ភ្នំពេញ៖ តាមរយៈដំណើរទស្សនកិច្ចផ្លូវការរបស់ ​ឯកឧត្ដម ព្រុំ សុខា រដ្ឋមន្រ្ដីក្រសួង​មុខងារ​សាធារណៈកម្ពុជា ទៅកាន់សាធារណរដ្ឋបារាំង តបតាមការអញ្ជើញ​របស់លោក លោក ស្តានី​សទ្បាស ហ្គេរីនី ( Stanislas Guerini ) រដ្ឋមន្ត្រីក្រសួងកំណែទម្រង់សាធារណៈនិងមុខងារ​សាធារណៈបារាំង​រយៈពេល ៣ ថ្ងៃ ភាគីទាំងពីបានប្ដេជ្ញាបន្តពង្រឹងកិច្ចសហប្រតិបត្តិការគ្នាបន្ថែម​ទៀត​ជាពិសេសកិច្ចសហប្រតិបត្តិការលើវិស័យមុខងារសាធារណៈ។

ឯកឧត្ដម ព្រុំ សុខា រដ្ឋមន្រ្ដីក្រសួងមុខងារសាធារណៈ បានថ្លែងប្រាប់ BTV តាមរយៈកិច្ចសម្ភាសន៍​ផ្ដាច់មុខ កាលពីថ្ងៃទី២០ខែកុម្ភៈថា ក្នុងដំណើទស្សនកិច្ចផ្លូវការរបស់ឯកឧត្ដមរយៈពេល ៣ ថ្ងៃចាប់ពីថ្ងៃទី ៧ ដល់ថ្ងៃទី៩ ខែកុម្ភៈនេះ ឯកឧត្ដម បានជួបពិភាក្សាការងារជាមួយ លោក ស្តានីសទ្បាស ហ្គេរីនី ( Stanislas Guerini ) រដ្ឋមន្ត្រីក្រសួងកំណែទម្រង់សាធារណៈនិងមុខងារ​សាធារណៈបារាំង។

ក្នុងកិច្ចពិភាក្សានេះ ភាគីបានផ្តោតជាសំខាន់លើកិច្ចសហការ​ដែលធ្លាប់អនុវត្តកន្លងមកដល់​បច្ចុប្បន្ន​រវាង​ស្ថាប័នទាំងពីរ និងខិតខំរួមគ្នាស្វែងរកលទ្ធភាពថ្មីលើការពង្រឹង​ពង្រីកកិច្ចសហប្រតិបត្តិការគ្នា ជាពិសេសលើវិស័យមុខងារសាធារណៈជាបន្តទៀត។

ឯកឧត្ដម ថ្លែងថា ដំណើរទស្សនកិច្ចទៅកាន់ស្ថាប័នសំខាន់ៗ​របស់បារាំង ដែលពាក់ព័ន្ធនឹងវិស័យ​មុខងារសាធារណៈធ្វើឡើងក្នុងគោលបំណងបន្តពង្រឹងកិច្ចការងារប្រកបដោយប្រសិទ្ធភាព និង​ការសិក្សាបន្ថែមពីឧត្តមានុវត្តន៍របស់ប្រទេសបារាំង ដើម្បីទទួលបាននូវធាតុចូលសំខាន់ក្នុងការ​គិតគួរ​ពិចារណាកាន់តែស៊ីជម្រៅលើការកសាងក្របខណ្ឌច្បាប់​លិខិត​បទដ្ឋាន ​គតិយុត្ត និង​កម្មវិធី​គោល​នយោបាយជាបន្តបន្ទាប់។

គួរបញ្ជាក់ថា ក្រសួងមុខងារសាធារណៈកម្ពុជា​ត្រូវបានបង្កើតឡើងដោយរាជរដ្ឋាភិបាល​កម្ពុជា​ក្នុងនីតិកាលទី៥នៃរដ្ឋសភាដោយព្រះរាជក្រមចុះថ្ងៃទី៩ ​ខែធ្នូ ឆ្នាំ២០១៣។ ក្រសួងនេះបានដាក់បញ្ចូលស្ថាប័នចំនួន ៣ រួមមានរដ្ឋលេខាធិការដ្ឋានមុខងារសាធារណៈ អគ្គលេខាធិការដ្ឋាននៃក្រុមប្រឹក្សាកំណែទម្រង់រដ្ឋបាល ​និងសាលាភូមិន្ទរដ្ឋបាល ​ដោយមានមុខងារ និង​បេសកកម្មសំខាន់ក្នុងការដឹកនាំ គ្រប់គ្រង និងអភិវឌ្ឍវិស័យមុខងារសាធារណៈនៃ​ព្រះរាជាណា​ចក្រកម្ពុជា ​និងការងារកែទម្រង់រដ្ឋបាលសាធារណៈ៕អត្ថបទ៖ វ៉ន ដារ៉ា