ភ្នំពេញ៖ នគរបាលអត្តសញ្ញាណកម្មនៅទូទាំងប្រទេសបង្កើនល្បឿន ជំរុញការផ្តល់អត្តសញ្ញាណបណ្ណ ខណៈពលរដ្ឋជាង៦៨ម៉ឺននាក់ ប្តូរអត្តសញ្ញាណបណ្ណហួសសុពលភាព។

លោកឧត្តមសេនីយ៍ឯក សាយ ម៉េងឈាង អគ្គនាយករង និងជាអ្នកនាំពាក្យអគ្គនាយកដ្ឋាន​អត្តសញ្ញាណកម្ម បានឲ្យដឹងនៅថ្ងៃទី១៧ ខែកុម្ភៈ ឆ្នាំ២០២៣ នេះថា ឆ្លើយតបទៅនឹងការ​ណែនាំ​របស់​​សម្ដេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ ជុំវិញការជំរុញ​ការផ្ដល់អត្តសញ្ញាណបណ្ណសញ្ជាតិខ្មែរនេះ​ ជាពិសេសក្នុងអំឡុងពេលនៃការបោះឆ្នោតខាងមុខនេះ អគ្គនាយកដ្ឋានអត្តសញ្ញាណកម្មបានដាក់ចេញជាយន្តការមួយចំនួន ដោយអគ្គនាយកដ្ឋាន​បានរៀបចំបញ្ជូនបញ្ជីឈ្មោះទិន្នន័យប្រជាពលរដ្ឋដែលមានអត្តសញ្ញាណបណ្ណហួសសុពលភាពជូនទៅតាមបណ្ដាស្នងការដ្ឋាននគរបាលរាជធានីខេត្ត ដើម្បីធ្វើបច្ចុប្បន្នភាពលើការផ្តល់​អត្តសញ្ញាណបណ្ណ​ជូនប្រជាពលរដ្ឋ។

លោកឧត្តមសេនីយ៍ឯក បន្តថា គិតត្រឹមថ្ងៃទី១៦ ខែកុម្ភៈនេះ អគ្គនាយកដ្ឋានអត្តសញ្ញាណកម្មបាន​ផ្តល់អត្តសញ្ញាណបណ្ណសញ្ជាតិខ្មែរជូនប្រជាពលរដ្ឋបានចំនួនជាង ១២លាននាក់ ហើយបាន​ប្តូរអត្តសញ្ញាណបណ្ណហួសសុពលភាពដល់ពលរដ្ឋជាង​ ៦៨ម៉ឺននាក់ លើផែនការជាង ១លាន៧សែននាក់។

ជាមួយគ្នា លោកឧត្តមសេនីយ៍ឯក សាយ ម៉េងឈាង ថ្លែងថា ចំពោះប្រជាពលរដ្ឋដែល​គ្រប់​អាយុចាប់ពី ១៥ឆ្នាំឡើងរស់នៅរាជធានីភ្នំពេញ និងអ្នកដែលមានអត្តសញ្ញាណបណ្ណ​ហួស​សុពលភាព ​អាចស្នើសុំធ្វើអត្តសញ្ញាណបណ្ណ ឬស្មើប្តូរអត្តសញ្ញាណបណ្ណហួសសុពលភាព​បាននៅ​នាយកដ្ឋានអត្តសញ្ញាណកម្មដែលមានទីតាំងនៅផ្សារទំនើបអ៊ីអន២។

គួរបញ្ជាក់ថា ​ក្នុងពេលបច្ចុប្បន្នតាមបណ្តារាជធានី-ខេត្ត នគរបាលជំនាញបានរៀបចំផែន​ការផ្តល់​អត្តសញ្ញាណបណ្ណដោយអចល័ត ​និងចល័យតាមទីប្រជុំជន ​តាមភូមិ ​ឬតាមផ្ទះរបស់ប្រជាពលរដ្ឋ ដើម្បីប​ង្កលក្ខណៈងាយស្រួលជូនដល់ប្រជាពលរដ្ឋផងដែរ៕ អត្ថបទ៖ សេក ឧត្តម