ភ្នំពេញ៖ អង្គភាពប្រឆាំងអំពើពុករលួយ បានប្រកាសថា ការប្រកាសទ្រព្យសម្បត្តិរបស់មន្រ្តី​រាជការ​មក​ពីគ្រប់ក្រសួង ស្ថាប័ន និងរាជធានី-ខេត្តទាំងអស់ បានចំនួន២២.៥៦៥ច្បាប់ ខណៈពេលវេលា​ដែល​ផ្តល់ឱកាសឲ្យមកធ្វើការប្រកាសទ្រព្យសម្បត្តិ និងបំណុលត្រូវបានបញ្ចប់ នៅថ្ងៃទី៣១ ខែមករានេះ។

ថ្លែងប្រាប់ទូរទស្សន៍BTVនាព្រឹកថ្ងៃទី៣១ ខែមករា ឆ្នាំ២០២៣នេះលោក សយ ច័ន្ទវិចិត្ត អ្នកនាំ​ពាក្យរបស់អង្គភាពប្រឆាំងអំពើពុករលួយ បានឲ្យដឹងថា តាមរបបពីរឆ្នាំសម្រាប់ឆ្នាំ២០២៣នេះ នាយកដ្ឋានប្រកាសទ្រព្យសម្បត្តិ និងបំណុល ​នៃអង្គភាពប្រឆាំងអំពើពុករលួយ គ្រប់ក្រសួង ស្ថាប័ន និងរាជធានី-ខេត្ត ដោយគិតត្រឹមថ្ងៃទី៣០ ខែមករា ឆ្នាំ២០២៣នេះ នាយកដ្ឋានប្រកាសទ្រព្យសម្បត្តិ និងបំណុល បានទទួលឯកសារប្រកាសទ្រព្យសម្បត្តិ និងបំណុលសរុបចំនួន២២.៥៦៥ច្បាប់។

លោក សយ ច័ន្ទវិចិត្ត បានឲ្យដឹងទៀតថា ការប្រកាសទ្រព្យសម្បត្តិ និងបំណុលត្រូវបានបញ្ចប់ នាថ្ងៃទី៣១ ខែមករា ឆ្នាំ២០២៣នេះ ដោយក្រសួង សា្ថប័នចំនួន២៥ និងរាជធានី-ខេត្តទាំង២៥ ត្រូវបានបញ្ចប់មួយរយភាគរយ។

ជាមួយគ្នានោះដែរលោក សយ ច័ន្ទវិចិត្ត ក៏បានបញ្ជាក់ផងដែរថា តាមច្បាប់ ស្តីពីការប្រឆាំងអំពើពុក​រលួយ បុគ្គលណាដែលមិនបានប្រកាសទ្រព្យសម្បត្តិ និងបំណុលបុគ្គលនោះ និងត្រូវមានទោស និង​ពិន័យជាប្រាក់ផងដែរ។

តែយ៉ាងណាក៏ដោយ លោកមិនបានបញ្ជាក់ថា រហូតមកដល់ថ្ងៃនេះមន្រ្តីដែលមាន តួនាទីត្រូវ​ប្រកាស​ទ្រព្យសម្បត្តិនោះ នៅសល់ប៉ុន្មាននាក់ទៀតនោះឡើយ៕អត្ថបទ៖ បាន ចក់