ភ្នំពេញ៖ មន្ត្រីជាន់ខ្ពស់នៃកម្ពុជា បានជំរុញឱ្យសមាគមជប៉ុន-កម្ពុជា ទាញយកផលប្រយោជន៍ពីកិច្ចព្រមព្រៀងពាណិជ្ជកម្មសេរីនានា ដែលកម្ពុជា ជាសមាជិកមានដូចជា កិច្ចព្រមព្រៀងសេដ្ឋកិច្ចគ្រប់ជ្រុងជ្រោយតំបន់ (RCEP) និងកិច្ចព្រមព្រៀងទ្វេភាគី ក៏ដូចជាកិច្ចព្រមព្រៀងពាណិជ្ជកម្មសេរីនានាជាមួយដៃគូអាស៊ាន ដើម្បីពង្រីកទីផ្សារ និងប្រតិបត្តិការអាជីវកម្មរបស់ខ្លួន។
ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ក្នុងជំនួបពិភាក្សាការងារជាមួយ ឯកឧត្តម ហ្វូម៉ៃគិ តាកាហាហ្ស៊ី (FUMIAKI TAKAHASHI) អតីតឯកអគ្គរាជទូតជប៉ុនប្រចាំកម្ពុជា និងជាប្រធានសមាគមកម្ពុជា-ជប៉ុន ក្នុងគោលបំណងជំរុញការធ្វើពាណិជ្ជកម្ម និងវិនិយោគនៅកម្ពុជា កាលពីរសៀលថ្ងៃទី៧ កុម្ភៈ ឆ្នាំ២០២៣កន្លងទៅ បានជម្រាបជូនភ្ញៀវអំពីការងារអាទិភាពសំខាន់ៗមួយចំនួន ដែលក្រសួងពាណិជ្ជកម្ម បាននិងកំពុងអនុវត្តក្នុងកិច្ចខិតខំប្រឹងប្រែងធ្វើឱ្យកាន់តែប្រសើរឡើងលើវិស័យពាណិជ្ជកម្ម និងធុរកិច្ច ដើម្បីជួយសម្រួលដល់វិនិយោគិននៅកម្ពុជា។
ជាមួយគ្នានេះ ឯកឧត្តមរដ្ឋមន្ត្រី បានគាំទ្រ និងផ្តល់អនុសាសន៍ណែនាំឱ្យក្រុមហ៊ុនធ្វើការពាក់ព័ន្ធជាមួយក្រសួង-ស្ថាប័នពាក់ព័ន្ធ ដើម្បីពង្រីកប្រតិបត្តិការអាជីវកម្មរបស់ខ្លួនឱ្យកាន់តែជោគជ័យបន្ថែមទៀត ជាពិសេសការនាំផលិតកម្ពុជាចូលទីផ្សារជប៉ុនតាមរយៈមជ្ឈមណ្ឌលធុរកិច្ចកម្ពុជានៅជប៉ុនជាដើម។
ជាការឆ្លើយតប ឯកឧត្តមប្រធានសមាគម បានថ្លែងអំណរគុណចំពោះអនុសាសន៍ណែនាំរបស់ឯកឧត្តមរដ្ឋមន្ត្រី ក៏ដូចជាការខិតខំប្រឹងប្រែងឥតឈប់ឈររបស់ក្រសួងពាណិជ្ជកម្ម ក្នុងការធ្វើឱ្យប្រសើរឡើងនូវបរិយាកាសធុរកិច្ចនៅកម្ពុជា។ ជាមួយគ្នានេះ ឯកឧត្តម ក៏បានប្តេជ្ញាចិត្តក្នុងការផ្សព្វផ្សាយ និងកៀរគរវិនិយោគិនជប៉ុនឱ្យកាន់តែច្រើនបន្ថែមទៀតមកវិនិយោគនៅកម្ពុជា។
ក្នុងជំនួបខាងលើនេះ គណៈប្រតិភូសមាគមជប៉ុន-កម្ពុជា បានធ្វើបទបង្ហាញជូន អង្គប្រជុំ អំពីប្រតិបត្តិការធុរកិច្ច ក៏ដូចជាទិសដៅរបស់ក្រុមហ៊ុនជប៉ុនមួយចំនួននៅកម្ពុជា ជាពិសេសការវិនិយោគលើវិស័យវារីវប្បកម្ម ផលិតផលសុខភាព កម្លាំងពលកម្ម សូត្រជាដើម។
ភាគីទាំងពីរ បានអបអរសាទរខួបលើកទី៧០ នៃការបង្កើតទំនាក់ទំនងការទូត រវាងប្រទេសទាំងពីរក្នុងឆ្នាំ២០២៣ និងបានសម្តែងសារជាថ្មីនូវការប្តេជ្ញាចិត្តក្នុងការបន្តពង្រឹងទំនាក់ទំនងរវាងប្រទេសទាំងពីរឱ្យកាន់តែជិតស្និទ្ធ ជាពិសេសកិច្ចសហប្រតិបត្តិការលើវិស័យសេដ្ឋកិច្ច និងពាណិជ្ជកម្ម ឱ្យកាន់តែមានភាពរឹងមាំ និងស៊ីជម្រៅបន្ថែមទៀត៕អត្ថបទ៖ ឈិត បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
