​ភ្នំពេញ ៖ ឯកឧត្តម សាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល អញ្ជើញប្រកាស​ទទួល​ស្គាល់​សមាស​ភាព​ក្រុមប្រឹក្សាភិបាល និងចូលកាន់តំណែងនាយកមន្ទីរពេទ្យជាតិ តេជោសន្តិភាព ដែលបានទទួល​នូវទំនុក​ចិត្ត​ពីរាជរដ្ឋាភិបាល ដើម្បីដឹកនាំ និងគ្រប់គ្រងមន្ទីរពេទ្យដ៏ធំបំផុតនៅកម្ពុជា ដែលមានចំណុះគែ្ររហូតដល់ជិត ១០.០០០គ្រែ, នារសៀលថ្ងៃទី១០ ខែកុម្ភៈ ឆ្នាំ២០២៣នេះ។

​ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល មានសេចក្តីសោមនស្ស​រីករាយ​ក្រៃលែង ​ដែល​បានចូលរួមក្នុងពិធីប្រកាសទទួលស្គាល់ សមាសភាពក្រុមប្រឹក្សាភិបាល និង​ចូល​កាន់​តំណែងនាយក និង​គណៈគ្រប់គ្រង​នៃមន្ទីរពេទ្យជាតិ តេជោសន្តិភាព ដែលទើបបាន​ទទួល​សេចក្តីទុកចិត្ត និងតែងតាំងដ៏ខ្ពង់ខ្ពស់បំផុតពី សម្តេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា គឺ៖ លោកជំទាវ វេជ្ជបណ្ឌិត យក់ សម្បត្តិ ជា​ប្រធាន​ក្រុមប្រឹក្សាភិបាល និងសមាជិកទាំងអស់ -លោកវេជ្ជបណ្ឌិត សួន សាមិត្ត ជានាយកមន្ទីរពេទ្យ និងគណៈគ្រប់គ្រងទាំងអស់។ យើងពិតជាមានមោទនភាព ដែលកម្ពុជា ជាប្រទេស​គំរូ​សម្រាប់​ប្រទេសមាន​ធនធាន​តិច និង ប្រទេសដែលទើបឆ្លងផុតពីសង្គ្រាមអាច​សម្រេចគោលដៅ​សុខភាព​បានយ៉ាងឆាប់រហ័ស ជាពិសេសក្នុងការ​គ្រប់គ្រង ឆ្លើយតបការរីករាលដាលជំងឺកូវីដ-១៩ អាច​ឱ្យបើកដំណើរការប្រទេសទាំងសកម្មភាព សេដ្ឋកិច្ច និងសង្គម​តាំងពីខែវិច្ឆិកា ឆ្នាំ២០២១ និងកំពុង​នៅលើផ្លូវឈានទៅសម្រេចបានការគ្របដណ្ដប់ សុខាភិបាលជាសកល ក្រោម​គំនិតផ្តួចផ្តើម​ដ៏ភ្លឺស្វាង​ ប្រកបដោយគតិបណ្ឌិតរបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានបង្កើតឡើងមូលនិធិ ជាតិគាំពារសុខភាពសង្គម ដែលគ្របដណ្ដប់​ប្រជាជន​ក្រុម​គោលដៅ​ផ្សេងៗ រួមមាន កម្មករក្នុងប្រព័ន្ធ កម្មករក្រៅប្រព័ន្ធ មន្ត្រីសាធារណៈ អតីត​មន្ត្រីរាជការ ក្រុម​ប្រឹក្សាឃុំ-សង្កាត់​ ថ្នាក់ដឹកនាំភូមិ ក្រុមកីឡាករ ក្រុមអ្នកដោះមីន ស្រ្តីមានផ្ទៃពោះ មនុស្សចាស់ជរា ជនពិការ កម្មករត្រីចក្រយាន។ សម្ដេចតេជោ នាយករដ្ឋមន្ត្រី ក៏បានផ្ដល់ជា​សាច់​ប្រាក់ដោយផ្ទាល់​ដល់ស្រ្តីសម្រាល​កូន​ជា​កម្មការីនី​ និងមន្ត្រីរាជការដែលជាការលើកទឹកចិត្ត សម្រាប់​បង្កើនកម្រិតអាហារូបត្ថម្ភទាំងម្ដាយ ទាំងទារក​ទើប​និង​កើត ដែលបានទទួលការគាំទ្រ និង​សេចក្តីថ្លែង​អំណរគុណយ៉ាងខ្លាំងពីប្រជាជនកម្ពុជា។

​ជាមួយគ្នានោះដែរ ឯកឧត្តម ឃួង ស្រេង ទីប្រឹក្សាផ្ទាល់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងជាអភិបាលរាជធានីភ្នំពេញ បានលើកឡើងដែរថា មន្ទីរពេទ្យជាតិ តេជោសន្តិភាព ដែលជាអំណោយដ៏ខ្ពង់ខ្ពស់បំផុតរបស់សម្តេចតេជោ នាយករដ្ឋមន្ត្រី ក្នុងសម័យសន្តិភាព ហើយគ្រប់បណ្តា​ប្រទេស​នៅលើពិភពលោក នៅពេលដែលប្រទេស​ជាតិរីក​ចម្រើន គឺបណ្តាប្រទេសទាំងនោះ ងាកទៅរកការងារសង្គមកិច្ច ការងារការពារសុខុមាល​ភាព​របស់​ប្រជាពលរដ្ឋ និងការងារបណ្តុះបណ្តាលធនធានមនុស្ស ដែលកិច្ចការងារនេះ ជាបរិបទ​លើពិភព​លោក​តែងតែគិតគូរដល់កិច្ចការងារនេះ៕ អត្ថបទ ៖ រដ្ឋា