ភ្នំពេញ៖ ទេសរដ្ឋមន្រ្តី លី ធុជ អនុប្រធានទី១ អាជ្ញាធរមីនបានស្នើរដ្ឋាភិបាល នៃប្រទេសស្វីស តាម​រយៈលោក Heinrich Schellenberg ឧបការីរដ្ឋមន្រ្តីក្រសួងការបរទេសសហព័ន្ធស្វីស បន្ត ផ្ដល់​ជំនួយ​ដល់​កម្ពុជា ដើម្បី​អនុវត្ត​នូវការងារសម្អាត​ដីចម្ការមីន ឲ្យសម្រេចបានតាមផែនការ កម្ពុជា​គ្មាន​មីន ឆ្នាំ២០២៥។

ក្នុងពិធីអបអរខួបអនុស្សាវរីយ៍ទី៦០ នៃការបង្កើតទំនាក់ទំនងការទូត រវាងសហព័ន្ធស្វីស និង​កម្ពុជា នៅយប់ថ្ងៃទី៣ ខែកុម្ភៈ ឆ្នាំ២០២៣ ឯកឧត្តម លី ធុជ មានប្រសាសន៍ថា ស្វីស បាន​ផ្តល់​ជំនួយ​គាំទ្រ​ផ្នែក​សុខភាព អភិបាលកិច្ច កសិកម្ម សន្តិសុខស្បៀង ការកសាងជំនាញ ការ​បោស​សម្អាត​មីន ព្រមទាំងបានចូលរួមចំណែកយ៉ាងសំខាន់ ក្នុងការអភិវឌ្ឍសុខុមាលភាព និង​វិបុល​ភាព​នៅ​កម្ពុជា។

ឯកឧត្តមបន្តថា ពាក់ព័ន្ធនឹងការងារបោសសម្អាតមីន ស្វីសគឺជាដៃគូដ៏សំខាន់ និងយូរអង្វែង ក្នុង​នាម​រាជ​រដ្ឋាភិបាលកម្ពុជា សូមឲ្យរដ្ឋាភិបាលស្វីស ពិចារណា​បន្ត​ជួយ​គាំទ្រ​ក្នុង​ការ​បញ្ចប់​ការងារ​បោស​សម្អាត​មីន ឲ្យអស់ក្នុងឆ្នាំ២០២៥ និងបន្តគាំទ្រដោះស្រាយហានិភ័យផ្សេងៗទៀត នៃ​សំណល់​ជាតិ​ផ្ទុះ​ពី​សង្រ្គាម​ក្រោយឆ្នាំ២០២៥ ស្រប​តាម​ផែន​ការ​យុទ្ធ​សាស្រ្ត​ជាតិ​សកម្មភាព​មីន​២០១៨-២០២៥។

ជាមួយគ្នានេះ ទេសរដ្ឋមន្ត្រី លី ធុជ បានថ្លែងអំណរគុណយ៉ាងជ្រាលជ្រៅ ចំពោះ​ជំនួយ​ហិរញ្ញវត្ថុ​របស់​រដ្ឋាភិបាលស្វីស ដែលបានផ្តល់ជូនមន្ទីរពេទ្យគន្ធបុប្ផា ចាប់តាំងពីឆ្នាំ១៩៩៤ ហើយ​ប្រជាជន​កម្ពុជា ចងចាំជានិច្ចដោយដឹងគុណយ៉ាងជ្រាលជ្រៅ និង​កោត​សរសើរ​ចំពោះ​ការ​លះបង់​របស់​លោក​វេជ្ជបណ្ឌិត Beat Richner ក្នុងការជួយសង្គ្រោះជីវិតកុមារ និងស្ត្រីកម្ពុជារាប់លាននាក់ តាម​រយៈ​ការ​ផ្តល់សេវាព្យាបាលដោយឥតគិតថ្លៃ ។

គួរបញ្ជាក់ថា កម្ពុជា-ស្វីស គឺជាអ្នកការពារស្មារតី និង​គោលការណ៍​នៃ​ធម្មនុញ្ញ​អង្គការ​សហ​ប្រជាជាតិ និងច្បាប់អន្តរជាតិ ក្នុងការប្តេជ្ញាចិត្តជាលក្ខណៈពហុភាគីនិយម ។ សំខាន់​ជាង​នេះ​ទៅ​ទៀត ប្រទេសទាំងពីរ គឺជាអ្នកជំរុញគោលនយោបាយការបរទេសអព្យាក្រឹត ដើម្បី​ការពារ​ឯករាជ្យ​ជាតិ​ជា​រដ្ឋអធិបតេយ្យ ដែលនយោបាយការបរទេសកម្ពុជាអព្យាក្រឹតភាព បាន​អនុម័ត​ដោយ​ព្រះ​បរម​រតន​កោដ្ឋ ព្រះបរមរតនកោដ្ឋ ឆ្នាំ១៩៥៥ បានក្លាយជាប្រយោគអចិន្ត្រៃយ៍នៅក្នុងរដ្ឋធម្មនុញ្ញ ឆ្នាំ​១៩៩៣ ។

ប៉ុន្មាន​ឆ្នាំ​ចុងក្រោយនេះ ទំនាក់ទំនងកម្ពុជា-ស្វីស បន្តរីកចម្រើន​ជា​មួយ​នឹង​សន្ទុះ​គួរ​ឱ្យ​កត់​សម្គាល់ ដែលបង្ហាញឱ្យឃើញពីទំហំពាណិជ្ជកម្មដែលកំពុងកើនឡើង ដំណើរ​ទស្សន​កិច្ច​កម្រិត​ខ្ពស់ និងការសន្ទនានយោបាយជាទៀងទាត់ រវាងក្រសួងការបរទេសទាំងពីរ ក៏​ដូច​ជា​កិច្ច​ប្រជុំ​ថ្នាក់​រដ្ឋ​មន្ត្រី​ពាក់ព័ន្ធផ្សេងទៀត និងកិច្ចសហប្រតិបត្តិការក្របខណ្ឌពហុភាគី ៕ អត្ថបទ៖ បាន សុខរិទ្ធិ