ព្រះសីហនុ៖ នាវា​កងទ័ពជើងទឹក​ចក្រភពអង់គ្លេស ​ ឈ្មោះ HMS SPEY-(P234) បានចាកចេញកំពង់​ផែ​ស្វយ័ត​ក្រុងព្រះសីហនុ នារសៀលថ្ងៃទី១៧ ខែកុម្ភៈ ឆ្នាំ២០២៣ បន្ទាប់ពីបានបំពេញ​ទស្សនកិច្ច​ជោគជ័យ​ក្នុងការពង្រឹងចំណងមិត្តភាព និងធ្វើលំហាត់រួមគ្នារវាងកងទ័ពជើងទឹក​ប្រទេសទាំងពីរ រយៈពេល៥ថ្ងៃ ពីថ្ងៃទី១៣ ដល់ថ្ងៃទី១៧ ខែកុម្ភៈ ឆ្នាំ២០២៣។

ឧត្តមនាវីទោ ស្វាយ សុន្ធី មេបញ្ជាការរង ទីបញ្ជាការជួរមុខ ​អគ្គលេខាធិការដ្ឋាន នៃគណៈកម្មាធិការជាតិសន្តិសុខលម្ហសមុទ្រ​ បានឱ្យដឹងថា បន្ទាប់ពីបានបំពេញទស្សនកិច្ច អស់រយៈពេល ៥ថ្ងៃកន្លងមកនេះ ​ក្នុងបេសកកម្មពង្រឹងចំណងមិត្តភាព និងធ្វើលំហាត់រួមគ្នា​រវាងកងទ័ពជើងទឹកប្រទេសទាំងពីរ (ហ្វឹកហាត់ នូវលំហាត់អគ្គីភ័យ និងទប់ទឹកលើនាវា​ពេលមានអាសន្ន ​និងកម្មវិធីប្រកួតកីឡាជាមិត្តភាព ។ល។) ដោយភាពជោគជ័យ​ និងស្និទ្ធស្នាល នាវា​កងទ័ពជើងទឹក​ចក្រភពអង់គ្លេស HMS SPEY-(P234) បានចាកចេញពីកំពង់​ផែ​ស្វយ័តអន្ដរជាតិ​ក្រុងព្រះសីហនុ ដោយសុវត្ថិភាព។

សូមបញ្ជាក់ថា នាវា​កងទ័ពជើងទឹក​ចក្រភពអង់គ្លេស ​ឈ្មោះ HMS SPEY-(P234) ​នេះ មាន​លក្ខណៈ​បច្ចេកទេស​៖ -​បណ្ដោយជាង ៩០ម៉ែត្រ -​ទទឹងជាង ១៣ម៉ែត្រ -ជម្រៅ​ទឹកជាង ៤ម៉ែត្រ -​ទម្ងន់​ផ្ទុក ២.០០០តោន ​និង-​ចំនួន​មនុស្ស ៦៧នាក់ ដែលមានមេបញ្ជាការនាវា លោកវរនាវីទោ ម៉ែក ប្រោកមែន (MIKE PROUDMAN) ៕