ព្រៃវែង៖ ឯកឧត្តម នេត សាវឿន សមាជិកគណៈអចិន្រ្តៃយ៍ គណៈកម្មាធិការ​កណ្តាល​គណបក្ស​ប្រជាជន​កម្ពុជា​ អនុប្រធានទី១ ក្រុម​ការងារ​គណបក្ស​ចុះ​មូលដ្ឋាន​ខេត្ត​ព្រៃវែង និង​ជា​ប្រធាន​ក្រុម​ការងារ​គណបក្ស​ចុះ​មូលដ្ឋាន ស្រុក​ស្វាយអន្ទរ និង​ស្រុក​កញ្ជ្រៀច នៅព្រឹកថ្ងៃទី១៩ ខែ​កុម្ភៈ ឆ្នាំ២០២៣​នេះ​បាន​ចុះ​ផ្សព្វផ្សាយ​បន្ត​សេចក្ដី​សម្រេច​ចិត្ត នៃ​ម​ហាសន្និបាត​វិសាមញ្ញ​តំណាង​ទូទាំង​ប្រទេស​របស់គណបក្សប្រជាជនកម្ពុជា ជូនសមាជិក សមាជិក​គណបក្ស​ប្រជាជនកម្ពុជា មកពីស្រុកស្វាយអន្ទរ និងស្រុកកញ្ជ្រៀច ខេត្តព្រៃវែង។

ថ្លែង​នៅ​ក្នុង​ពិធី​ចុះ​សំណេះសំណាល និង​ផ្សព្វផ្សាយ​នោះ ឯកឧត្ដម នេត សាវឿន បាន​ប្រាប់​ដ​ល់​ស​មាជិក-សមាជិកាថា សេចក្ដីសម្រេចចិត្ត នៃមហាសន្និបាត​វិសាមញ្ញ​តំណាង​ទូទាំងប្រទេស​របស់​គណបក្ស​ប្រជាជនកម្ពុជា កាលពីកន្លងទៅនេះ គឺ ការប្ដេជ្ញាចិត្តរបស់គណបក្សប្រជាជនកម្ពុជា ដោយត្រូវ​តែឈ្នះឆ្នោត​ជាដាច់​ខាត។ ដើម្បីទទួលបាននូវជ័យជម្នះ ១៖ ត្រូវមានផែនការជាក់លាក់តាមដំណាក់កាលនីមួយៗ ជាក់ស្ដែង​ទើប​ជោគជ័យ ទាំងក្រុមការងារ និងគណបក្សមូលដ្ឋាន, ២៖ សាមគ្គីភាព ព្រោះគណបក្សប្រជាជនកម្ពុជាជោគជ័យ គឺសាមគ្គីភាពផ្ទៃក្នុង និងខាងក្រៅ ព្រមទាំងសាមគ្គីជាតិទាំងមូល និង៣៖ ត្រូវរុញឲ្យបានល្អនូវអំពើល្អរបស់គណបក្សប្រជាជនកម្ពុជា ដើម្បីចូលបេះដូងរបស់ប្រជាពលរដ្ឋ ដែលសង្ឃឹម​លើ​ក្រុមការងារជាខ្នងបង្អែក ហើយត្រូវកែលម្អអ្វីដែលជាចំណុចអវិជ្ជមាន។

ឯកឧត្តមបានបន្តថា អាជ្ញាធរ និងសមត្ថកិច្ច ត្រូវអាទិភាព និងបង្កើនរក្សាសន្ដិសុខ សណ្ដាប់ធ្នាប់ ទប់ស្កាត់បណ្ដា​បទល្មើសទាំងអស់ និងជំរុញអនុវត្ដគោលនយោបាយភូមិ ឃុំសង្កាត់ មានសុវត្ថិភាព។ ត្រូវស្វែងយល់អំពីការព្រួយបារម្ភរបស់ប្រជាពលរដ្ឋ ដូចជាបទល្មើសព្រហ្មទណ្ឌ គ្រោះថ្នាក់ចរាចរណ៍ និង​គ្រឿងញៀន​ជាដើម។ លោកបន្ដថា ដើម្បីទប់ស្កាត់ទី១៖ អនុវត្តកិច្ចការជំនាញ តាំងពីថ្នាក់អគ្គ ដល់មូលដ្ឋានភូមិឃុំ, ទី២៖ អនុវត្តកិច្ចការចំហរបង្កើនល្បាត ប្រចាំបញ្ជាគ្រប់ពេល ប៉ុស្ដិ៍នគរបាលរដ្ឋបាល ត្រូវប្រចាំការ២៤ម៉ោង រួមទាំងសាលាឃុំផងដែរ, ទី៣៖ អាជ្ញាធរចុះជួយអប់រំប្រជាពលរដ្ឋ ដើម្បីចូលរួមសហការជា​មួយអាជ្ញាធរ​មានសមត្ថកិច្ច ទាំងចរាចរណ៍ និងគ្រឿងញៀន។

