ភ្នំពេញ៖ នៅពេលបច្ចុប្បន្នមានថ្នាក់ដឹកនាំ មន្ត្រីរាជការទូទៅ និងពលរដ្ឋនៅតាមមជ្ឈដ្ឋាននានាទៀត បាននាំគ្នាភ្ជាប់ប្រព័ន្ធ Telegram ,Facebook , instagram និង Twitter ផ្លូវការរបស់សម្តេចតេជោ ហ៊ុន សែន នាយករដ្ឋមន្ត្រី ដើម្បីផ្សារភ្ជាប់ទំនាក់ទំនងល្អ តាមដានសកម្មភាពដឹកនាំប្រទេសរបស់​សម្តេចតេជោ និងការទទួលបានដំណឹង ​និងព័ត៌មាននានារបស់សម្តេចតេជោ ដែលមានភាព​ពិតប្រាកដ និងលឿនរហ័សបំផុត។

ឯកឧត្តម ប៉ែន បូណា រដ្ឋលេខាធិការក្រសួងព័ត៌មាន បានថ្លែងប្រាប់BTV នៅថ្ងៃទី១៥ ខែកុម្ភៈនេះថា នៅពេលបច្ចុប្បន្នពុំមានមេដឹកនាំប្រទេសច្រើននោះទេ​ ដែលបានប្រើប្រាស់ប្រព័ន្ធទំនាក់ទំនងសង្គម ដើម្បីផ្សាភ្ជាប់ទំនាក់ទំនងល្អរវាងថ្នាក់ដឹកនាំប្រទេសជាមួយនឹងបណ្តាពលរដ្ឋទូទៅនៅក្នុងសង្គម ដោយមានភាពជិតស្និត ដូច​សម្តេចតេជោ ហ៊ុន សែន​ នាយករដ្ឋមន្ត្រីនៃកម្ពុជា ។ នៅពេលនេះ សម្តេចតេជោ បានពង្រីកការប្រើប្រាស់ប្រព័ន្ធតេលេក្រាមមួយបន្ថែមទៀត ដែលនឹងផ្តល់​ព័ត៌មាន​រហ័សនានា​ទៅដល់ប្រជាពលរដ្ឋផ្ទាល់តែម្តង។

ពាក់ព័ន្ធនឹងការទទួលព័ត៌មានពិតនិងលឿន ឬអាចទទួលបានព័ត៌មានពីថ្នាក់ដឹកនាំប្រទេសដោយ​ផ្ទាល់នេះ ពលរដ្ឋក៏បានថ្លែងដែរថា ​នៅពេលនេះ ​ពួកគេបានភ្ជាប់ Telegramរបស់សម្តេចរួចហើយ ហើយក្រៅពីនោះពួកគេក៏បានភ្ជាប់ Facebookផ្លូវការរបស់សម្តេចតេជោថែមទៀត ហើយតាម​រយៈការភ្ជាប់នោះ ធ្វើឲ្យពួកគេបានដឹងព័ត៌មានពិតជាច្រើនមានលឿនរហ័ស ។

សម្តេចតេជោ ហ៊ុន សែន នាយករដ្ឋមន្ត្រីកម្ពុជា​ បានបង្កើតchannel តេលេក្រាមផ្លូវការ ​ឈ្មោះថា Prime Minister Hun Sen ដើម្បីការផ្សារភ្ជាប់ទំនាក់ទំនងល្អ​ជាមួយពលរដ្ឋ ផ្តល់ព័ត៌មានលឿន​ដល់ពលរដ្ឋ ​ដោយពលរដ្ឋគ្រប់រូបអាចភ្ជាប់បានដោយគ្រាន់តែ Scan QR code ដោយមិនបាច់​រកលេខទូរសព្ទសម្តេច ដើម្បីភ្ជាប់នោះទេ ឬចូលទៅដំណ​Link ​នៃតេឡេក្រាមបាន ខណៈគិតមក​ត្រឹមម៉ោង១១និង៣៤នាទីព្រឹកថ្ងៃទី១៥​ ខែកុម្ភៈ ឆ្នាំ២០២៣នេះ​ មានអ្នកចូលក្នុងChannel telegram សម្តេចតេជោចំនួនជាង ១៩ម៉ឺន៥ពាន់នាក់ហើយ។

សូមបញ្ជាក់ថា កន្លងមកសម្តេចតេជោ ក៏បានប្រើប្រាស់បណ្តាញសង្គមហ្វេសប៊ុក ជា​ផេកផ្លូវការ​ឈ្មោះ Samdach Hun Sen Cambodian Prime Minister ដើម្បីបង្ហោះព័ត៌មានសំខាន់ៗ និង​ទំនាក់ទំនង​យ៉ាង​ជិតស្និត​ជាមួយពលរដ្ឋ ​និងឆ្លើយនឹងកង្វល់ ឬដោះស្រាយបញ្ហា កង្វល់​ ពលរដ្ឋដោយផ្ទាល់ ទទួល​បានការគាំទ្រ និងពេញចិត្តពីប្រជាពលរដ្ឋយ៉ាងច្រើនលើសលុបផងដែរ៕អត្ថបទ ស៊ុមសុខជា