ភ្នំពេញ៖ មន្ត្រីជំនាញនៃក្រសួងពាណិជ្ជកម្ម នឹងចុះស្រាវជ្រាវ ត្រួតពិនិត្យមុខទំនិញអាហារប៉ះពាល់​សុខភាព និងចាត់វិធានការផ្លូវការច្បាប់ ចំពោះអាជីវករ ​និងអ្នកផលិតផលិតផលណា ដែលចែកចាយលក់ទំនិញអាហារប៉ះពាលសុខភាពក្មេងៗ តាមសាលារៀន។

ការត្រៀមចុះពិនិត្យនិងចាត់វិធានការផ្លូវច្បាប់ពីសំណាក់មន្រ្តីជំនាញក្រសួងពាណិជ្ជកម្មនៅពេលនេះ បានធ្វើឡើងក្រោយពីក្រសួងអប់រំយុវជន និងកីឡា ប្រកាសក្រើនរំលឹកជាថ្មី ស្តីពី ការពង្រឹងវិធាន​ការ​អនុវត្ត​លើកកម្ពស់សុវត្ថិភាពចំណីអាហារនៅតាមសាលារៀនរដ្ឋ ​និងឯកជននានា ដើម្បីបង្ការ​កុំឲ្យមានផលប៉ះពាល់ដល់សុខភាពសិស្សនៅតាមសាលារៀន។

នៅក្រោយពិធីបើកវគ្គបណ្តុះបណ្តាល កម្មសិទ្ធបញ្ញា ត្រៀមប្រឡងជ្រើសរើសភ្នាក់ងារតំណាង​ស្របច្បាប់ នៃម្ចាស់ម៉ាកជំនាន់ទី៦​ នៅកម្ពុជា ថ្ងៃទី១៧​ ខែកុម្ភៈនេះ ឯកឧត្តម អ៊ុក ប្រជា រដ្ឋលេខាធិការ​ក្រសួងពាណិជ្ជកម្ម ថ្លែងថា បច្ចុប្បន្នក្រសួងពាណិជ្ជកម្មដែលមាន​អគ្គនាយកដ្ឋាន​កិច្ចការពារអ្នកប្រើប្រាស់ និង ប្រកួតប្រជែង​ ហៅកាត់ថា ក.ប.ប បាននិងកំពុងធ្វើចុះស្រាវជ្រាវ និងត្រួតពិនិត្យមុខទំនិញអាហារចែកចាយតាមទីផ្សារ យកមកធ្វើតេស្តរកសារធាតុផ្សំប៉ះពាល់​សុខភាពជាប្រចាំ ដើម្បីលើកកម្ពស់សុខភាព ​សុវត្ថិភាពអ្នកប្រើប្រាស់។

ឯកឧត្តម បន្តថា នៅពេលនេះ មន្ត្រីជំនាញក្រសួងពាណិជ្ជកម្ម ក៏នឹងពង្រីកការចុះត្រួតពិនិត្យ​មុខ​ទំនិញអាហារ​នៅតាមសាលារៀនបន្ថែមទៀត ​និងចាត់វិធានការតាមផ្លូវច្បាប់ នៅពេលរកឃើញ​មុខទំនិញចំណីអាហារណាមានសារធាតុហាមឃាត់ ​ដែលបង្កផលប៉ះពាល់​សុខភាពដល់ក្មេងៗ ជាពិសេសសិស្សានុសិស្ស។

សូមបញ្ជាក់ថា ក្រោយពីសង្កេតឃើញ មានការលក់ដូរចំណីអាហារមិនមាន​សុវត្តិភាព និង​សុខុមាលភាព ​ដល់សិស្សានុសិស្សនៅតាមគ្រឹះស្ថានសិក្សាមួយចំនួន នៅថ្ងៃទី១៦ ខែកុម្ភៈ ឆ្នាំ២០២៣​នេះ​ ក្រសួងអប់រំ ​បានបង្ហោះសេចក្ដីណែនាំស្ដីពី ​ការពង្រឹងវិធានការអនុវត្តការលើក​កម្ពស់​សុវត្ថិភាព​ និងសុខុមាលភាពចំណីអាហារនៅតាមគ្រឹះស្ថានសិក្សាចំណេះទូទៅ​សាធារណៈ និងឯកជនឡើងវិញ នៅលើទំព័រហ្វេសប៊ុកផ្លូវការរបស់ក្រសួង ​ដើម្បីបន្តក្រើនរំលឹកសារជាថ្មី ឲ្យ​គណៈគ្រប់គ្រងសាលារៀននានា ​ពង្រឹងវិធានការអនុវត្តការលើកកម្ពស់សុវត្ថិភាព និងសុខុមាលភាព​ចំណីអាហារនៅតាមគ្រឹះស្ថានសិក្សា។

ក្នុងសេចក្តីណែនាំនោះ ក្រសួងក៏បានបង្ហោះរូបភាពមុខទំនិញផលិតផល ​ប្រភេទ នំ ចំណី អាហារ​ជាច្រើន ​ដែលក្រសួងហាមឃាត់ក្នុងការលក់ដូរនៅតាមគ្រឹះស្ថានសិក្សាចំណេះទូទៅ​សាធារណៈ និងឯកជនផងដែរ ​ក្នុងទិសដៅលើកកម្ពស់សុវត្ថិភាព ​និងសុខុមាលភាព​របស់អ្នកសិក្សា និង​បុគ្គលិកអប់រំជាដើម៕អត្ថបទ៖ ស៊ុមសុខជា