ភ្នំពេញ ៖ យុវជនប្រមាណជិត៤០០នាក់ បានធ្វើដំណើរបំពេញទស្សនកិច្ចសិក្សា ឈ្វេងយល់ នៅតំបន់​ប្រវត្តិសាស្រ្ត​យោធាកោះថ្មអិច១៦ ដែលមានទីតាំងស្ថិតនៅ ភូមិកោះថ្ម ឃុំទន្លូង ស្រុកមេមត់ ខេត្តត្បូងឃ្មុំ ដើម្បីជម្រុញ​អោយ​យុវជនបានយល់កាន់តែច្បាស់ពីសច្ចៈភាពប្រវត្តិសាស្រ្តនៃការលះបង់ដ៏ធំធេងរបស់សម្តេចតេជោ ដែលបាន​យក​ជីវិតជាដើមទុន ដើម្បីឆ្ពោះទៅកាន់ការផ្តួររំលំរបបបប៉ុលពតនៅថ្ងៃទី ២០ ខែមិថុនា ឆ្នាំ១៩៧៧។

ឯកឧត្តមនាយឧត្តមសេនីយ៍ សៅ សុខា អគ្គមេបញ្ជាការរង និងជាមេបញ្ជាការកងរាជអាវុធហត្ថលើផ្ទៃប្រទេស និងជាប្រធានក្រុមការងាររៀបចំពិធី រំលឹកខួបទិវាចងចាំបានផ្តល់បទសំភាសន៍ដល់BTV អោយដឹងថា សមិទ្ធិផល​ដែលបាននឹងកំពុងសាងសង់នៅក្នុងតំបន់ប្រវត្តិសាស្រ្តយោធាកោះថ្មអិច១៦ មកដល់ពេលនេះ សម្រេចបាន​ប្រមាណ៧៥ភាគរយហើយ ដែលសមិទ្ធិផលទាំងអស់នេះ នឹងក្លាយជា​ប្រយោជន៍​សម្រាប់​កូនចៅ​ជំនាន់ក្រោយ​ព្រោះតំបន់ប្រវត្តិសាសស្រ្តនេះ គឺជាទីតាំងនៃការផ្តើមដំណើរឆ្ពោះទៅកាន់ការផ្តួលរំលំ របបខ្មែរក្រហម ដែល​សម្តេចតេជោ ហ៊ុន សែន និង សមមិត្តចំនួន៤នាក់ទៀត បានយកជីវិតទៅប្តូរ​ដើម្បីរំដោះ​ជីវិតប្រជាជន​កម្ពុជា​ចេញពីរបបដ៏ខ្មៅងងឹតកាលពីជាង ៤៥ឆ្នាំមុន។ ឯកឧត្តមនាយឧត្តមសេនីយ៍បានមានប្រសាសន៍បញ្ជាក់បន្ថែមថា កិច្ចការដែលត្រូវបន្តធ្វើនៅតំបន់នេះ គឺបញ្ចប់គម្រោងមហាចេតិយ ដែលទុកសម្រាប់តម្កល់​អដ្ឋិធាតុយុទ្ធជន​ស្នេហាជាតិចំនួន៤៩រូបដែលបានពលិជីវិតក្នុងតំណាក់កាលតស៊ូ ដើម្បីសង្រ្គោះអាយុជីវិតពលរដ្ឋកម្ពុជា ចេញពី របបបខ្មែរក្រហម។ ក្រៅពីនេះ គម្រោងបន្តទៀតគឺនឹងមានការសាងសង់អាគារស្នាក់នៅ បន្ទប់ផ្ទះបាយ បង្គន់​អនាម័យ របង ទីតាំងចារិកឈ្មោះ សប្បុរសជន​ដែលចូលរួម​សាងសង់​សមិទ្ធិផល​ទាំងអស់​ រួមនឹង​សមិទ្ធិផល​សំខាន់​ជាច្រើនទៀត ដើម្បីប្រែក្លាយទីទាំងនេះជាតំបន់ទេសចរណ៍ប្រវត្តិសាស្រ្ត ព្រំដែនសន្តិភាព កិច្ចសហប្រតិបត្តិការ ការអភិវឌ្ឍន៍រវាងប្រទេសកម្ពុជា និង វៀតណាម ស្របជាមួយនឹងគម្រោងបើកច្រកទ្វារអន្តរជាតិ នៅ​ពេល​ខាង​មុខនេះ។

