ភ្នំពេញ៖ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានអំពាវនាវទៅដល់ប្រទេសមួយចំនួន កុំឱ្យទិញវ៉ាក់សាំងស្តុកទុកលើសពីតម្រូវការរបស់ខ្លួន និងកុំប្រើប្រាស់វ៉ាក់សាំងធ្វើជាឧបករណ៍នយោបាយ ខណៈដែលពិភពលោកកំពុងប្រឈមមុខនឹងវិបត្តិការឆ្លងរីករាលដាលនៃមេរោគកូវីដ១៩។
សម្ដេចតេជោ ហ៊ុន សែន បានថ្លែងបែបនេះអំឡុងពេលថ្លែងតាមប្រព័ន្ធសន្និសីទវីដេអូអនឡាញនៅថ្ងៃនេះក្នុងសន្និបាទប្រចាំឆ្នាំលើកទី៧៧ នៃគណៈកម្មការសេដ្ឋកិច្ច និងសង្គមសម្រាប់តតំបន់អាស៊ី និងប៉ាស៊ីហ្វិករបស់អង្គការសហប្រជាជន (UN-ESCAP)។
សម្ដេចតេជោ ហ៊ុន សែន ថ្លែងថា៖ «ជាមួយគ្នានេះ កម្ពុជាសូមអំពាវនាវដល់ប្រទេសមួយចំនួន កុំប្រមូលទិញវ៉ាក់សាំងលើសតម្រូវការរបស់ខ្លួន និងសូមកុំឱ្យមានការប្រើប្រាស់វ៉ាក់សាំងជាឧបករណ៍នយោបាយ»។
ប្រមុខរាជរដ្ឋាភិបាលកម្ពុជា បានលើកឡើងពីសារៈសំខាន់ និងភាពជាបន្ទាន់នៃការបែងចែក និងប្រើប្រាស់វ៉ាក់សាំងបង្ការជំងឺកូវីដ១៩ប្រកបដោយមនុស្សធម៌ និងតម្លៃសមរម្យ ជាពិសេសសម្រាប់ប្រទេសកំពុងអភិវឌ្ឍ។
សម្ដេចតេជោ ហ៊ុន សែន ថ្លែងបន្តថា៖ «ក្នុងបិរការណ៍នេះ ការប្រយុទ្ធប្រឆាំងនឹងជំងឺកូវីដ-១៩ និងការពង្រឹងគុណភាព និងប្រសិទ្ធភាពនៃប្រព័ន្ធសុខាភិបាល គឺជាការងារអាទិភាពបំផុតសម្រាប់យើងទាំងអស់គ្នា»៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