រដ្ឋបាលស្រុក ឃុំ ភូមិ ត្រូវខិតខំយកចិត្តទុកដាក់បម្រើសេវាសាធារណៈផ្សេងៗជូនប្រជាពលរដ្ឋ លុះនៅពេលរួចរាល់ត្រូវ​យកឯកសារទាំងអស់នោះ ជូនប្រជាពលរដ្ឋដល់ផ្ទះតែម្ដង។ បន្ថែមពីនេះ ត្រូវប្រឹងប្រែងដោះស្រាយវិវាទផ្សេងៗរបស់ប្រជាពលរដ្ឋក្រៅប្រព័ន្ធតុលាការ ហើយត្រូវស្វែងយល់ឲ្យបានកាន់តែច្រើននូវអ្វីដែលជាបញ្ហាប្រឈម តម្រូវការរបស់ប្រជាពលរដ្ឋ ក្នុងករណីដោះមិនបានត្រូវរាយការណ៍ជូនថ្នាក់លើ។

ជាមួយគ្នានោះដែរ ឯកឧត្តមក៏បានជំរុញដល់ក្រុមការងារពីពេលនេះដល់ថ្ងៃឃោសនា ត្រូវពង្រឹងកម្លាំង​នយោបាយ​សម្រាប់ការបោះឆ្នោត ដោយក្រុមការងារត្រូវចុះដល់ភូមិ ឃុំខ្នងផ្ទះតែម្ដងជាមួយអាជ្ញាធរមូលដ្ឋាន ដើម្បីពិនិត្យ​មើលភូមិសាស្ដ្រ ស្ថានភាព បញ្ហាប្រឈម។ លើសពីនេះ ត្រូវពង្រឹងអង្គការចាត់តាំងបក្សនៅមូលដ្ឋាន ដោយក្រុម​ការងារត្រូវជួយបទពិសោធន៍ និងធនធាន ព្រមទាំងជំរុញសកម្មភាព​ចលនាមហាជន​ដែលជាកត្តាសំខាន់​បំផុត។ បន្ថែមពីនេះ ក៏ត្រូវពង្រឹងមន្ដ្រីបង្គោលនៅតាមមូលដ្ឋាន ព្រមទាំងយកចិត្តទុកដាក់ធ្វើបច្ចុប្បន្នភាពសមាជិកបក្ស។

គណបក្សមូលដ្ឋានមានការងារចំបាច់មួយចំនួនដែលត្រូវក្ដាប់ឲ្យជាប់នូវកិច្ចការសំខាន់ៗ និងប្រតិទិន​របស់គណៈកម្មាធិការជាតិរៀបចំការបោះឆ្នោត ដោយត្រូវពង្រឹង​ពិនិត្យសុពលភាព​អត្តសញ្ញាណប័ណ្ណសញ្ជាតិខ្មែរ, ការបណ្ដុះបណ្ដាលច្បាប់, ត្រៀមរៀបចំបម្រើយុទ្ធនាការឃោសនា។ ក្រុមការងាររួមជាមួយគណបក្សមូលដ្ឋាន (ថ្ងៃឃោសនា ថ្ងៃស្ងប់ស្ញៀម ថ្ងៃបោះឆ្នោត និងថ្ងៃរាប់សន្លឹកឆ្នោត) ត្រូវយល់អំពីច្បាប់ និងនីតិវិធីដែល​បានណែនាំ​របស់​គណៈកម្មាធិការ​ជាតិរៀបចំការបោះឆ្នោត ដោយអនុវត្តបែបណាកុំឲ្យខុសច្បាប់។

ក្រៅពីចុះសំណេះសំណាល និងផ្សព្វផ្សាយបន្តនូវសេចក្តីសម្រេចមហាសន្និបាតគណបក្ស ឯកឧត្តម នេត សាវឿន ក៏បាន បានផ្ដល់អំណោយកុំព្យូទ័រលើតុ ជូនគណបក្សស្រុកទាំងពីរ មួយស្រុកមួយគ្រឿង, គណបក្សឃុំទាំងពីរស្រុក មួយឃុំមួយគ្រឿង, អធិការដ្ឋាននគរបាលស្រុកទាំងពីរ មួយស្រុកមួយគ្រឿង និងប៉ុស្ដិ៍នគរបាលក្នុងស្រុកទាំងពីរ មួយប៉ិស្ដិ៍មួយគ្រឿង សរុបចំនួន៤៦គ្រឿង, ជូនគណបក្សស្រុកទាំងពីរមួយស្រុក១លានរៀន និងសមាជិក សមាជិកា ចំនួន២១៨នាក់ ម្នាក់៥ម៉ឺនរៀលផងដែរ៕ អត្ថបទ ៖ បាន ចក់