​ភ្នំពេញ៖ ប្រជាពលរដ្ឋ លើកឡើងថា ​បញ្ជីឈ្មោះបោះឆ្នោតជាការឆ្ពោះទៅកំណត់អ្នកដឹកនាំ​ប្រទេស​ធានាសន្តិភាព និងការអភិវឌ្ឍ ​ខណៈការប្រកាសសុពលភាពបញ្ជីឈ្មោះបោះឆ្នោតឆ្នាំ២០២២ នឹង​ប្រកាសនាពេលខាងមុខ។

បន្ទាប់ពីដំណើរប្តឹងតវ៉ា ឬជំទាស់ទៅនឹងបញ្ជីឈ្មោះបោះឆ្នោតដំបូងដែលបិទផ្សាយតាមឃុំ-សង្កាត់​បញ្ចប់​ទៅ​កាលពីខែមករាកន្លងនេះ ​មានប្រជាពលរដ្ឋដែលមានឈ្មោះក្នុងបញ្ជី​ឈ្មោះ​ឆ្នាំ២០២២ បានប្រាប់ BTV News ឱ្យ​ដឹងនៅថ្ងៃទី៣ ខែកុម្ភៈនេះថា ក្នុងនាមជាប្រជាពលរដ្ឋការ​ចូលរួមការ​បោះឆ្នោត​ជ្រើសតាំងតំណាងរាស្រ្តរៀងរាល់៥ឆ្នាំម្តង ​គឺជាពេលវេលាដ៏មានសារៈសំខាន់ ដើម្បី​បំពេញកាតព្វកិច្ច និងប្រើប្រាស់សិទ្ធិរបស់ខ្លួនក្នុងការជ្រើសរើសអ្នកនយោបាយដែលខ្លួនពេញចិត្ត។ ពួកគាត់ បន្តថា ​ដើម្បីជ្រើសរើសថ្នាក់ដឹកនាំនៃគណបក្សនយោបាយដែលខ្លួនពេញចិត្ត តាម​រយៈការ​ចុះឈ្មោះបោះឆ្នោត​ ហើយការចុះឈ្មោះបោះឆ្នោតជាការឆ្ពោះទៅកំណត់អ្នកដឹកនាំ​ប្រទេស​ធានាសន្តិភាព និងការអភិវឌ្ឍ។

ជាមួយគ្នា ប្រជាពលរដ្ឋ លើកឡើងថា ពួកគាត់បានត្រៀមខ្លួនរួចជាស្រេច ដើម្បីចូលរួម​ការ​បោះឆ្នោត​ជ្រើសរើសតំណាងរាស្រ្ត ​នីតិកាលទី៧ ​នាពេលខាងមុខផងដែរ។

បើតាមរបាយការណ៍របស់ គ.ជ.ប បង្ហាញកាលពីកន្លងទៅ ​ចំនួនអ្នកចុះឈ្មោះបោះឆ្នោត ក្នុង​បញ្ជីបោះឆ្នោតឆ្នាំ២០២២ ​ដែលនឹងត្រូវប្រើសម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៧ ​នៅថ្ងៃទី២៣ ខែកក្កដា​ ឆ្នាំ២០២៣ ​មានជាង៩លាន៧សែននាក់ ខណៈអ្នកដែល​នឹងត្រូវលុបឈ្មោះចេញពីបញ្ជីជិត ២៨ម៉ឺននាក់៕អត្ថបទ សេក ឧត្តម