ភ្នំពេញ៖ មហាជន រួមទាំងបណ្ដាក្រសួង ស្ថាប័នព័ត៌មាន នៅថ្ងៃទី ១៣ ខែកុម្ភៈ ឆ្នាំ២០២៣នេះ បានបញ្ជាក់ពីការគាំទ្រជាបន្តបន្ទាប់ ចំពោះការបិទសារព័ត៌មាន VOD។ ការបិទស្ថាប័នព័ត៌មានមួយនេះ ​គឺដោយសារតែមានការប្រព្រឹត្តខុស​ ផ្ទុយពីវិជ្ជាជីវៈសារព័ត៌មាន ក្នុងការផលិតផ្សព្វផ្សាយព័ត៌មាន។

ក្រសួងព័ត៌មាន នៅថ្ងៃទី ១៣ ខែកុម្ភៈនេះ បានចេញសេចក្ដីប្រកាសបិទ មជ្ឈមណ្ឌលកម្ពុជា ដើម្បី​ប្រព័ន្ធផ្សព្វផ្សាយឯករាជ្យ(CCIM) ដែលមានសារព័ត៌មាន VODនៅក្នុងនោះដែរ។ ការបិទនេះ ដោយសារតែសារព័ត៌មានមួយនេះ ​បានផ្សព្វផ្សាយព័ត៌មានខុសពីការពិត ផ្ទុយពីវិជ្ជាជីវៈ និងពុំបាន​ធ្វើការកែតម្រូវទៅតាមច្បាប់សារព័ត៌មាននោះទេ។

ក្រោយពីមានប្រកាសបិទ សារព័ត៌មានមួយនេះជាផ្លូវការនៅថ្ងៃទី ១៣ ខែកុម្ភៈនេះ មហាជនជាអ្នក​ប្រើប្រាស់បណ្ដាញសង្គម ក៏ដូចជាបណ្ដាក្រសួងស្ថាប័នានា ក៏បានបង្ហាញការគាំទ្រចំពោះចំណាត់​ការមួយនេះផងដែរ។ ​ជាក់ស្ដែងអ្នកប្រើប្រាស់បណ្ដាញសង្គមមួយរូបឈ្មោះ Penh Thearom បានសរសេរក្នុង facebook របស់ខ្លួនថា “ ក្នុងនាមខ្ញុំជាពលរដ្ឋខ្មែរ ខ្ញុំសូមគាំទ្រនូវចំណាត់ការរបស់​សម្ដេចតេជោ សម្រេចឱ្យលុបអាជ្ញាបណ្ណវីអូឌី (VOD) នេះ គឺជាការកែទំរង់ដ៏ល្អប្រសើរបំផុតមួយ និង​ជាការអនុវត្តច្បាប់ ប្រកបដោយក្រមសីលធម៌ ​វិជ្ជាជីវៈសារព័ត៌មាននៅកម្ពុជា ដើម្បីឲ្យកម្ពុជាទាំង​មូលរួម​គ្នាបំបាត់ចោលនូវព័ត៌មានក្លែងក្លាយ ​ដែលបំពានអ្នកដទៃ​ បំភ្លៃការពិត ដែលជាគ្រោះថ្នាក់​បង្កនូវភាពច្របូលច្របល់ និងហានិភ័យដល់ស្ថេរភាពសង្គម និងសន្តិសុខជាតិ។”

ចំពោះអ្នកប្រើប្រាស់បណ្ដាញសង្គមមួយរូបទៀត ​ដែលប្រើប្រាស់ឈ្មោះថា So Panha បានសើចចម្អកចំពោះសារព័ត៌មាននេះ ​និងចាត់ទុកថាសារព័ត៌មាននេះ ជាមេរោគសម្រាប់​សង្គមទៀតផង។ លោកបានសរសេរក្នុងហ្វេសប៊ុកថា “ VOD មកពីពាក្យថា៖

V = Virus

O = Operations

D = Day

ក្នុងសំណេរនោះបន្ថែមទៀតថា «វាអត់មានអី​ចម្លែក​ទេ ព្រោះពួកគេបានកំណត់គោលដៅរួចអស់​ហើយ ​ដោយផ្តោតទៅលើការផ្សព្វផ្សាយបំពុល ​បំភ្លៃការពិត ចេតនាធ្វើអោយមហាជន​មានការ​យល់ច្រឡំ។

ចំពោះក្រសួងស្ថាប័ន ក៏បានចេញញត្តិគាំទ្រ​ ចំពោះវិធានការបិទសារព័ត៌មាន ដែលប្រព្រឹត្តិខុស​វិជ្ជាជីវៈនេះផងដែរ។ តាមខ្លឹមសារញត្តិគាំទ្រ លើកឡើងថា ចំណាត់ការសម្រេចឱ្យលុប​អាជ្ញាបណ្ណ​វីអូឌី (VOD) នេះ គឺជាការកែទំរង់ដ៏ល្អប្រសើរបំផុតមួយ ​និងជាការអនុវត្តច្បាប់ ​និងក្រមសីលធម៌ វិជ្ជាជីវៈសារព័ត៌មាននៅកម្ពុជា ដើម្បីឲ្យកម្ពុជាទាំងមូលរួមគ្នាបំបាត់ចោលនូវព័ត៌មានក្លែងក្លាយ ដែលបំពានអ្នកដទៃ​ បំភ្លៃការពិត​ ដែលជាគ្រោះថ្នាក់បង្កនូវភាពច្របូលច្របល់ និងហានិភ័យដល់​ស្ថេរភាពសង្គម និងសន្តិសុខជាតិ។

តាមប្រកាសរបស់ក្រសួងព័ត៌មានបញ្ជាក់ថា ការបិទសារព័ត៌មាននេះ គឺដោយសារតែអង្គភាព​សារព័ត៌មាន​នេះបានរំលោភយ៉ាងធ្ងន់ធ្ងរលើវិជ្ជាជីវៈសារព័ត៌មាន​ធ្វើឱ្យប៉ះពាល់​ដល់កិត្តិយស​និងកិត្យានុភាពរបស់រាជរដ្ឋាភិបាលកម្ពុជា​ ហើយមិនព្រមធ្វើការកែសម្រួលតាមបទប្បញត្តិច្បាប់​ស្តីពីរបបអ្នកសារព័ត៌មាន៕អត្ថបទ៖ គឹមហុក