ភ្នំពេញ៖ ការដឹកនាំដ៏ត្រឹមត្រូវរបស់រាជរដ្ឋាភិបាល មានទាំងនយោបាយ ការទូត សេដ្ឋកិច្ច និងកត្តាសុខសន្តិភាព ជាដើមនោះ ទើបធ្វើឱ្យប្រទេសកម្ពុជា អាចរៀបចំធ្វើជាម្ចាស់ផ្ទះជាលើកដំបូង នៃព្រឹត្តិការណ៍ស៊ីហ្គេម លើក ទី៣២ ឆ្នាំ២០២៣ ។ នេះបើតាមប្រសាសន៍របស់បណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា និងជាអ្នកវិភាគនយោបាយ បានផ្តល់បទសម្ភាសន៍ជាមួយBTV នាថ្ងៃទី៧ ខែកុម្ភៈនេះ ។

បណ្ឌិត គិន ភា បានលើកឡើងថា ការរៀបចំព្រឹត្តិការណ៍ស៊ីហ្គេមនេះ នឹងធ្វើឱ្យប្រទេសកម្ពុជា ​កាន់ តែមានឈ្មោះល្បីល្បាយ និងទទួលបានផលប្រយោជន៍ជាច្រើនសម្រាប់ប្រជាពលរដ្ឋ និង​ប្រទេសជាតិ ខណៈភ្ញៀវទេសចរជាច្រើន​ នឹងមកប្រទេសកម្ពុជា ។

ប្រទេសកម្ពុជា រៀបចំធ្វើជាម្ចាស់ផ្ទះលើកដំបូង ការប្រកួតកីឡាអាស៊ីអាគ្នេយ៍ ឬហៅថា ស៊ីហ្គេម លើកទី៣២ ត្រូវនឹងរយៈពេល៦៤ឆ្នាំ ​នៃព្រឹត្តិការណ៍ស៊ីហ្គេម ដោយមានរយៈ២ឆ្នាំរៀបចំម្តង។ ការប្រកួត ស៊ីហ្គេមនៅឆ្នាំនេះ នឹងចាប់ផ្តើមពីថ្ងៃទី៥ ដល់១៧​ ខែឧសភា ឆ្នាំ២០២៣ ដោយ​មានកីឡាប្រកួត៣៨ ប្រភេទ ដែលក្នុងនោះរួមមាន ប៉េតង់ តេក្វាន់ដូ (WT) ប្រដាល់គុនខ្មែរ បាល់ទាត់ គុនល្បុក្កតោ និងកាយ វប្បកម្ម ។ល ។

ក្រោយបញ្ចប់ព្រឹត្តិការណ៍ស៊ីហ្គេម ប្រទេសកម្ពុជា នឹងរៀបចំធ្វើជាម្ចាស់ផ្ទះលើកដំបូងមួយទៀត នោះ គឺការប្រកួតកីឡាអាស៊ានប៉ារ៉ាហ្គេមលើកទី១២ ​ដែលចាប់ផ្តើមពីថ្ងៃទី៣ ​ដល់ថ្ងៃទី៩ ខែមិថុនា ឆ្នាំ២០២៣ ដោយមានការប្រកួតកីឡាចំនួន១២ប្រភេទ រួមមាន​ អត្តពលកម្មហែលទឹក អុក បាល់ទះ អង្គុយ វាយសី និងវាយកូនឃ្លីលើតុ ។ល ។

ការធ្វើជាម្ចាស់ផ្ទះរៀបចំការប្រកួតកីឡាស៊ីហ្គេម និងអាស៊ានប៉ារ៉ាហ្គេម​ នៅឆ្នាំនេះ ​គឺជាព្រឹត្តិការណ៍ ជាប្រវត្តិសាស្ត្រថ្មីមួយទៀត​ សម្រាប់ប្រទេសកម្ពុជា ​ក្រោមការដឹកនាំរបស់រាជរដ្ឋាភិបាល នៃគណបក្សប្រ ជាជនកម្ពុជា ៕អត្ថបទ៖ ទូច សោភ័ណ