ភ្នំពេញ៖ នាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ ប្រាប់BTV News ឲ្យដឹង​នៅថ្ងៃទី៣០ ខែមករានេះថា ទាក់ទិននឹងករណីការជូនដំណឹង​របស់ក្រសួងមហាផ្ទៃទៅសមាគមគ្រូ​បង្រៀនឯករាជ្យស្តីពី ការបញ្ជូនរបាយការណ៍ហិរញ្ញវត្ថុប្រចាំឆ្នាំ២០២២នេះ គឺជាការអនុវត្តទូទៅ​របស់អង្គការមិនមែនរដ្ឋាភិបាល ​សមាគម ដែលបានចុះបញ្ជីស្របច្បាប់​នៅក្រសួងមហាផ្ទៃ។ អ្នកនាំពាក្យក្រសួងមហាផ្ទៃ បន្តថា ​ជាមួយករណីខាងលើក្រសួងមហាផ្ទៃ បានរកឃើញភាព​មិនប្រក្រតីមួយចំនួនរបស់សមាគមគ្រូបង្រៀនឯករាជ្យដែលផ្ទុយពីច្បាប់កំណត់។

ជាមួយបញ្ហានេះ អ្នកនាំពាក្យក្រសួងមហាផ្ទៃ បានព្រមានប្តឹងទៅតុលាការក្នុងករណីសមាគមគ្រូ​បង្រៀន​ឯករាជ្យមិនបញ្ជូនរបាយការណ៍ហិរញ្ញវត្ថុរបស់ខ្លួនមុនដំណាច់ខែកុម្ភៈខាងមុខនេះ។

អ្នកនាំពាក្យក្រសួងមហាផ្ទៃ ​អះអាងថា​ ក្នុងច្បាប់ស្តីពីអង្គការ ​សមាគម បានកំណត់ជាក់លាក់​ពី​តួនាទី និងកាតព្វកិច្ចរបស់អង្គការ សមាគម ​ដែលបានចុះបញ្ជីនៅក្រសួងមហាផ្ទៃទាំងអស់ត្រូវអនុវត្ត​តាមលក្ខន្តិកៈដែលចែងជាធរមាន។

លោក សាខុន ប៉ូរិន អនុប្រធានបណ្តាញសង្គមស៊ីវិលកម្ពុជា ​លើកឡើងថា ការបញ្ជូនរបាយការណ៍​ហិរញ្ញវត្ថុ ​គឺជាកាតព្វកិច្ចរបស់អង្គការ សមាគម ដើម្បីបង្ហាញពីថវិកាចំណាយដែលម្ចាស់ជំនួយបាន​ផ្តល់​សម្រាប់ការអភិវឌ្ឍន៍ទាំងឡាយនៅកម្ពុជា។

គួរបញ្ជាក់ថា កាលពីថ្មីៗនេះ សម្តេចក្រឡាហោម ហោម ស ខេង ​ឧបនាយករដ្ឋមន្រ្តី រដ្ឋមន្រ្តីក្រសួង​មហាផ្ទៃ បានរម្លឹកដល់សមាគមគ្រូបង្រៀនឯករាជ្យ ស្តីពីព័ត៌មានរាល់គណនីដែលត្រូវបើក​សម្រាប់​កិច្ច ប្រតិបត្តិការ ​របស់ខ្លួននៅធនាគារ ​និងផ្តល់នូវរបាយការណ៍បូកសរុបសកម្មភាពការងារ និង​របាយការណ៍ហិរញ្ញវត្ថុប្រចាំឆ្នាំ២០២២ ​ទៅក្រសួងមហាផ្ទៃឱ្យបានមុនដំណាច់ ​ខែកុម្ភៈ ឆ្នាំ២០២៣ ជាកំណត់៕ អត្ថបទ សេក ឧត្តម