ឯកឧត្តម នួន ផារត្ន័ អភិបាលរងរាជធានីភ្នំពេញ ដែលបានដឹកនាំយុវជន និង ប្រជាជនទូទៅ ចុះមក​ទស្សន​កិច្ចសិក្សា​នៅទីតាំងអិច១៦នេះ បានមានប្រសាសន៍ថាគោលបំណងសំខាន់គឺដើម្បី អោយយុវជនកាន់​តែយល់ច្បាស់​ពីគុណ​តម្លៃសច្ចៈភាពពិតនៃការលះបង់របស់សម្តេចតេជោកាលពីជាង ៤៥ឆ្នាំមុន។ ឯកឧត្តម បានមានប្រសាសន៍ថាបន្តថា សម្តេចតេជោ មិនត្រឹមតែជាអ្នករំដោះប្រទេសជាតិអោយរស់រានឡើងវិញនោះទេ ប៉ុន្តែសម្តេចតេជោហ៊ុនសែន ខិតខំរក្សាបាននូវបូរណភាពទឹកដី ឯកភាពជាតិ ដឹកនាំប្រទេសជាតិ និង ប្រជាជន​អោយ​រស់នៅ​ក្រោម​ដំបូល​នៃ​សន្តិភាព និង ការអភិវឌ្ឍន៍រីកចម្រើនមកដល់ពេលបច្ចុប្បន្ននេះ។ 

តំណាងយុវជន និង ប្រជាពលរដ្ឋដែលបានទៅតំបន់អិច១៦ បានរៀបរាប់ថា ពួកគាត់ព តជារំភើប និងមាន​មោទកភាព​ជាទីបំផុត ដែលបានមកដល់តំបន់ប្រវត្តិសាស្រ្តផ្ទាល់ ដែលពីមុនបានត្រឹមលឺ ប៉ុន្តែពេល​បានមក​ដល់ពួកគាត់ពិតជាកោតស្ញប់ស្ញែងនូវគំរូវីរៈភាព របស់សម្តេចតេជោហ៊ុនសែន និង អ្នកតស៊ូស្នេហាជាតិជាច្រើនទៀត បានលះបង់អាយុជីវិត ដើម្បីប្រទេសជាតិ និង ប្រជាជនកម្ពុជា ។ ប្រសិនបើពេលនោះសម្តេចតេជោហ៊ុននសែនមិនសម្រេចចិត្តចាកចេញពីទឹកដីកម្ពុជា ចូលទៅ​កាន់​ប្រទេស​វៀតណាម​ នៅថ្ងៃទី ២០ ខែមិថុនា ឆ្នាំ១៩៧៧នោះទេ មកដល់ពេលនេះ យុវជនកម្ពុជា មិនអាចនឹកស្រម៉ៃបានទេថា តើប្រទេសកម្ពុជា និង ប្រជាជនកម្ពុជា អាចនឹងមានបន្តមកដល់ពេលបច្ចុប្បន្ននេះយ៉ាងណា?

សូមបញ្ជាក់ថា ការសាសង់ សមិទ្ធផលនានានៅទីតាំងនោះ មាន វត្ថុបំណង៖ ដើម្បីចារទុកជាប្រវត្តិសាស្ត្រសម្រាប់មនុស្សគ្រប់ជំនាន់ ពិសេសអប់រំយុវជន និងមនុស្សជំនាន់ក្រោយ ឲ្យបានដឹង និងចងចាំព្រឹត្តិការណ៍ជាប្រវត្តិសាស្ត្រ ដែលប្រទេសកម្ពុជា បានឆ្លងកាត់នូវសោកនាដកម្មដ៏ព្រៃផ្សៃ, ដើម្បីរំលឹក​ដឹងគុណស្ថាបនិកមគ្គុទ្ទេសក៍ឯក និងប្រតិបត្តិករនយោបាយឈ្នះ-ឈ្នះ ប្រែក្លាយតំបន់ប្រវត្តិសាស្ត្រកោះថ្ម X16 ឲ្យមានតម្លៃជារមណីយដ្ឋានបម្រើឲ្យវិស័យវប្បធម៌ ទេសចរណ៍ សេដ្ឋកិច្ច ទំនាក់ទំនងមិត្តភាពរវាងប្រទេស និង​ប្រជាជន​ប្រទេសជិតខាងទាំងពីរ កម្ពុជា និងវៀតណាម តាមប្រសាសន៍របស់សម្តេច តេជោ។ តំបន់ប្រវត្តិសាស្ត្រយោធាតេជោ កោះថ្ម X16 គឺជាកន្លែង តស៊ូរបស់សម្តេចតេជោ ហ៊ុន សែន ក្នុងដំណើរ​ឆ្ពោះទៅ​ការផ្តួលរំលំរបបប៉ុតពត ថ្ងៃទី ២០ ខែមិថុនា ឆ្នាំ ១៩៧៧៕ អត្ថបទ ៖ សូដាវណ្ណ