ភ្នំពេញ៖ ឯកឧត្តម គួច ចំរើន អភិបាលខេត្តព្រះសីហនុ បានអះអាងថា បច្ចុប្បន្នស្ថានភាព​សន្តិសុខ​នៅក្នុង​ខេត្តមួយ​នេះកំពុង​មានស្ថិរភាពល្អ ពុំមានករណីបទល្មើសចាប់ជំរិតកើតឡើងទៀតនោះទេ ប៉ុន្តែយ៉ាងណាអាជ្ញាធរខេត្ត នៅ​តែបន្តខិតខំការពារ ទប់ស្កាត់នូវករណីនេះ និងត្រៀមជួយសង្គ្រោះជនរងគ្រោះ ។

ក្នុងសន្និសីទសារព័ត៌មានស្តីពី ជោគជ័យសម្រេចបានរយៈពេល ៥ឆ្នាំ របស់ខេត្តព្រះសីហនុ នាថ្ងៃទី១៥ ខែកុម្ភៈ ឆ្នាំ២០២៣ ឯកឧត្តម គួច ចំរើន មានប្រសាសន៍ថា កាលពីមុនផ្ទុះឡើងនៃជំងឺកូវីដ-១៩ គឺមានសន្ទុះការហូរចូល នៃបរទេស​ច្រើន ពិសេសជនជាតិចិន ដែលការចូលមកនេះ មានទាំងអ្នកល្អ និងមិនសូវល្អ ហើយក៏មាន​ករណី​បទល្មើសកើតឡើងច្រើន ។

ឯកឧត្តម បានបន្តថា យ៉ាងណា បញ្ហាបទល្មើសបានស្ងប់ស្ងាត់ទៅវិញច្រើន នៅពេលនៃការផ្ទុះឡើងជំងឺកូវីដ-១៩ ពិសេស​​ពេលបិទខ្ទប់ រហូតមកដល់ពេលបច្ចុប្បន្ន ពុំមានករណីបទល្មើសចាប់ជំរិតទៀតនោះទេ តែអាជ្ញាធរខេត្ត​នៅតែមានការព្រួយបាម្ភ និងត្រៀមទប់ស្កាត់ជានិច្ច ។

​ជាមួយនេះ អភិបាលខេត្តព្រះសីហនុ បានបង្ហាញពីការលំបាកផងដែរ ទៅលើការបង្ក្រាបបទល្មើស ក្នុងនោះបញ្ហាការ​ខ្វះខាតសមត្ថកិច្ច ចេះភាសារបរទេស និងបញ្ហាបទល្មើសបែបបច្ចេកវិទ្យាទំនើប ៕ អត្ថបទ ៖ បាន សុខរិទ្ធិ