ព្រះវិហារ៖ នៅព្រឹកថ្ងៃទី១៥ ខែកុម្ភៈនេះ ក្នុងកិច្ចប្រជុំគណៈកម្មាធិការ​គ្រប់គ្រងដីរដ្ឋថ្នាក់ខេត្ត ឯកឧត្តម គីម រិទ្ធី អភិបាលខេត្តព្រះវិហារ បានជំរុញពន្លឿនការដោះស្រាយបញ្ហាទំនាស់ដីធ្លី ក្នុងភូមិសាស្រ្តខេត្តព្រះវិហារ ប្រកបដោយតម្លាភាព ដោយឈរលើគោលការណ៍ច្បាប់ និង​លិខិតបទដ្ឋាននានា ​ដើម្បីជាឧត្តមប្រយោជន៍ជាតិ និងប្រជាជន។

កិច្ចប្រជុំនេះធ្វើឡើងនៅសាលប្រជុំសាលាខេត្តព្រះវិហារ ក្រោមវត្តមានចូលរួមពីសំណាក់ ឯកឧត្តម លោកជំទាវ ជាអភិបាលរងខេត្ត លោក លោកស្រី ជាប្រធានមន្ទីរ-អង្គភាពពាក់ព័ន្ធ ​អភិបាលក្រុង-ស្រុក មន្ត្រីជំនាញរដ្ឋបាលសាលាខេត្ត នឹងមន្ទីរជាច្រើនរូបទៀត ។

នាឱកាសនោះ ឯកឧត្តម គីម រិទ្ធី បានស្នើដល់សមាជិកគណៈកម្មាធិការគ្រប់គ្រងដីរដ្ឋទាំងអស់ ត្រូវ​ចូលរួមពិភាក្សា ​និងចូលរួមជាគំនិត យោបល់ល្អៗ នឹងសំណូមពររបស់សមាជិកក្នុងអង្គប្រជុំ​ទៅលើការគ្រប់គ្រងដីរដ្ឋ ការងារដី សម្បទានសេដ្ឋកិច្ច ការងារដីសម្បទានសង្គមកិច្ច និងការ​ចុះ​បញ្ជីដីធ្លីជាដើម ដើម្បីជាធាតុចូល ​ក្នុងការពិភាក្សារកដំណោះស្រាយពីបញ្ហាប្រឈមនានា ដែលកើតមានឡើងនាពេលកន្លងមក ជាពិសេសត្រូវចូលរួមលើកជាសំណួរឱ្យបានផុលផុស ដើម្បីមាន​សមត្ថភាព គ្រប់គ្រាន់ ក្នុងការចូលរួមអនុវត្តន៍តាមគោលការណ៍ណែនាំឱ្យបានជោគជ័យ និងមានប្រសិទ្ធភាពខ្ពស់ ដើម្បីទទួលបានលទ្ធផលកាន់តែល្អប្រសើរ ។

កិច្ចប្រជុំបានប្រព្រឹត្តទៅដោយបានស្ដាប់នូវបទបង្ហាញរបស់មន្ទីររៀបចំដែនដី នគររូប នីយកម្ម សំណង់ និងសុរិយោដី ដែលទាក់ទងទៅនឹងបញ្ហាដីធ្លីក្នុងខេត្ត នឹងបានពិភាក្សាលើ បញ្ហាមួយ​ចំនួនទៀត ដូចជាការស្នើសុំដីសម្រាប់ការសាងសង់អគារ ក៏ដូចជាសុំចុះបញ្ជីដីធ្លី របស់​មន្ទីរមួយចំនួន បញ្ហាទំនាស់ដីធ្លីរវាងមន្ទីរស្ថាប័នរដ្ឋ និងស្ថាប័នរដ្ឋដូចគ្នា នឹងរវាង ស្ថាប័នរដ្ឋ និងឯកជន​ ព្រមទាំងបញ្ហាផ្សេងៗជាច្រើនទៀតដែល​ ទាក់ទងទៅនឹងដីធ្លី ។

ជាមួយនេះ ឯកឧត្តមអភិបាលខេត្ត ក្នុងនាមប្រធានគណៈកម្មាធិការគ្រប់គ្រងដីរដ្ឋ ថ្នាក់ខេត្ត បានស្នើឱ្យអាជ្ញាធរក្រុង-ស្រុក ត្រូវគ្រប់គ្រង និងការពារដីរដ្ឋឱ្យមានប្រសិទ្ធភាពខ្ពស់ ពិសេស​មន្ទីរជំនាញត្រូវសហការជាមួយអាជ្ញាធរក្រុង-ស្រុក និងអ្នកពាក់ព័ន្ធជាប់ជាប្រចាំ ៕