ភ្នំពេញ៖ ភ្ញៀវទេសចរអន្តរជាតិបានសម្តែងការរីករាយ និងរំពឹងថា ពួកគេនឹងមកទស្សនានៅកម្ពុជាឲ្យបានញឹកញាប់ ជាពិសេសគឺនៅប្រាសាទអង្គរវត្ត ដោយពួកគេមើលឃើញថា នាពេលបច្ចុប្បន្នេះ ប្រទេសកម្ពុជាមានការអភិវឌ្ឍនច្រើន និងមានសុខសន្តិភាព មានវប្បធម៌សម្បូររុងរឿងប្រកបដោយភាពទាក់ទាញ។
តាមរយៈកិច្ចសម្ភាសន៍ជាមួយទូរទស្សន៍BTV ភាគច្រើន ភ្ញៀវទេសចរអន្ដរជាតិទាំងនោះបានលើក ឡើងថា ពួកគេពិតជាមានសេចក្ដីរីករាយពេលបានមកដល់ប្រទេសកម្ពុជា និងបានកោតសរសើរថា ជាប្រទេសដែលស្អាត មានវប្បធម៌រុងរឿងអស្ចារ្យ ហើយទេសចរខ្លះបានសន្យាថា នឹងមកលេងឱ្យបានញឹកញាប់ផងដែរ និងដើរឲ្យបានគ្រប់ទីកន្លែងទៀតផង។
ភ្ញៀវទេសចរបរទេស ដែលបានអះអាងក្នុងកិច្ចសម្ភាសន៍ជាមួយទូរទស្សន៍ BTV នោះ គឺមកពីប្រទេសម៉ិចស៊ិកូ សហរដ្ឋអាមេរិក ប្រទេសប៉ូឡូញ និងប្រទេសអាឡឺម៉ង់ ដោយពួកគេបាន ធ្វើទស្សនកិច្ចនៅប្រាសាទអង្គរវត្ត បានសម្ដែងការកោតសរសើរ ពីភាពអស្ចារ្យ នៃប្រាសាទអង្គរវត្ដ និងការអភិវឌ្ឍរបស់ខេត្ដសៀមរាប។
ពួកគេបានបញ្ចេញទស្សនៈថា ប្រាសាទអង្គរគឺសម្បត្ដិវប្បធម៌មិនអាចកាត់ ថ្លៃបានរបស់កម្ពុជា ចំណែកប្រជាជនក៏មានភាពរាក់ទាក់ណាស់ផងដែរ។
សូមបញ្ជាក់ថា បន្ទាប់ពីកម្ពុជាបានបើកប្រទេសឡើងវិញក្រោយទប់ស្កាត់បានជោគជ័យនូវការឆ្លងរាលដាលជំងឺកូវីដ-១៩តាមរយៈការចាក់ស្រោចវ៉ាក់សាំងលើប្រជាពលរដ្ឋស្ទើរទាំងស្រុងនោះ បានធ្វើឲ្យភ្ញៀវទសចរបរទេសហកមកទស្សនានៅកម្ពុជា កាន់តែច្រើនឡើងវិញផងដែរ។ជាក់ស្តែងកាលពីឆ្នាំ២០២២កន្លងទៅនេះ ភ្ញៀវទេសចរបរទេសបានកើតឡើងដល់ជាងពីរលាននាក់។ ដោយសម្រាប់ថ្ងៃនេះកម្ពុជាក៏បើកដំណើរជើងហោះផ្ទាល់រវាងកម្ពុជា និងចិនឡើងវិញផងដែរ ដោយការបើកនេះត្រូវបានគេរំពឹងថា ប្រជាជនចិន នឹងមកទស្សនាកម្ពុជាកាន់តែច្រើនជាងមុនផងដែរ៕អត្ថបទ៖ បាន ចក់