពីដូសមូលដ្ឋាន ដល់ដូសទី៦ ស្មើនឹងមានរនាំង និងកងការពារដ៏រឹងមាំពីការឆ្លងជំងឺកូវីដ១៩ កុំឱ្យធ្ងន់ធ្ងរបាន។នៅក្នុងឱកាសអញ្ជើញចុះទស្សនកិច្ចការចាក់វ៉ាក់សាំងកូវីដ១៩ នៅតាមរោងចក្រ សាលារៀន ផ្សារ និងនៅតាមសហគមន៍ រយៈពេល២ថ្ងៃ ក្នុងខេត្តតាកែវ លោកជំទាវ មានប្រសាសន៍បន្តថា ជំងឺកូវីដ១៩ ​វាមិនទាន់រលាយបាត់ពីភពផែនដីយើងនៅឡើយទេ ពោលវានៅតែឆ្លងរីករាលដាលជា​ខ្លាំង​នៅបណ្ដាប្រទេសផ្សេងៗជុំវិញពិភពលោក ពិសេសនៅក្នុងប្រទេសកម្ពុជារបស់យើង​នៅតែមាន​ការឆ្លងពីមួយថ្ងៃទៅមួយថ្ងៃ ប៉ុន្ដែការឆ្លងវាមានកម្រិតទាប។

ទោះបីជាយ៉ាងណាយើងកុំមានការធ្វេសប្រហែសអោយសោះ ត្រូវមានការប្រុងប្រយ័ត្ន​ជានិច្ចចំពោះ​ជំងឺ​កូវីដ១៩នេះ ពិសេសជំងឺកូវីដ១៩ បំប្លែងខ្លួនថ្មីប្រភេទអូមីក្រុង វាងាយឆ្លងលឿនណាស់ បើសិនយើងមិនបានចាក់វ៉ាក់សាំងគ្រប់គ្រាន់ទេវាអាចបណ្ដាលអោយមានគ្រោះថ្នាក់។

លោកជំទាវ ឱ វណ្ណឌីន បានបញ្ជាក់ថា ដើម្បីបង្ការទប់ស្កាត់ជំងឺកូវីដ១៩បាន គប្បីយើងម្នាក់ៗត្រូវ​មកទទួលវ៉ាក់សាំងបង្ការជំងឺកូវីដ១៩ ​អោយបានគ្រប់ដូសតាមការអំពាវនាវរបស់រាជរដ្ឋាភិបាល និងអាជ្ញាធរខេត្ត ពិសេសត្រូវចូលរួមអនុវត្តវិធានការ៣កុំ និង៣ការពារ និងវិធានការដទៃទៀតរបស់​ក្រសួងសុខាភិបាលដែលបានដាក់ចេញ ពោលត្រូវមានអនាម័យខ្លួនប្រាណជាប្រចាំ ព្រោះកត្តា​អនាម័យនេះសំខាន់ណាស់សំរាប់សុខភាព និងការពារបានពីការឆ្លងពីជំងឺកូវីដ១៩ និងជំងឺដទៃទៀតបាន។

ក្នុងឱកាសនោះដែរលោកជំទាវ ឱ វណ្ណឌីន ក៏បានធ្វើការជំរុញបន្ថែមទៀតដល់អាជ្ញាធរមូលដ្ឋាន​ត្រូវជំរុញដល់ប្រជាពលរដ្ឋដែលចាប់ពី៣ឆ្នាំឡើង អោយមកទទួលវ៉ាក់សាំងបង្ការជំងឺកូវីដ១៩ អោយបានគ្រប់ៗគ្នា ពិសេសមន្រ្តីទទួលបន្ទុកការចាក់វ៉ាក់សាំងត្រូវណែនាំពួកគាត់​អោយយល់ដឹងពី​គម្លាតរយៈពេលនៃការចាក់វ៉ាក់សាំងអោយបានច្បាស់ ​ចៀសវាងមានរយៈពេលយូរ ដែលជាហេតុធ្វើ​អោយប្រព័ន្ធ​ភាពស៊ាំ ​ក្នុងរាង្គកាយមានការចុះខ្សោយ ​នៅពេលមានការឆ្លងជំងឺកូវីដ១៩ វាអាចវិវត្តន៍​ជាធ្ងន់ធ្ងរបាន និងឈានដល់ការបាត់បង់ជីវិតផងដែរ។

សូមបញ្ជាក់ដែរថា សម្រាប់ខេត្តតាកែវមានមន្រ្តីរាជការ កងកម្លាំងប្រដាប់ បានមកចាក់វ៉ាក់សាំង​កូវីដ១៩ ដូសទី៦ បានប្រមាណជាង១ពាន់នាក់ហើយ ៕