កោះកុង៖ ក្រុមមន្រ្តីរាជការ កងកម្លាំងប្រដាប់អាវុធ និងប្រជាពលរដ្ឋរស់នៅក្នុងខេត្តកោះកុងជិត៩ពាន់នាក់ បានបន្តទទួលវ៉ាក់សាំងដូសទី៥ និងដូសទី៦​ ដើម្បីរួមគ្នាទប់ស្កាត់ជំងឺកូវីដ-១៩ ​និងភាពស៊ាំក្នុងសហគមន៍។

តបនឹងការអំពាវនាវរបស់ប្រមុខរាជរដ្ឋាភិបាលកម្ពុជា មន្រ្តីរាជការ កងកម្លាំងប្រដាប់អាវុធគ្រប់​ប្រភេទ យុវជន ​និងប្រជាពលរដ្ឋនៅក្នុងខេត្តកោះកុង ​បានបន្តស្ម័គ្រចិត្តចាក់វ៉ាក់សាំងនៅតាម​អគាររដ្ឋបាល មន្ទីរ អង្គភាព និងសាលារៀនតាមគោលដៅរៀងៗខ្លួន​ ប្រកបដោយទំនុកចិត្តខ្ពស់។

លោកវេជ្ជបណ្ឌិត ទៅ ម៉ឹង ប្រធានមន្ទីរសុខាភិបាលខេត្តកោះកុង ​បានឱ្យដឹងថា ​គិតមកដល់ចុងខែ មករានេះ ​មានក្រុមមន្រ្តីរាជការស៊ីវិល ​មន្រ្តីសុខាភិបាល កម្លាំងប្រដាប់អាវុធ ​កម្មករ កម្មការិនី និងយុវជន ​ប្រមាណជិត៩ពាន់នាក់ហើយ ​បានចាក់វ៉ាក់សាំងដូសទី៥ និងដូសទី៦ ។

លោកវេជ្ជបណ្ឌិត ​បានបញ្ជាក់ថា រាល់ការចាក់វ៉ាក់សាំង ​គឺមិនផ្តោតតែចាក់វ៉ាក់សាំងដូសទី៥ និង ទី៦ប៉ុណ្ណោះទេ ​ពោលគឺបច្ចុប្បន្ន ដូសទី១ឡើងទៅ ក៏ត្រូវចាក់ដែរ ​ដោយក្រុមគ្រូពេទ្យ បាន​ពង្រាយរហូត ដល់ភូមិរបស់ប្រជាពលរដ្ឋតែម្តង ។

កម្លាំងកងរាជអាវុធហត្ថខេត្តកោះកុង ដែលបានមកចាក់វ៉ាក់សាំងដូសទី៥ និងដូសទី៦ សុទ្ធតែអះ អាងថា​ ការចាក់វ៉ាក់សាំងដូសជំរុញនេះ គឺធ្វើឡើងដោយគោលការណ៍ស្ម័គ្រចិត្ត ដើម្បីរួមគ្នា​បន្ត​ទប់ស្កាត់​ ការរីករាលដាលជំងឺកូវីដ១៩ឡើងវិញ និងជាពិសេសភាពស៊ាំក្នុងសហគមន៍រស់​នៅ​បច្ចុប្បន្ន ។

យោងតាមរបាយការណ៍របស់ក្រសួងសុខាភិបាល ​បានបង្ហាញថា​ គិតត្រឹមថ្ងៃទី២១ ​ខែមករា ឆ្នាំ ២០២៣ ​អត្រាចាក់វ៉ាក់សាំងកូវីដ-១៩នៅប្រទេសកម្ពុជា បានកើនដល់៩៥,៣៤% ធៀបជាមួយនឹងប្រជាពលរដ្ឋ១៦លាននាក់ ៕អត្ថបទ៖ ឈឹម មករា