ភ្នំពេញ៖ ឯកឧត្តម ហេង សួរ ប្រធានសហភាពសហព័ន្ធយុវជនកម្ពុជាវិស័យការងារ និង​បណ្តុះ​បណ្តាលវិជ្ជាជីវៈ បានជំរុញដល់ថ្នាក់ដឹកនាំ សមាជិក សមាជិកាទាំងអស់បន្តយកចិត្តទុក​ដាក់​ការពារនូវសិទ្ធ សេចក្តីថ្លៃថ្នូរ និងអត្ថប្រយោជន៍ជូនដល់កម្មករនិយោជិត ​ទាំងក្នុង និងក្រៅ​ប្រទេសឱ្យបានល្អប្រសើរ សំដៅចូលរួមស្តារ ​និងជំរុញកំណើនសេដ្ឋកិច្ចជាតិ។

ក្នុងកាសបើកកិច្ចប្រជុំផ្សព្វផ្សាយសេចក្តីសម្រេចចិត្ត នៃមហាសន្និបាតតំណាងទូទាំងប្រទេស​របស់​សហភាពសហព័ន្ធយុវជនកម្ពុជា ​ដល់សមាជិក សមាជិកាសហភាពសហព័ន្ធយុវជនកម្ពុជា វិស័យការងារ និងបណ្តុះបណ្តាលវិជ្ជាជីវៈ កាលពីល្ងាចថ្ងៃទី៩ កុម្ភៈ ឆ្នាំ២០២៣កន្លងទៅ ​ឯកឧត្តម ហេង សួរ បានកោតសរសើរ ​ចំពោះថ្នាក់ដឹកនាំ ក៏ដូចជាមន្រ្តីរាជការគ្រប់លំដាប់ថ្នាក់ ដែលជា​សមាជិក សមាជិកា របស់ ស.ស.យ.ក. ដែលបានចូលរួមចំណែកក្នុងការសម្រេចបាននូវ​សមិទ្ធផល​ការងារគួរជាទីមោទនៈ ជាពិសេសការចូលរួមអនុវត្តវិធានការរបស់រាជរដ្ឋាភិបាលក្នុង​ការទប់ស្កាត់​ការរីករាលដាលនៃជំងឺកូវីដ-១៩​ ប្រកបដោយប្រសិទ្ធភាពខ្ពស់ ព្រមទាំងការចូលរួមយ៉ាងសកម្ម​ក្នុង​យុទ្ធនាការជាតិចាក់វ៉ាក់សាំងជូនកម្មករនិយោជិតទូទាំងក្នុងក្របខណ្ឌអនុគណៈកម្មការចំពោះកិច្ចចាក់វ៉ាក់សាំង និងក្រោមឆត្រកងទ័ព ជាមួយគ្នានេះ ក៏បានចូលរួមជំរុញការអនុវត្តវិធានការនានារបស់​រាជរដ្ឋាភិបាល​ និងក្រសួងសុខាភិបាល ជាពិសេសការជួយឧបត្ថម្ភដល់ប្រជាពលរដ្ឋដែល​បាន​រងគ្រោះ​ដោយសារទឹកជំនន់ និងកងកម្លាំងសមត្ថកិច្ច ដែលបានចុះជួយផ្ទាល់នៅមូលដ្ឋាននាពេល​កន្លងមកផងដែរ។

ឯកឧត្តម បានគូសបញ្ជាក់ថា ​កន្លងទៅនេះ ​សហភាពសហព័ន្ធយុវជនកម្ពុជា វិស័យការងារ បានសហការជាមួយសហភាពសហព័ន្ធយុវជនកម្ពុជាថ្នាក់កណ្តាល​ ថ្នាក់រាជធានីភ្នំពេញ និង​អង្គភាព ស្ថាប័នពាក់ព័ន្ធ អាជ្ញាធរដែនដី និងដៃគូសង្គម ក្នុងការអនុវត្តនូវសកម្មភាពចូលរួម​ប្រយុទ្ធប្រឆាំង​នឹងការរីករាលដាលនៃជំងឺកូវីដ-១៩, សកម្មភាពមនុស្សធម៌, ​ការអនុវត្តគម្រោង “I Care You” ដែលជាគម្រោងរបស់សហភាពសហព័ន្ធយុវជនកម្ពុជា វិស័យផ្ទាល់ និងសកម្មភាពផ្សេងៗ​ទៀត​ ដែលទទួលបានលទ្ធផលជាទីគាប់ចិត្ត ហើយលទ្ធផលនេះពិតជា​បានចូលរួមឆ្លើយតប​ទៅនឹងសកម្មភាពជាយុទ្ធសាស្រ្ត ​និងគោលបំណងរបស់សហភាពសហព័ន្ធយុវជនកម្ពុជា។

សូមបញ្ជាក់ថា ក្រៅពីផ្សព្វផ្សាយសេចក្តីសម្រេចចិត្តមហាសន្និបាតវិសាមញ្ញតំណាងទូទាំងប្រទេស របស់សហភាពសហព័ន្ធយុវជនកម្ពុជា អង្គប្រជុំ ក៏បានបូកសរុបលទ្ធផលការងារ​កន្លងមកដល់ឆ្នាំ២០២២ ដើម្បីដាក់ចេញនូវទិសដៅអាទិភាពសម្រាប់អនុវត្តការងារ​បន្តនៅ​ឆ្នាំ២០២៣ ឱ្យស្របទៅនឹងផែនការសកម្មភាព និងទិសដៅការងាររបស់សហភាព​សហព័ន្ធ​យុវជនកម្ពុជា៕អត្ថបទ៖ ឈិត បូរ៉ាវី